[愛情無限loop] 就係咁，我做左女神一年既備胎: １３６　睡火山爆發

自從果次游水之後，ＧＲＯＵＰ入面好似興起左游水既熱潮一樣，有好多人都開左游水既ＥＶＥＮＴ，不過，大多數都係狗公開，而參既既人都係得果班狗公。

真係人算不如天算。

而我同阿琪如果想游，會私下約，因為阿琪話唔想再無啦啦收到一個唔熟既人ＳＤ句妳著泳衣好靚比佢。

所以野都好似都平常一樣，我同阿琪既感情都係，慢慢黎，唔駛急。

但我開始察覺到，一個睡火山好似開始蠢蠢欲動，甚至，唔係察覺，而係有時會收到阿琪既ＭＳＧ，話果個人又開始ＳＤ返短訊比佢。



而果個人，就係阿富。

原來經過上次之後，佢都係未放得低阿琪，好幾個月無搵佢既阿富，好似山洪暴發一樣，阿琪既事好多野都想知，最想知既，係我同阿琪既近況。

我終於明白點解果日佢又係更衣室問我果個問題，因為佢除左想知道我係未仲追緊阿琪之外，最想知既係我仲未追到阿琪。

就係果一日，阿富就ＫＥＥＰ住每日都ＳＤ　ＭＳＧ比阿琪，而阿琪都係一貫既作風，好遲先回應佢，甚至係唔回應佢。

係旁邊見到咁既我，唔知點解無開心既感覺，反而，係覺得富慘。



ＪＵＤＹ又話我呢種心態真係要改，佢話情場如戰場，人地開你拖，你唔還拖仲要覺人地慘，遲早玩完。

可能，佢都有佢既道理既。

而家每次有我同阿琪跑步既ＥＶＥＮＴ，都會有阿富既身影，佢每次都好想行過去阿琪度，但次次阿琪見到咁，都會回避同走向我身邊，ＧＲＯＵＰ入面Ｄ人，心水清既都會睇到係咩野事，所以都多左好多閒言閒語講阿琪。

呢個情況，係我同阿琪都唔想見到既。

因為，阿琪講過，如果大家知道佢唔揀名富，就會成為ＧＲＯＵＰ入面既千古罪人，因為所有人都會覺我阿富係絕種好男人，所有女性心目中既好好先生好老公，有佢追的話果個女仔一定會答應，如果阿琪唔答應，就姐係傷害左一個絕世好男人，傷害左ＧＲＯＵＰ入面所有女性心目中最愛既偶像咁。



每次講到呢到，阿琪都會嘆氣，然後話：「群眾壓力下形成既愛情，根本唔可以叫做愛情，因為係迫出黎，無好結果。」

「咁又係，而且，阿富仲同緊佢女朋友拍緊拖。」我答佢，然後阿琪又嘆左一口氣話：「你知唔知阿富又話我知，佢同佢女朋友呢排成日吵架，話覺得感情變淡，諗咁係未仲有另一個人更加適合佢。」

我聽到阿琪咁講後，當堂打左個突，然後指一指佢，「佢好似講緊妳ＷＯ。」

阿琪聽到我咁諗後，嘆一嘆氣，「唉～我知佢係一個好好既男人，仲會係一個好好既老公，但係無感覺就真係無感覺架啦，迫唔到架ＷＯ。」

我聽到阿琪既說話後，都覺得佢好心煩，而阿琪呢一刻好無奈咁話：「最慘係我驚佢同佢女朋友吵架，係會為左我，咁，我就會變成一個被小三的小三……」

見到佢咁既樣，我就夾左佢最鐘意食既叉燒包落佢既碗度，「唔好唔開心先啦，食個包先。」佢仲係扁咀望住我，然後我就拎係個叉燒包，掐出一小角喂佢，「我喂妳啦，啊～」

佢啊大左個口笑住食左果啖包，其實最近我地都會咁做，佢一有唔開心我就會咁，而我有時掛住做野ＣＨＥＣＫ公司ＥＭＡＩＬ果陣，佢都會喂我食野。

有時，我都幾享受呢Ｄ互喂既時刻。



如果，無咁多野煩既話，可能會仲享受。