[愛情無限loop] 就係咁，我做左女神一年既備胎: １４１　阿富表白！？

阿富同佢女朋友分左手已經五日，而佢呢五日都不斷話想同阿琪見面。

一開始，阿琪都會覺得先前唔理阿富，但阿富咁唔開心，好似對佢唔好，但慢慢佢就覺得，自己咁做好似中左個頭入左個千年旋渦當中。

因為，阿琪又覺得比佢煩住。

而且，今次既煩可能無我避，阿富好似睇穿左阿琪既心軟一樣，如果阿琪唔理佢既話，佢就話會唔開心，甚至係打比佢喊。

如果你有一個好朋友喊住打比你，你會點做？當然係開解佢啦，阿琪都係呢個心態，只不過係，阿富既心態係點呢？係未真係只想搵人呻？



我唔知，我極力同自己講，呢Ｄ只係朋友之間既對話，但係阿琪將阿富同佢講既野話比我聽知後，根本我就唔可以對自己講大話，因為果Ｄ對話，擺到明係追緊一個女仔先會講既說話。

有時我會覺得，阿琪話比我知道佢同阿富之間既野唔係一個好事，因為我唔可以再同自己講阿富無野。

係我心目中，阿富都係一個好男人，但而家，佢要同我爭，我應該用咩野心態對佢。

而我更加知道既係，阿琪唔會鐘意佢，我又應唔應該同阿富講？

不過，我都人停同自己講，我唔係阿琪既邊個，呢Ｄ事我根本唔應該理，而且無資格去理。



但係，命運就好似同我開玩笑一樣，佢好似不停要我知道呢件事，但我又無能為力去阻止。

呢種感覺，好辛苦。

到左星期六，姐係同阿琪約好左陪佢買化妝品既日子，我地兩個好似平時咁行街，但我用左一個同平時唔尋常既心態去行。

我望住阿琪揀緊化妝品既開心樣，都係唔好問佢同阿富Ｄ野。

「呢間野新開所有野都有半價架。」我第一次同阿琪行街唔係去超級市場或者街市。



「咁不如我送樣野比妳好唔好啊？」我問阿琪，然後阿琪好開心咁答我：「你話架，咁我就唔客氣揀架拿。」

「好啊。」我答佢，而阿琪揀左一支唇膏。

佢好開心咁行到收銀到，然後係佢個購物籃到拎左我話送比佢果支唇膏出黎，「咁呢支就你比錢拿，其他我自己比得拿。」

我點一點頭，比左錢後，佢就拎走支唇膏同我講：「我好鐘意呢種顏色架，你要記住啊。」

知道，我會記知架拿。

然後阿琪笑住咁話：「就當係我生日禮物啦。」

「下？妳今日生日咩？」我問。

「唔係啊，不過仲有一個月就到我生日。」佢同我講：「我預左你要同我慶祝架拿。」



「呢個一定啦，妳預一日比我。」我同佢講。

「嗯。」阿琪點一點頭，然後繼續行街。

每次行街一定會同佢食野，呢個係一定會發生既事，因為佢係個好為食既人。

「係呢，阿富佢……點啊？」我鐘意問左呢個成日都想問既問題。

而我問完之後，見阿琪既反應同我意料既一樣，佢嘆住氣同我講：「佢未話每日都想見我，話想一直都陪住我，話好想照顧我。」

聽到阿琪咁講後，我又問佢：「咁妳點同佢講啊。」

「佢做到咁，我未話唔駛啦，而且都好婉轉咁拒絕佢，但係佢扮晒唔知咁繼續呢Ｄ話題。」睇到阿琪既眼神，佢真係好唔開心，「點解ＷＯ，點解我次次想同一個男仔做好朋友，最後都會搞到咁。」



「咁你同佢講，妳想同佢做朋友囉。」阿琪聽完我咁講後就話：「我有講過啊，但係佢話唔想只係朋友，如果我拒絕佢既話，都要過左幾年後先可以做返朋友咁話ＷＯ。」

我估唔到阿富會講呢Ｄ野斷左阿琪既後路。

「咁……都幾煩ＷＯ。」我話，而阿琪同點頭讚同。

送左阿琪返去之後，我就好專心咁諗點幫阿琪慶祝，上網搵左好耐資料，諗緊點先可以做一個特別既生日比阿琪。

搵搵下，諗諗下，原來已經去到深夜，望住個鐘，兩點幾，然後，收到阿琪既一個ＭＳＧ。

突然間，有一種不妙既感覺湧緊過黎。

阿琪：阿富佢頭先黎同我表白

我望住個ＭＳＧ，頭先所諗既野住部唔記得晒。