[突發][唔係蛋黃哥]大撚鑊_我一起身發現變左做粒蛋黃: （十九）
「喂！我叫你呀！仲唔行過黎？」雖然放眼開去，全部都是白色的雞蛋，但我看過去的時候，卻不難分辨它們！
面前的雞蛋，姑且稱它為大傻吧！
「喂，望完未呀？快D死過黎啦！」大傻對我說。
「吓？我無腳，行唔到喎！」我回答。
「新黎嘅就係咁麻煩！你諗住自己有手有腳，就自然會出到黎架啦！」大傻說話的同時，我看見真的有兩隻手和兩隻腳，從它的蛋殼裏伸展出來！
「喂！我唔得喎，點解會咁架？」我嘗試想像自己有手有腳的模樣，但就是不能順利的使自己長出手腳來！
「唉，麻鬼煩！665號，你過黎幫手教佢，等佢學識伸D手手腳腳出黎！」大傻呼叫了另一隻雞蛋過來，讓它照顧著我。
只見它從殼裏伸出了四肢，慢慢的把我推到白色空間的角落位置。
「喂，大佬！輕手D呀！好暈呀頂你！」由於變了一隻雞蛋，被它推著的時候，我感到天旋地轉，差點要吐出來！
如果我真的會嘔吐，究竟會吐些甚麼出來呢？
我還真有點好奇，啊，不對，現在不是想這些的時候！
在這滾動的途中，我經過了其它雞蛋，還聽見了它們的對話！
「喂，你知唔知呀，651號同652號，聽講尋日又打交呀！」
「佢兩個不嬲都唔岩架啦，有幾出奇！」
「唉，呢兩日一開工就鬼死咁攰！」
「頂住啦，挨多陣就放長假架啦！」
「聽講有新人黎左喎！」
「果邊果隻係度轆緊嘅咪新人囉，連行都未識！」
聽到這些對話後，我發現其它的雞蛋，對現狀好像完全不認為有問題！
而且，這裏儼如一個小社區，有工作，有假放，會有人說是非！
天啊，這究竟是怎樣的一個地方啊？
經過了無數雞蛋，來到一個寂靜的墮落，轉動的感覺，總算停了下來！
「你你你你老味！暈到我呢！你係咪痴線架！」我說著眼前的665號說。
「你唔想引其它人過黎嘅話就唔好咁大聲！」665號對我說。
「你……你仲有意識？」我驚訝的道！
「細聲D，盡量唔好引起其它人注意！係，我仲有意識，而且，我仲知道你係邊個！」665號說！
「咩話？你點知我係邊個架？仲有，點解得你一個仲有意識架？其它雞蛋好似完全唔覺得有咩問題咁嘅？」雖然我心急如焚，但仍是遵照665號的說話，把聲線壓低！
「我知你有好多問題，我都好想逐一答你！但首先我都要教返你伸D手手腳腳出黎先，如果唔係會俾600號佢懷疑我無做野！你聽住，依家你嘅意識上，知道自己係一粒蛋黃，所以你會將你對雞蛋嘅認知，投放係呢個軀殼上面！就係咁樣阻礙左你伸展D手手腳腳！」665號對我說。
「吓？咁我真係見到同感覺到自己係一隻雞蛋喎，好難怪喎！」我說。
「我知，所以你要做嘅野係，想像一下，一隻有手有腳嘅雞蛋係點嘅樣！有無睇過蛋黃哥呀？」665號說。
「吓？有……有嘅！」我說，然後嘗試想像蛋黃哥的模樣！
然後，我感到自己的下半部份有些痕癢！
突然間，有一種強大的衝力，從我的體內向外推進，把我的蛋黃和蛋殼都穿破了！
一下子，我由半滾動的狀態站了起來，這種感覺很奇妙，像是重新學會站立的感覺！
「成……成功啦！」正當我感到興奮之際，那雙支撐著我的雙腳，像伸縮尺般彈回我的體內！
「咦？點解會咁架？死啦死啦，我個殼係咪穿左呀？我係咪會流蛋白而死架？」我驚慌的道。
「你冷靜D先！唔駛咁擔心，雖然我唔知原理係咩，但係我地個殼會有自動修復嘅功能！所以無論你點樣跌跌撞撞，都唔會有事！而你對腳之所以會收返埋，係因為你中斷左對有腳雞蛋嘅形象作出想像，令到雞蛋嘅固有形象取代左有腳嘅雞蛋！」665號解釋。
「吓？咁麻煩？咁我咪要Keep住諗有腳雞蛋係點嘅樣？」我說。
「咁又唔駛，你只要將雞蛋係有手有腳嘅形象，變成你其中一個深層諗法！咁你就可以隨時切換有手腳定無手腳！」665號解釋。
「哦！咁要D時間先得喎！不過呢個都唔係重點，我比較想知點解呢度咁多雞蛋，佢地究竟係點黎？點解佢地一D都唔覺得有問題？點解你又會好似無事，保持到意識咁嘅？仲有，點解你會知我係邊個？」我一口氣問了數個問題。
