[突發][唔係蛋黃哥]大撚鑊_我一起身發現變左做粒蛋黃: （二十一）

「當時，我同我另外三位同伴，將之前其它人逃走嘅經驗進行總結！我地發現每條通道，基本上都會即刻俾人捉返入黎！只有處理廢棄雞蛋嘅果條通道，可以有多D時間！而我地亦都搵到一個規律，基本上，呢部機器，只係連接左七個房間！而廢棄雞蛋呢條通道，係一至日循環咁去唔同房間！而當中，能夠擁有最多時間嘅，就係星期日，通去我地住過嘅果間房！所以，之前有人試過，係出面徘徊左足足一日！」于強說。
 
「即係話，我地真係有機會離開呢度啦！」我說。
 
「無錯！果次徘徊左一日嘅果個人，最後都係俾人捉返入黎！雖然佢始終走唔甩，但我地發現係佢身上，有一張紙，紙上面，係呢度嘅地圖！」于強說。
 
「吓，地圖？呢度成個白色空間，一眼睇晒啦，駛鬼地圖咩！同埋，你點知果張係呢度嘅地圖！」我說。
 
只見于強慢慢從它體內，滲出一張白色的紙張，感覺很怪異！
 




「唔駛咁樣望住我啦，基本上我地依家嘅身體，係可以將D野收入去嘅！不過只限於一D細過自己嘅物件！呢張就係呢度嘅地圖！」于強把紙張展現給我看！
 
「原來係咁！真係呢度嘅地圖！果D紅點同埋黑色線係咩黎？」那張地圖上，其實比較像是一張白紙，只是在正中間，有一座塔，而塔的四周分別有七條黑色線和一條黃色線向外伸延著！而白色的地方，偶然會有一些紅色小點，不知標示著些甚麼！
 
「黑色線就係通往唔同房間嘅通道！黃色線就處理廢棄雞蛋嘅通道，我地估計，由於佢每日都會改變，所以用黃色標示！而最關鍵，就係果D紅色點！紅色點全部都係一D隱藏嘅位置，有D係用黎觀察唔同嘅房間！距離我地最近嘅呢一點，就係可以望到我地曾經住過果間房！之前我就係呢度，見到你搬左入去住，而我亦見到我家姐去你屋企討論點樣救我！」于強解釋！
 
「原來……你就係黃雨傘個細佬！唔怪得你個名好熟啦，黃于珊，黃于強！所以之前我聽到D怪聲，就係你發出黎？」我驚訝的問！
 
「無錯！我之前其實一直都想提醒你，唔好再住呢間房，但可惜，結果都係阻止唔到你！不過，呢D紅色點嘅作用，唔單止觀察呢D房間！係塔嘅附近，果D紅點，並唔係用黎觀察房間，而係一張又一張嘅黑色卡紙！」于強說。
 




「黑色卡紙？咁佢有咩用？」我問。
 
「呢層，我地都無一個好肯定嘅答案！但係，我地相信，呢張黑色卡紙，係令到我地逃走之後，可以變返人類嘅關鍵！」于強說。
 
「你地……點解會有咁嘅結論？」我緊張的問！
 
「簡單講，呢個係實驗得出黎嘅結論！首先，我地之前曾經推斷過，呢D黑色卡紙，之所以咁近座塔，其實就係為左提供能源俾座塔！因為當我地拎走左一張卡紙後，呢個空間會有一瞬間變得昏暗，而果座塔會發出類似機械被切斷電源時嘅聲音！但呢個情況好快會恢復，而拎走左嘅黑色卡紙亦會自動補充返！而經過左幾次之後，我地四個人都集齊左黑色卡紙，準備離開呢度！不過，當日離開嘅時候，發生左一件怪事！」于強說。
 
