[愛情無限loop] 就係咁，我做左女神一年既備胎: ８２　飲早茶

將頭先同呂晨既對話講左比阿琪知後，阿琪笑左一個耐人尋味，「如果，我都好似呂晨咁意志堅定就好。」

聽到阿琪咁講好，我不解問佢：「妳好唔意志堅定咩？」

「我係一個，好易心軟既人……」阿琪嘆左口氣話：「好多事情，我知道都係因為我一時心軟而做成，就好似今晚咁，就係一時心軟先會見我前男友，點知最後比佢打，比佢淋可樂。」

我用手摸一摸可憐既阿琪個頭，「而家無事拿。」

「嗯。」佢微笑點一點頭。



食完野後送左阿琪返去，去到佢屋企樓下後，佢話：「下次再同你去飲野補返數。」

我點一點頭後講：「快Ｄ返去休息啦，妳今日都累拿。」

我望住阿琪行人樓既背影，見到佢入升降機先安心咁走，行到一半路程，阿琪ＳＤ到一個ＭＳＧ比我。

阿琪；可以同你做朋友，真係開心
我：以後我地兩個日子仲有咁多，有排妳開心
阿琪：一定會
阿琪：阿牛，我有Ｄ野想講


我：我諗我知妳想講咩，ＪＵＤＹ先前都有同我講過
阿琪：真係？
我：嗯
我：我可以等下
阿琪：嗯（開心）

我先前以為，如果阿琪同我講而家唔想拍拖，我果句「我可以等下」會好難先ＳＤ到出去，但無諗過原來正常情況係可以咁順暢，都係果句，可能，我今晚飲左Ｄ酒壯膽掛。

返到屋企門口前面，都已經係６點幾，我好小心翼翼咁開門……「咁早返啊死仔……」都係嘈醒左。



「老牛大人……」我用我一貫既方法，傻笑咁對住佢。

「陪我飲早茶。」佢一講完就唔理我既意願，拉左我出門，「老牛大人，我成晚無訓過，你比我訓下好唔好啊。」

「同邊條女搞咁勁成晚無訓過啊。」老牛大人依然咁搞笑。

「邊有啊老牛大人。」我答佢。

「咁又係，你個款最多未三分鐘搞完。」老牛大人用一個不屑既眼光望住我，「都唔知點解你遺傳唔到我既優良傳統。」

「阿爸！無啊！」我有時真係頂佢唔順。

「作死你啊咁大聲！嘈住你娘親訓覺啊！」佢打左我個頭一下話。

去到茶樓，我成個人謝晒咁坐係度，而老牛大人就無理過我，佢自己點左好多點心後，就問：「最近有無咩事唔開心啊？」



佢咁樣一問，我坐直返個身答佢：「無啊，好平常。」

「咁你上次問我既野，解決左未？」佢問。

我笑左笑答佢：「邊有咁快。」

老牛大人佢笑一笑，搖一搖頭話：「竟然有個女仔可以搞到我個仔咁，呢個女仔真係唔簡單。」

「阿爸……我有Ｄ野想問你？」我問。

「問啊，性技巧果Ｄ我都答到架，你阿爸我仲有心有力架。」老牛大人笑吟吟咁講。

有時真係比老牛大人激死，「我想問，如果你堅持左一樣野好耐，但到最後你先發覺原來你所堅持既野係錯，同唔值得，但你已經花左好多心力落果樣野度，你會點做啊？」



老牛大人好淡定咁飲左啖茶，食左粒燒賣，然後話：「仲記唔記得，我上次話有樣野下次先話你知既？」

我回憶左一下，然後點一點頭。

「堅持去愛，係好難既事，但係放低，仲難。」老牛大人一路食一路講：「當一個人一開始決定要為一件事堅持到底既時候，一定唔會諗呢件事值唔值我同對與錯，佢地會無條件付出自己既所有，又會無條件去接受痛苦，直到佢地既所有耗盡，直到佢地忍受痛苦已超過底線，佢地先會諗，呢件事係未值得，係未錯呢？但都只不過係得過諗字，因為佢地先前付出左咁多，如果放棄，未姐係打自己既嘴巴。」

聽完老牛大人既說話後，我答：「面子既問題。」

「最近醒左ＷＯ，獎你食個叉燒包。」老牛大人夾左個叉燒包比我，然後話：「所以話，能夠選擇放棄既人，係要用好大勇氣，因為佢地要先否缺自己，然後先可以灑脫地放下一件事。」

老牛大人呢一段講既時候輕鬆，但意義深長既說話，令到我諗係呂晨同ＪＵＤＹ，佢地兩個其實都好似，呂晨有一個對佢差既男朋友，而ＪＵＤＹ有一個對佢唔多好但佢又好愛既男人，呂晨要值住收兵黎報復，平衡返男朋友對佢既傷害，而ＪＵＤＹ就有個好受佢既男人，填補返佢心靈上既空虛。

只不過，而家呂晨能夠灑脫離開，但ＪＵＤＹ仍然拖泥帶水，就好似老牛大人講既一樣，要否定自己，先可以灑脫放下……

我好欣賞呂晨可以有咁大勇氣去否缺自己以前所做既野，亦有可能，佢以前一直都想否缺自己，只不過無一個好既機會，而尋晚就係一個機會比佢好好否缺自己。



而ＪＵＤＹ，佢否缺自己既機會，要幾時先到呢？

「仲咩成副諗樣啊？」老牛大人既說話，將我由問題入面拉返出黎，「……咁快，就想放棄？」佢問。

我搖一搖頭，「邊會咁快，我大把時間。」

我笑左一笑，老牛大人都笑左一笑，我係唔會咁快否缺自己既，學呂晨果句，要意志堅定。