「唔駛咁心急，你嘅話應該仲有時間！應該由邊度開始講起呢？呀，要提醒你一樣野先，係呢度，你唔想惹麻煩嘅話！一定要記住，唔好嗌佢地做雞蛋，要嗌返佢地做人！或者你嗌佢地個編號都可以，編號嘅話，你只要想像要知道對方個名，就會顯示呢個編號出黎，你試下先！」665號對我說！
我聽他的說話，嘗試想像對方的名字，然後，在我眼前，確實出現了「665」這三個數字！
但是，在「665」這三個數字下，竟然出現了三個中文字！
「黃于強？」我不自覺的把三個中文字讀了出來。
「點解你會知我個名架？」665號驚訝的道！
「吓？我照你個方法去做，就見到你個編號，編號下面就係你個名啦！」我說，怎麼感覺他的名字這麼眼熟。
「無理由！無可能會咁！唔通……666號嘅你，真係有D唔同？」于強驚訝的說。
「咩呀？者係點呀？」我說。
「呢方面我都答你唔到！你頭先過黎呢個角落嘅時候，應該都留意到，呢度嘅所有人，都係無名嘅，互相稱呼嘅時候，都係用返號碼去叫對方！數字愈細，代表愈早黎到依度！除左未失去自我之前，講自己個名俾人知之外，應該無辨法知道究竟每個人叫咩名先岩！」于強解釋。
「咁……你話我係特別嘅，又係咩一回事？」我問。
「因為……你係666號，係呢個地方最後一個被吸入黎嘅人！」于強解釋著。
「最後一個？」我問。
「無錯，或者我都係由頭開始，將我所知道嘅野，全部話俾你知啦！」于強說。
──────────黃于強視角─────────
大約一個月前，我因為家庭的因素，獨自搬來了深水埗居住。
而那個時候，由於金錢非常緊拙，所以我幾乎跑遍了整個深水埗找居住的地方！
而在我幾乎放棄之際，我遇到了一個人，一個我不想再看到的人──王馬門！
王馬門在街上對我說，有一個非常便宜的單位！
當時，我已經沒有任何辨法，所以跟著他來到一個獨立套房。
我檢查了一下後，發現房間十分不錯，月租只需三千元，而且只需付出兩個月租金便可以！
對於當時的我來說，可是非常吸引的條件！
所以我沒有猶豫太多，馬上跟他簽約！
而王馬門刻意提醒了數次，租約只有一個規矩，就是一星期內，不得開啟冷氣機超過五天！
但夏日時份，還要在深水埗區，不開冷氣實在令人難以入睡，所以我每晚也開啟冷氣睡覺！
而奇怪的是，每天早上醒來，我也發現自己的皮膚上，出現了無數的白色小點！
後期更是遍佈四肢，但由於真的沒有多餘的資金，所以我也沒有去看醫生！
只是每天早上，花點時間清潔便好了！
而來到居住在這房間的第六天，由於天氣很熱，我早已把王馬門的說話拋諸腦後，照常的開啟冷氣睡覺！
而開啟冷氣的同時，我感到一陣強烈的睡意向我襲來，我瞬間失去了意識！
當我再次恢復意識時，我便來到這個白色的空間！
當時，我看見王馬門出現在我面前，我很快意識到他是這次事件的元凶！
「點解你要咁做？」我激動地說。
「你講咩呀？係你自己破壞左協議，我先將你帶黎呢度！」王馬門說。
「協議？咩協議呀？呢度係邊度黎？」我說。
「人類就係咁，自私自利，應承左嘅野永遠唔去做！協議係咩，我無必要再同你講，因為已經唔重要！重要嘅係，你要知道，你入左黎呢度，就唔駛旨意出返去！」王馬門說。
「痴線！你都痴線！你捉左我黎，我屋企人會幫我報警！你遲早會俾人拉！」我說。
「屋企人？算啦黃于強，你屋企人死晒呢樣野，至少我地係知嘅！如果唔係，我都唔會揀你去租呢個單位！而且，你身邊嘅朋友，如果有嘅話，都唔會再記得你嘅事！你放心留係呢度啦，呢個世界唔再需要你啦！雖然，呢個世界從來無需要過你，哈哈！」王馬門說。
「你個痴線佬！」我想衝前把他狠狠的教訓一頓，才發現自己動不了！不對，應該說，這個不是我熟悉的身體，這一刻，我才知道，原來我已變成了一顆雞蛋！
「哈哈哈哈，低能仔！想打我呀？你睇下自己變成點先啦！」王馬門恥笑著我。
究竟在我身上，發生了甚麼事？