[突發][唔係蛋黃哥]大撚鑊_我一起身發現變左做粒蛋黃: （二十）
「點解？點解我會變成咁架？」我感到非常震驚！
「你唔需要知道點解！你只需要知道，你呢個狀態已經無可能再變返之前咁！」王馬門笑著說。
「無……無可能！呢個係夢，無錯，呢個一定係夢！」
我嘗試用手去掌摑自己，希望利用痛覺使我清醒過來！
但是，我忘了現在的狀態，我既沒有手也沒有腳，根本甚麼也做到！
「夢？你地就係咁，唔肯面對現實，淨係識逃避！不過唔緊要，咁樣對我地仲好！以後你就留係呢個空間，做一隻每日都渾渾噩噩嘅雞蛋啦！」王馬門說。
「唔得！我……唔可以就咁離開呢個世界！求下你，放我走！」此刻的我，連哭泣也做不到！
「你以為呢個世界會有咁著數嘅事咩？係你自己破壞承諾，無人逼你！乖乖地留係度啦！」王馬門說。
「你……究竟係咩人？點解要揀我……」我完全接受不了現況。
「我係咩人？我咪瑪門囉！」瑪門說。
「我知你係王馬門！我係問你嘅身份，又係點樣將我變成……變成一隻蛋？」我說。
「我幾時講過自己姓王？我個名就係瑪門，係全能嘅撒旦，最為自豪嘅兒子！」瑪門說。
「瑪門，撒旦？你……你係指……」我震驚得說不出話來。
「睇黎你終於了解情況！我係被世人稱為七宗罪中嘅貪婪──瑪門！既然你作為最後嘅靈魂──666號！我就再講多D俾你知！之所以揀中你，係因為你嘅靈魂充滿負面感情，而且不幸嘅特質，亦都非常適合我地！所以，我就同你立左契約，只要你唔打破入面嘅規矩，你就唔會有事！不過，我暫時都未見到有人可以完全遵守契約！」瑪門說。
「規矩？我……我無破壞……唔通？」我好像知道自己犯了甚麼錯誤了！
「無錯！如果唔係祂不斷監視住我地，我都唔駛咁麻煩，要搞埋D咩契約！不過，依家仲好，墮落嘅靈魂，連祂都管唔到！你跟住落黎，就同其它嘅『人』好好相處啦，每日你地唯一嘅工作，就係對住果部機器吹氣！只要你努力D，我都可以考慮下解放你！」
瑪門說完的同時，我看到我身處的白色空間中，突然放大了不知多少倍！
而在這個空間四周，有著無數的雞蛋，工作的工作，聊天的聊天！
然後，在這個巨大的空間中，我看見中間有一台非常巨大的機器，而機器的外圍，有著不少凹陷的空洞！
四周的雞蛋不斷貼上那些空洞，相隔了一段時間後，它們離開了那些空洞，由一些新的雞蛋填上。
「果D……果D雞蛋係度做緊咩？」我忍不住發問。
「佢地？呢個就係佢地嘅工作，每日你地都要輪流向果部機器吹氣！只要努力咁工作，令到機器能夠成功運作，表現好嘅話，我就會解放左佢地！所以你見佢地係幾咁努力咁做野！」王馬門看著那些雞蛋滿意的說。
「果……果部機器，係用黎做咩架？」我問。
「果部機器有兩個作用，第一個作用，就係為人類世界嘅某D房間，提供冷氣！即係你之前住果間房，哈哈哈哈！另一個作用，你無必要知道！好啦，你已經問得夠多啦，接落黎，你係時候開始工作啦！最後提一提你，你最好改一改你對佢地嘅稱呼，佢地自覺上仍然係一個人，如果你講錯左，我都唔知你會受到D點樣嘅對待！另外就係，600號係呢個空間嘅管理人，你可以將佢當係你嘅老闆！記住，努力工作嘅話，我就會解放你！如果唔係……」瑪門說完後，他的身影開始消失。
「唔好呀！放我走呀！放我走呀！」我大聲叫喊著！
──────黃于強視角結束，切換回陳小明視角──────
「成件事就係咁啦！」于強對我說。
「唔係卦？咁痴線嘅野點會發生係我身上架？同埋……我都仲係有好多問題！例如，你仲未解釋點解你會知我係邊個！而且，明明你係666號，點解又會變左做665號？」我問。
「頭先果D問題我會逐一答你，但你應承我，一定唔可以激動！」于強認真的說，你別問我如何從雞蛋殼判斷他是認真的，這是一種感覺！
我爽快的答應了他。
