[愛情無限loop] 就係咁，我做左女神一年既備胎: ７８ 今晚既呂晨好靚
走左出酒吧之後，我地三個人就上左一架的士，上左的士後的由的士既倒後鏡望，見唔到呂晨既男朋友追出黎，只係見到幾個果間酒吧既侍應，心諗，係ＷＯ，好似未埋單添。
呂晨同ＪＵＤＹ坐後面既座位，而我就坐係前面，同司機講左去邊之後，全架車就只剩低收音機既聲音。
好彩個衰妹無係車到嘔，而呂晨就不停咁幫ＪＵＤＹ擦汗，係倒後鏡度睇到此情此境，真係無諗過平時佢地兩個見面就串黎串去，而家竟然會係互相照應，諗起都會心微笑。
「多謝你地。」呂晨話：「其實你地唔駛咁做。」
「……邊撚過幫妳啊，我幫天下既女人咋。」估唔到醉到咁既ＪＵＤＹ都可以應到機，「妳條ＯＮ９都正ＯＮ９，條仔咁對妳，妳就一早飛撚左佢啦，飛佢之前仲要拎佢去閹，再剁碎喂狗就岩拿。」
我係前面聽到都笑左，唔係因為ＪＵＤＹ既說話好笑，而係佢咁多粗口而想笑。
坐係我旁邊既司機都忍唔住笑左下問：「呢位姐仔都幾烈女架ＷＯ。」
「烈你老母咩，開車啦。」ＪＵＤＹ答。
「係係係，開車。」司機聽到ＪＵＤＹ既回答後繼續笑，然後同我講：「哥仔，你識左呢兩個女仔真係執到。」
玩野啊你，司機。
呂晨都笑左笑話：「我都知我蠢，唔係就唔會做左咁多蠢事啦。」
「而家搞清楚未好囉。」我答佢，其實，我都唔知我咁做岩唔岩，只不過，我知到我咁做，點都可以改變到呂晨同佢男朋友而家既情況。
我地係先送ＪＵＤＹ返屋企，然後就我同呂晨一齊返去，但唔知點解，同佢一齊行返去屋企既路，同上次燒野食行既果條路唔同。
直到，去到一個公屋樓下，呂晨同我講：「我到拿。」我望一望眼前果個有密碼匣既入口，而且入口果位保安仲偷緊懶訓緊覺後，先發現原來ＪＵＤＹ之前所講既野係真，燒野食果間屋唔係呂晨真正既屋企。
我望一望呂晨，心中疑惑不斷，但又唔知問唔問佢好，因為今日佢已經發生左好多事。
只不過，呂晨好似知道我問咩，佢話：「你係未想知上次燒野食果度係邊度？同埋我點解要講大話？」
我點左點頭，然後呂晨就話：「上次果度係我男朋友……前男朋友既屋企，佢一家人去左旅行，所以我就拎左黎招呼你地。」佢向住公園仔既方向行左過去，我跟住後面，然後佢就繼續講：「諗住強行佔有你果間房，係我前男朋友間房。」
唔怪得知唔似女人既房啦。
「果度充滿左我同佢既愛、情慾、同傷痛……」佢黯然地坐左係韆鞦上面，開始搖，「我既第一次，就係佢間房度比左佢，佢果陣好愛我架，眼中就好似只有我咁，但係當佢升到大學果陣，身邊出現左好多小三之後，我就不停咁接受佢帶比我既傷害。」佢慢慢講，眼角既淚終於流左出黎，「有一次，我諗住送一個佢好想要既模型比佢，所以靜靜雞上左去佢度，諗住收埋個模型係佢間房度，點知，撞破左佢同另一個女人係度搞野。」呂晨擦一擦眼淚，然後笑左一下，「我跌左盒模型落地，佢地都無察覺到，我雙手用力掩住自己個口，唔想比佢聽到我既喊聲，因為我見到佢地，係對住我同佢影果Ｄ親蜜相前面做愛……」
唔怪得果次比呂晨騎住果陣，我叫佢唔可以對佢男朋友唔住然後指一指果Ｄ相，佢會有咁既反應啦。
「佢地做果陣，個女仔仲望住Ｄ相話：『你條女……無波既……』『係啊，邊似得妳隻大乳牛咁。』我好唔甘心，我對佢咁好，佢為左另外Ｄ女人係我背後咁講我，所以，我要報復，佢出去偷食，我就出去比綠帽佢戴。」
「下？」聽到呢度我嚇一嚇，「妳唔會係跑ＧＲＯＵＰ……」
「傻啦，我都係個有要求既人，跑ＧＲＯＵＰ入邊Ｄ狗公咁低質，我點會睇得上眼。」呂晨破涕為笑咁講。
「咁又係。」我傻笑住回應。
「但係，我慢慢發覺其實我同佢唔係同一類人，佢可以四圍玩當無野，但我唔得，試過一兩次後其實我都有Ｄ反感，但係我又想向佢報復，所以都唔知點算。」呂晨又講：「直到阿琪係ＧＲＯＵＰ入面出現，Ｄ狗公向佢擺尾，我先覺得原來男人都係一樣，用條撚諗野，所以開始想玩弄男人，但又直到你既出現，令我覺得原來世界上都有Ｄ男人係好既。」呂晨無啦啦用好嫵媚既眼神望住我。
「妳唔好咁望住我啊，我嗌架。」我笑住答佢，而佢都笑返話：「阿琪真係好，有你呢個男人鐘意佢。」
「下？」我傻笑問佢。
「你係未仲想知點解我要用前男朋友間屋同你地燒野食既？」呂晨話。
「係啊。」我答。
「因為我覺得直正既女神係要住大屋囉，同想比你地覺我我係一個不折不扣既女神。」佢講笑咁答，但唔知點解，我好認真咁回應佢：「我覺得，而家表露無遺既呂晨，先係真正既女神。」
呂晨聽到後，笑我好甜，「估唔到平時傻下傻下既牛兄，都會口甜舌滑。」
「咩啊，我認真……」我呢一句都未講完，就感覺到左邊臉頰上面出現一種濕潤既感覺，髮絲係我耳邊既輕掃，整到我成塊面突然間一熱。
「多謝你啊，阿牛。」呂晨頭先錫左我一啖，「放心啦，呢個錫錫係多謝你，我唔會再同阿琪搶你架拿。」
比呂晨錫左一啖後，我半死機狀態，連點樣送佢返上去都唔知，我只係知道，頭先微笑既呂晨，係我見咁耐到而家最靚既。
就當我仲未回神之際，電話響起，我望一望個來電即刻成個人返晒黎，因為，係阿琪既電話，「喂？」一個好多人都會犯既明知故問，得出既答案係阿琪既喊聲。
「妳仲咩喊啊？妳無事嘛？」就算我點問，阿琪都剩係識係度喊……