[突發][唔係蛋黃哥]大撚鑊_我一起身發現變左做粒蛋黃: （十七）
和于珊分別後，我獨自一人回到深水埗。
說真的，已習慣夜間工作的我，雖然已是零晨三時，但仍然沒有任何睡意！
我真的不想在這麼清醒的狀態下回到那間房中！
所以我決定到便利店走一趟，就當是探阿祥班吧！
來到便利店附近，正想走近的時候，我發現正在當值的不是阿祥，而是最討厭的阿堅。
所以我便準備轉身離開，怎料阿堅注意到我，還開口對我說話！
「小明？」阿堅說。
怎說我也是一個受過教育的斯文人，只好轉身對他說。
「係我呀！點呀？」我不耐煩的說。
「阿祥又話你請假嘅？做咩返黎便利店？」阿堅問。
「我口渴，黎買野飲得唔得呀？」我說。
然後，他又沉默的看著我。
「想點呀你！次撚次都睥實我！」對著阿堅，不知為何總是無名火起。
「你記唔記得上次我想俾張卡片你，叫你有事就去搵一個人！」阿堅無視了我的說話。
「唔記得呀！」我說。
「你真係去搵一搵佢啦！我阿妹男朋友係失踪前，佢嘅氣色同你一模一樣！」他拿出一張卡片，要我拿著。
「痴線啦你，失咩......踪......呀......」我的說話聲音愈來愈少，因為我看見卡片上，竟然是拉婓爾，那個外國人的卡片！
「點解你會有佢嘅卡片？」我緊張的說。
「吓？你都識佢咩？」阿堅問。
「我係識佢呀，咁又點？」我說。
「咁你快D去搵佢幫手啦......如果唔係......我驚你會好似我阿妹咁！」阿堅說。
「你究竟想講咩呀？」我說。
「其實，一年前，我個妹同個男仔搬左出去住！果個男仔又係叫小明，印象中同你都有幾分相似！我原本都唔贊成佢搬出去到果個男仔住，但佢死都唔肯聽我講！我一世人得佢一個妹，唯有隻眼開隻眼閉啦！一開始佢地都開心，但有一日，我阿妹帶埋佢男朋友黎搵我，話佢男朋友身上發生左D怪事，當事佢嘅臉色，同你依家一模一樣！我當時只係以為佢男朋友身體差左先會咁，點止唔夠一星期，阿妹就話佢男朋友消失左！」阿堅說。
「咩話？消失左？」我緊張的問，腦內隱約的把他妹妹男朋友和我的情況連上。
「係！某一日，我妹妹沖完涼，出返房之後，佢就發現佢男朋友憑空消失左！我果陣只係以為個男仔係呃我妹嘅感情，我就同妹妹咁樣講！點知佢死都唔聽，仲話成日係果間房聽到佢男朋友把聲！我見佢精神愈來愈差，聽到佢男朋友把聲嘅情況愈黎愈嚴重，我就捉左佢去睇精神科醫生，逼佢食藥同住左醫院一個星期！有一晚，佢係醫院逃走左，原來......佢偷偷地返左佢以前住果間房！」說到這裏，阿堅忍不住流下淚來！
「你......你無事嘛？」我的態度也軟化下來。
「無，只係諗返起以前嘅野者！我妹妹佢，係去完果間房之後，就返左黎搵我！佢同我講，佢再聽唔到佢男朋友把聲！我當時好開心，覺得妹妹終於好返，我以為醫生真係幫到佢！點知佢同我講完再聽唔到佢男朋友把聲嘅時候，佢話佢男朋友真係從此消失左係世界上！佢話係我害死佢男朋友，之後，佢係我面前......跳左落樓！」阿堅雖然強忍著淚水，但從他顫抖的身軀，我知道他此刻的心情一定非常難過。
我很想對他說些甚麼，但卻想不到任何安慰他的說話！
我只是默默的看著他強忍著淚水！
「果次之後，我除左嬲自己，就更加嬲果個男仔！我認為係果個不負責任嘅男仔自己走左去，先會搞到妹妹出現幻覺，最後仲要自殺！之後我一路都好唔開心，然後見到你黎返工，我就將你當左係果個男仔嘅替身，將所有嘅怨恨投放左係你身上！直到最近，見到你嘅臉色，我就諗返起我妹妹嘅男朋友！」阿堅說。
