[愛情無限loop] 就係咁，我做左女神一年既備胎: ４４　衰多手

雖然係約得齊人，但係地點係未定，而通常約食飯最煩既野，除左人數、時間、當然就係地點。

正當我以為佢地咁有本事可以約齊Ｄ人，傾好時間之際，打邊爐既野都傾得七七八八，估唔到，地點呢個議題傾到而家都未傾好。

呂晨：我唔要去呢間啊～呢間好遠既～
艾倫：咁等我再搵下先
東尼：我都搵一搵

如是者，呢兩個護花就搵左一大堆ＯＰＥＮＲＩＣＥ既ＬＩＮＫ，瘋狂係個ＧＲＯＵＰ度ＳＤ出黎，佢地兩個好似比賽一樣，一人一條ＬＩＮＫ梅花間竹咁互有攻守，而其他人當然係食住花生等睇戲啦。



到最後，地點都係無定案。

而就係呢個時候，阿琪ＳＤ左個ＭＳＧ比我。

阿琪：佢地ＳＤ咁多出黎仲難揀
我：係囉，不如搵阿富同金姐傾仲好啦
阿琪：都好，但係搵金姐得拿，唔好煩阿富
我：點解啊？
阿琪：呢排唔係幾想煩到佢
我：ＯＫ



我無再追問落去點解阿琪唔想煩阿富，但係我察覺到阿富有Ｄ野唔妥，希望係我錯覺啦。而當我諗緊阿富Ｄ野果陣，又有另一個人ＳＤ　ＭＳＧ比我，係呂晨……

呂晨：點解你唔搵有邊度可以去既？
我：唔駛搵啦，其他人都ＰＯＳＴ晒出黎
呂晨：如果係你ＳＤ出黎，我一定會話好架
我：（喊笑）
呂晨：我講真架
我：咁我題議去妳屋企食，唔通妳又話好（喊笑）
呂晨：好啊



我好後悔同左呂晨講左呢番說話，因為佢真係去左ＧＲＯＵＰ度講，而且係咁講。

呂晨：阿牛話想去我屋企打邊爐ＷＯ，不如就去我屋企打啦～

仆街！！！唔撚係掛！！！佢咁打我水洗都唔清！！！我見到個ＭＳＧ後即刻ＳＤ　ＭＳＧ比阿琪解釋，唔好問我點解咁做，當下我第一時間想咁做我都唔知點解。

我：死火，同呂晨講笑既野佢ＳＤ左出ＧＲＯＵＰ
阿琪：我睇到
我：我真係同佢講笑架咋
我：但估唔到佢ＳＤ出ＧＲＯＵＰ
阿琪：你唔駛同我解釋ＷＯ（喊笑）

你唔駛同我解釋！
你唔駛同我解釋！


你唔駛同我解釋！

唔知點解呢句對我既衝擊力好大，就好似一個職業拳手，打左幾拳過黎咁，就要係重拳果種。我呢一個時候只係望實部電話，唔知點應阿琪好……但阿琪就係呢個時候加左句。

阿琪：我知你係講笑（喊笑）
阿琪：不過你今次死拿（喊笑）
阿琪：佢地真係話去呂晨度食（喊笑）

ＯＨ！！！！！ＳＨＩＴ！！！！！

我覺得呢次打邊爐唔係咁簡單。