[愛情無限loop] 就係咁，我做左女神一年既備胎: ６２　幫手？睇戲？

為左方便大家，我諗講一講我地今日會進行既活動既時間表比大家睇睇。

早上－會合大家
中午前－呂晨家整燒野食既野
中午—跑步大會
下午—下午茶時間及其他準備工作
日落前—燒野食大會開始

呢個就係今日既ＲＵＮ　ＤＯＷＮ，睇落就好美滿，但唔知做落會係點……



貌似好順利咁去到呂晨既屋企，期間大家好台灣男神彭于晏套破風入面咁，Ｄ單車未輪流咁做破風手既，我地既情況都係一樣……阿富走去阿琪度，佢Ｄ　ＦＡＮＳ就跟住佢都去左阿琪度，跟手阿琪為左避佢走左黎我度，呂晨見到阿琪走去我度就行左過黎，咁當然Ｄ狗公就跟住呂晨啦，而阿琪比Ｄ狗公圍到咁上下，就走左去金姐度，而我亦都為左避開呂晨行左去ＪＵＤＹ旁邊，阿富見阿琪無同我一齊又走去阿琪度，佢Ｄ　ＦＡＮＳ　又係死跟，咁阿琪又為左避阿富，走左去我度……

成程路咁樣換位都有好幾次，整到我同阿琪未開始燒野食就累都ＰＫ，我地兩個對視果陣，都笑左一笑，而金姐同ＪＵＤＹ就最好，因為佢地可以食住花生等睇戲，而且佢地仲睇得不知幾開心。

就咁破風到呂晨屋企，ＪＵＤＹ一到步第一句就串呂晨：「駛唔駛搵鎖匙啊？」

呂晨無理過佢。

入到去，呂晨今次好快就叫大家放好晒Ｄ野，然後就叫大家係廳到等，「你地等等先，我去拎Ｄ野出黎比你地醃雞翼同其他野。」



「我幫妳手好唔好？」阿琪問左後已經企左起身，想行去呂晨度，而呂晨見到阿琪，諗左諗答：「……都好。」佢答呢個問題果陣唔知點解望一望我。

而阿富見到阿琪話幫手，當然好踴躍話：「我都去幫手。」佢又左迅雷不及掩耳既速度走左去阿琪既旁邊。

見到咁既情況既我，當然唔可以執輸啦，但當我想話幫手果陣，ＪＵＤＹ竟然話：「咁我同金姐、阿牛係度等啦。」

咩話！？妳個衰妹搞破越壞啊！？

「咁好啦，我地行。」呂晨講完後，其他狗公都起晒身跟住佢行，而阿富Ｄ　ＦＡＮＳ當然都一齊去啦，走剩我、金姐同ＪＵＤＹ三個人。



佢地走左之後，我望一望ＪＵＤＹ然後話：「妳個衰妹，係未特登既……」

金姐聽到我咁同ＪＵＤＹ講之後，就話：「傻仔，ＪＵＤＹ幫你咋，呢Ｄ叫欲擒故縱，如果你好似Ｄ狗公同阿富既表現咁，你覺得阿琪會點諗你，未就係同果班狗公一樣囉。」

「金姐果然係金姐。」ＪＵＤＹ聽到金姐講既野後，表示好認同，跟住佢再話：「而且同先呂晨好刻意咁想分開你同阿琪，如果你去，呂晨又唔知會做Ｄ咩野，我只係想平平安安咁去到燒野食。」

「真的嗎……平平安安……妳個衰妹好似好ＥＮＪＯＹ食住花生等睇戲ＷＯ。」我答佢。

「咁都要顧全大局既，何況，想睇戲既又唔止得我一個。」ＪＵＤＹ笑左笑後望住金姐，而金姐就話：「咁有咁大場戲唔睇，會折墮架。」

妳兩條友，都唔知妳地兩個係未真係想幫我……