[愛情無限loop] 就係咁，我做左女神一年既備胎: ８　佢問我叫咩名啊

「你地一陣會去邊啊？」阿琪問。

「無啊，我地約左一陣去睇戲啊。」阿珍答返佢。

「咁你地趕唔趕得切架？」佢又問。

「放心啦，趕得切既。」阿珍答。

我不停咁想搵機會去答咀，加入佢地，但係搵黎搵去都無機會，但唔知點解阿琪一直傾計，佢都係面有難色咁，所以我就膽粗粗咁問佢：「阿琪……」呢個係我第一次叫佢個名，「……妳係未唔舒服啊，見妳好似有Ｄ唔多妥咁。」



經我咁樣一問後，阿琪笑左笑然後話：「無啊，無唔舒服啊。」佢既笑容真係好靚，「但係我其實想去諾士佛臺，不過唔知點去。」

所有女仔都係路痴呢句說話，幾時都係正確，眼見有一個咁好既機會可以帶路，我仲唔打蛇隨棍上咩，「係我地睇戲既附近，不如我帶妳去啊。」

「係啊，佢帶妳去啦，佢正宗人型路牌樣，好多人都成日問佢路架。」阿塔佢笑住咁講，然後仲用手掙批一批阿珍，而阿珍回以一個明白一切既樣之後，就答：「係啊，不如而家行啦。」

佢地就咁樣行左去，得返我同阿琪。

「……咁我地都行啦。」我同佢講。



「好啊。」又係呢個殺死人既微笑，再咁落去我真係短幾年命。

就當我正沉醉係佢既笑容之中果陣，佢問我：「係呢，你叫咩名啊？」

佢問我叫咩名啊！
佢問我叫咩名啊！
佢問我叫咩名啊！

呢個時刻對我好重要，所以要講三次，你地可能唔明，但係當一個你認為係女神既女仔問你叫咩名時果種喜悅，係非筆墨可以形容架。