「好！首先，你要知道，每個人入到黎嘅時候，都係擁有原先嘅記憶同埋意識嘅！而當時嘅663、664同665號都仲有意識，佢解釋左好多野俾我知！而最重要嘅，係佢地發現左，呢度係有通道離開嘅！」于強說。
「咩話？咁我地仲唔走！」我不自覺提高了聲量，引來其它雞蛋的注意！
「喂！你兩個做咩咁嘈呀？」有一隻感覺非常有威嚴的雞蛋向我們走來，我定睛看了一看，是601號，真名是文永成。
「唔好意思，佢係新黎嘅666號，我被派黎教佢點樣有返D手手腳腳，等佢可以順利工作！岩岩佢成功左一次，所以有D激動！唔好意思，我會叫佢冷靜D，唔會騷擾到其它人！」于強解釋。
「嗯......好，總之你地唔好咁嘈啦！」說完後，601號慢慢離開了！
「咪叫左你唔好咁激動囉！喂！喂！你望咩呀？」于強對我說。
「你......你知唔知佢係邊個？」我問。
「吓？咪601號囉！」于強說。
「唔係編號，我係問，你知唔知佢真名？」我問。
「梗係唔知啦，我黎到嘅時候，佢地都無晒意識，唔會講自己個名！有咩問題？」于強問。
「佢......佢係文永成！」我說。
「文永成？咪者係之前報紙報導過，全家都俾火燒死晒，只係死剩佢果個人？」于強說。
「係，因為好少人姓文，所以我好有印象！你等我一陣！」我嘗試定睛觀察其它雞蛋，其餘的六十多隻雞蛋，雖然不是全部認識，但有一些我好像在新聞中看到過，而且......全部都是男性！
男性？怎麼感覺有些奇怪，和我的記憶好像有些不協調的感覺，就是想不起為甚麼會這樣。
「于強，我發現呢度所有雞蛋都係男性，有D我認得係新聞出現過！都係D不幸嘅人黎！」我說。
「唔出奇呀，瑪門有講過，佢捉嘅都係男性，亦都係一D墮落同不幸嘅人！」于強說。
「原來係咁！頭先唔好意思，你繼續講啦！」男性......不協調的感覺就是揮之不去，算了，不去想了！
「好，唔好再咁激動啦！咁我繼續啦！咁我地發現左有通道，可以通去深水埗嘅某D房嘅冷氣機！其中一間，就係我同你住過果間！而仲有意識嘅我地，就諗辨法睇下有無機會離開呢度！」于強說。
「既然有通道離開，無理由淨係得你地發現架？同埋，其它雞蛋係仲有意識嘅時候，應該都會嘗試過偷走先係架？」我不解的問。
「無錯，當時我嘅同伴都有講過，其實係佢地之前，有為數不少嘅人都試過逃離呢度！但大部分嘅人，係逃走左之後，唔知點解，佢地都會全身佈滿一D可怕嘅窿，感覺上好似俾某D野咬到之後，傳送返入黎咁！」于強說。
我聽完後，馬上回憶起在街上看見的那些雞蛋，被那個充滿利齒的公事包吞噬的情況！
「而最麻煩嘅係，當佢地傳送返入黎之後，所有嘅記憶都無晒，而且連意識都被改變！佢地入返黎之後，完全接受左呢度嘅生活，無晒逃走嘅諗法！」于強說。
「咁......同死有咩分別！」我不安的說。
「發現左呢個事實之後，有一D人放棄左逃走，因為佢地想保持返自己係一個人嘅記憶！但......事實係，當佢地再係度生活多一排，佢地嘅記憶同性格，都會消失！」于強說。
「咁......咪即係......」我感到絕望。
「而更可怕嘅係，瑪門話我地努力工作嘅話，會解放我地！但我地發現，係所謂完成工作之後，佢地都變成一D腐爛嘅雞蛋，然後我地會將呢D雞蛋放去某條通道，果D腐爛嘅雞蛋會經呢條通道去返人類世界，瑪門就會處理左佢地！」于強續說。
「深水埗套房入面嘅雪櫃？」我突然想起。
「無錯！雖然唔知點解要咁麻煩，又掟入去D通道，又去間房回收咁，但程序上就係咁處理！」于強說。
「照你咁講，我地係咪完全無辨法成功離開呢度？」我問。
「雖然情況好絕望，但係接落黎，我會話俾你知，點解我會知道你係邊個，同埋點解我會由666號，變成665號！」于強說。
看來，現在還不是絕望的時候。