「發生左咩怪事？」我問！
 




「果日我地四個，算好日子之後，就準備係廢棄通道離開！當時我地幾個好輕鬆，因為我地親眼見過一次，之前逃走嘅人，都係輕輕鬆鬆就咁離開，完全無受到咩阻攔！但果次，我地四個人係通道面前企左一陣，就發現其它人開始望住我地！我地只係感到有D奇怪，但計劃左咁耐，都唔想放棄，所以663號當時第一個從通道離開！就係佢離開嘅同時，其它嘅人好似痴左線咁衝過黎，664號同665號佢地都即刻跳入去通道入面！但係665號準備入去嘅時候，已經有一堆人衝埋去佢度！」于強說。
 
說真的，雖然于強說得這麼可怕，但一群雞蛋向另一隻雞蛋襲擊，這畫面其實有點滑稽！
但為了尊重他的說話，我只好強忍著不笑出聲來。
 
「我見到呢個情況，唯有避一避風頭，走去另一邊！而其它人好似睇我唔到咁，淨係捉左665號！我走到665號原本的位置，看見他掉下來的黑色卡紙，我馬上把它藏起來！那時我也準備跳進通道，但我發現不斷有其它人接近我，我只好放棄計劃，再等待時機！而665號被那些人拉了去一個不知何時出現的暗角位置，然後他被掟進一部奇怪的機械入面，當他重新出現，記憶和意識已經完全無晒！」于強說。
 
「咁奇怪，又會咁多次都無事，唯獨你地走先有事？」我不解的問。
 
「呢個其實係一個好現象！我推測，佢地之前唔阻止，係因為知道根本無可能走得甩！而佢地阻止我地，掉返轉頭諗，亦證明左我地係有成功逃走嘅可能性！而關鍵相信就係果張黑色卡紙！另外，最有力嘅證據，就係逃走嘅第二日出現左！」于強說！
 
「喂，你地兩個係度做咩呀？」剛剛來過的601號，再次走來質問我們。
 
「報告，我地仲訓練緊，佢嘅資質比較差，所以仲未可以收放自餘！」于強說。
 




「搞咁耐仲未得？我地無時間啦，岩岩大人落左指示，要係呢個星期將足夠嘅能量輸入塔入面！唔可以再拖啦，等我黎訓練佢！」601號說。
 
我和于強面面相覷，不知道應如何應付這個情況！
 
「601號，請馬上到塔嘅位置尋找600號！重覆……」忽然在這廣闊的空間傳來廣播的聲音。
 
「600號？無辨法，665號，呢個新人交俾你！我地無時間啦，你快D令佢可以變出手手腳腳！我地唔可以失敗！」說完後，601號向塔的方向跑去！
 
「吁，好彩者！」我和于強抹了一把冷汗！
 
「睇黎呢件事好快會完結，之前從來無試過咁多異象！我繼續講返俾你知個情況先！逃走嘅第二日，我發現664號俾人捉左返黎，但係佢身上有一張字條，寫住D字『我成功左，黑色卡紙係關鍵 663號』！而同一時間，我嘅編號由666號，變成665號！種種跡象都證明，係有方法成功逃離呢度，變返人類！」于強說。
 
「咁就得啦！我地馬上逃走啦！」我興奮的說！
 
「冷靜D先，首先，我地要等到後日先可以行動！而且，我之前收埋嘅黑色卡紙已經粉碎左！我懷疑因為瑪門用左第二種卡紙，我地要諗辨法再拎多兩張新嘅卡紙先得！」于強說。




 
「咁仲等咩呀？我已經可以完全想像到有手有腳嘅雞蛋啦！隨時可以行動！」我催促著于強。
 
「唔係你想像得咁簡單，係你黎之前我已經試左無數次！但自從果件事之後，其它人就好似士兵咁，無時無刻互相監視！我有幾次爭D俾佢地掟入角落果部奇怪機械入面！不過，好在你出現得及時，多一個人掩護，就有機會拎到卡紙！我已經記得佢地嘅行動模式，跟住落黎就要你配合我，去拎兩張卡紙，令到我地可以逃離呢度！個計劃係咁嘅……」于強偷偷的在耳邊說。
 
這個計劃，其實只是一個普通的聲東擊西之計，並沒有甚麼新意！
但，時間已不容許我們多想，我們只能見步行步了！
 
于珊，等著吧，我會和你弟弟平安的回來！