「咁......又同呢張卡片個阿爾有咩關係呢？」我不解地問。
「其實......係我阿妹死左之後，我頹左好一段時間！而係果段時間，我除左不斷飲酒之外，仲求神問鬼！我好想可以親自同妹妹講聲對唔住，但可惜遇到嘅都係神棍！直到我遇到阿爾先生！我記得有一晚，我醉到暈左係街，醒返嘅時候，就發現自己係阿爾嘅辨公室入面！當時我完全唔知發生咩事，但係感覺到內心一片平靜，同埋......一種難以言喻嘅安心感，充滿著整個人！自從妹妹死左之後，我已經好耐都無呢個感覺！」阿堅解釋。
「咁佢同你講左D咩呀？」我問。
「佢講左好多野俾我知！應該話，佢講左好多難以置信嘅野俾我知！我記得，佢一開始講左好多只有我同妹妹先知道嘅秘密出黎！果一刻，我居然無任何奇怪嘅感覺，只係覺得，眼前呢個人，可能可以幫我實現到我嘅願望！我記得，佢有問我，想唔想知道係我妹妹同佢男朋友身上究竟發生左咩事！我當然立即點頭啦！」阿堅說。
「咁......佢地究竟發生左咩事？」我緊張的追問。
「阿爾同我講，成件事，係魔鬼所佈的一個局，佢地暗地裏去奪取人類嘅靈魂！而我妹妹嘅男朋友，就係被奪取嘅對象！」阿堅說。
「唔係咁神怪呀？」我口裏雖然這樣說，但心裏卻已有六七分相信這個說法！
「我當時都有同樣嘅諗法！但係，佢的確有能力講得出我同妹妹嘅秘密，所以我繼續聽佢講！佢講到，魔鬼雖然奪取佢地嘅靈魂，但佢地無強逼過任何人，只係以誓約方式去奪取人嘅靈魂！而妹妹嘅男朋友就係違反左誓約俾佢地奪去左靈魂，而靈魂被奪取後，只有好短嘅時間可以拯救佢地！而我強逼妹妹去醫院嘅期間......亦係佢男朋友徹底消失嘅時間！」阿堅說到這裏，又開始哽咽起來。
「你......唔關你事嘅！就算你無逼你細妹去醫院，佢男朋友一樣會消失！所以......唔好太責怪自己啦！」我安慰他說。
「多謝你，我無事！我果刻其實仲有少少懷疑，直到佢同我講，佢有辨法將我妹妹嘅靈魂召喚出黎，而的確，我亦都親眼見到，同埋親口同妹妹講左對唔住！果一刻，我就完全相信阿爾！」阿堅說。
「呢個人真係......太可惡，竟然知道發生左呢D事咁耐，都唔出手，見死不救！」聽完阿堅妹妹的個案，我更感到憤怒。
「算啦，佢都有佢嘅苦衷......只能夠講，仲未係時候！本來魔鬼嘅目標唔係我妹妹，而只係果個男仔！但妹妹睇唔開而自殺，導致佢嘅靈魂無辨法升上天堂！阿爾先生幫我妹妹從地獄拯救出黎，已經幫左我好多架啦！」阿堅說。
「我聽唔明你講咩天堂地獄，我只係知道，阿爾佢有能力而唔去幫我地！」我搖了搖頭說。
「唉......睇黎你都已經見過阿爾先生！咁我相信，我無野可以幫到你啦！希望你唔會有事！同埋......以前將你當係我妹妹嘅男友，好對唔住！」阿堅說。
「傻啦，我自己態度都唔好得去邊！不過，你早D講呀嘛，等我唔駛成日黑住口面咁同你講野！」我說。
「如果唔係見到你嘅臉色，呢件事我原本呢世都唔打算再提！點都好啦，希望你可以無事啦！」阿堅說。
「我一定無事！放心！哈欠，我都有D眼訓啦，返去先啦！聽日換班果陣見啦！」跟阿堅道別後，我便一個人回去了！
而我來到大廈前面，只見，有一位客人，已經在大廈門外等著我了！
我定睛一看，等待的不是別人，而是我的經紀，王馬門！