[愛情無限loop] 就係咁，我做左女神一年既備胎: １２５　從後的擁抱

「你……你無野嘛……」其實我一直都係估會係ＣＯＷ開口先，但今次我估錯左，係ＪＵＤＹ問佢野。

「無事……」ＣＯＷ答，但唔知係未佢仲有少少醉，講野講得有少少唔清楚之餘，個身仲有少少企唔穩。

「你飲好多黎啊？點解咁大酒味既？」ＪＵＤＹ問，而ＣＯＷ就無點理佢，轉左身就走。

我同阿琪見到佢咁，都唔知點做好，而ＪＵＤＹ就跟住ＣＯＷ後面，我同阿琪就唯有跟住佢地。

「點解你比佢飲到咁醉？」阿琪問我。



「我都唔想架，佢頭先喊完就不叫酒飲。」我答佢。

「ＣＯＷ佢喊過？」阿琪用確認既語氣話，而我對佢點一點頭後，佢就講我知：「頭先ＪＵＤＹ都有喊，應該係為ＣＯＷ而喊。」

我聽到後唔知點解會心微笑左一下，「終於係為左ＣＯＷ而喊。」而阿琪都對我還以一個意味深長既笑容。

跟左佢地兩個一陣，ＪＵＤＹ終於忍唔住問ＣＯＷ，「你仲想行幾耐啊？」語氣其實唔多好，但無以前佢對ＣＯＷ果種呼喝既語氣。

但ＣＯＷ，都係無理ＪＵＤＹ。



ＪＵＤＹ見到咁，就行到佢前面，推左佢一下後問：「你究竟想點啊？」

ＣＯＷ企左係度，望住ＪＵＤＹ話：「妳理我仲咩姐，你條仔走左啦，你唔去追佢返黎？」

ＪＵＤＹ聽完之後就舉起隻手準備打落ＣＯＷ度，但係，ＣＯＷ竟然用手捉住佢然後話：「妳唔好再諗住打我。」

ＪＵＤＹ甩問左佢隻手後話：「你係未咁絕啊！」

係囉，我睇住ＣＯＷ咁都好奇，頭先仲話掛住ＪＵＤＹ，而家就咁既行為？但阿琪係旁邊睇到笑晒咁，我問佢笑咩，佢就話：「振夫鋼啊。」



哦……原來如此。

佢地兩個就好似小朋友嘈交咁，一個唔理，一個就不停煩，直到ＪＵＤＹ忍無可忍後，對住走係佢前面既ＣＯＷ大叫：「ＣＯＷ！你夠拿！」

ＣＯＷ真係比佢嚇左一跳成個人彈一彈，不過佢都無轉身望ＪＵＤＹ。

「你係未見到我咁樣，你先會開心返Ｄ？」ＪＵＤＹ問，而ＣＯＷ無答佢。

「呢幾日我不停係度諗，諗果條仆街既野，諗佢有幾好，佢對我做過Ｄ咩野令我好感動，但係，我一件事都諗唔到，只係不停記返起佢對我既差，佢對我既謊言，仲有佢傷害我一切，先知道原來以前既我無珍惜過你。」ＪＵＹＤ講講下喊左出黎：「你同我求左咁多次婚，我真係有感動過架，但係我唔珍惜，所以你而家咁對我，係我抵死，我應該受呢Ｄ懲罰，但係我得過諗字架咋，如果你真係咁對我，你知唔知我真係會唔開心架……」

ＪＵＤＹ慢慢行近ＣＯＷ，「我唔開心，就會發脾氣想打人，我唔開心，就會發脾氣想鬧人，我唔開心，就會發脾氣想咬人……但係而家無拿，果個人唔肯再比我打，果個人唔肯再比我鬧，果個人唔肯再比我咬……」 行到ＣＯＷ身後，ＪＵＤＹ停左係度，「……果個人又會唔會知道，因為我知佢愛我，我先會對佢咁做ＷＯ……」ＪＵＤＹ用頭枕落ＣＯＷ既背，「……你係未真係唔再愛我拿？」

從我呢個角度望住ＣＯＷ既背，見到佢係深呼吸左一啖，然後，佢仰天，用手擦一擦佢既眼淚後話：「點解……」呢個點解帶住既係一種思念既感覺，「點解上天要我愛妳愛到咁深……」

ＪＵＤＹ佢從後抱住ＣＯＷ，「你仲愛我的話，就得架拿……」ＣＯＷ都好似有少少動作，應該係將雙手疊係ＪＵＤＹ抱住佢既手上面，兩個人，就咁樣抱住喊起上黎，而我同阿琪，卻係佢地身後會心微笑起來。