[突發][唔係蛋黃哥]大撚鑊_我一起身發現變左做粒蛋黃: （十六）
「坤叔，你師傅咁架？咁都唔肯幫手！」我說。
「我都估唔到佢會咁架！不過，佢真係好奇怪！好少佢會咁絕情！」坤叔說。
只見于珊下來後，呆呆的看著，我們臨離開前，阿爾給她的信封！
「于珊？算啦，唔好理佢啦！佢都話唔幫手，俾個信封你都唔方有用啦！」
「佢只係話依家幫唔到者……唔緊要啦！我地依家拎袋白色野去化驗先啦！我知道旺角有間化驗所，可以即日查到呢袋係咩黎！」于珊說。
「好！咁仲等咩呀？我地行啦！于珊麻煩你帶路！」我說。
「咁你兩個慢慢去啦，我走先啦！」坤叔說。
「吓？坤叔你唔黎幫手啦？」我說。
「幫乜鬼手者？我都話我幫你地唔到架啦！難得有日假，返去同老婆食飯好過！你地慢慢玩啦，唔好再搞我啦！」坤叔說完後，便急步離開了！
「唉……一個二個都唔肯幫手，睇黎我都係凶多吉少架啦！」我歎道。
「唔好灰心啦，我地依家出去旺角化驗左呢袋白色粉末先啦！話唔定有D咩得著呢！」于珊安慰我。
「都好嘅，唯有見步行步啦！」我說。
然後，于珊便帶我到了旺角這家化驗所！
「于珊，你又會識黎呢度嘅？」我好奇的問。
「我有朋友係倫敦讀完書，返左黎香港做野，呢間化驗所就係佢開架啦！」于珊邊解釋邊進入化驗所！
「Hi，Sharon，I miss you so much！」化驗所裏，一名身穿白袍的俏麗女子上前擁抱著于珊！
「係呀，好耐無見啦，Vicki！你係香港呢邊做野，習慣嘛？」于珊也熱情的回應她。
「No，Hong Kong is crazy！I miss my student life in London！Oh，is he your boyfriend？」Vicki說。
「佢？唔係呀，新識嘅朋友，佢叫小明呀！」于珊介紹著。
看著于珊介紹我，我很想作出回應！
卻尷尷尬尬的，不知道應該用英文還是中文和她說話？
我懂得的英文除了「Fuck」之外，就係「I go to school by bus」！
但這兩句看來也不適用於這個場合！
幸好，Vicki對我說話，打破了這尷尬的局面！
「Oh，小明！我有聽過你D歌架！小明上廣州嘛！Nice to meet you！我識講同識聽中文架，你鍾意用中文或者英文同我溝通都得！」她熱情的捉著我的手，外國長大的就是比較熱情！
「哈……哈哈！你好呀，Vic……Vicky！但我諗你搞錯左啦，小明上廣州唔係我唱架，唱果個係李家仁醫生黎！」我總算說得出話來！
「Oh，I am so sorry！我仲以為係你唱添！」Vicky熱情的說，絲毫感覺不到她有半點尷尬！
「係啦，Vicky，之後再同你聚舊！有D野想你幫手！」于珊說。
「呀，係喎，我收到你Whatsapp！咁你地跟我入黎啦，我馬上幫你檢驗，應該好快有結果架啦！」Vicky引領著我們進入到化驗室內！
只見化驗室內充滿著不同的儀器，而這些儀器，都在一道厚重的鐵門後！
「你地要化驗嘅野係邊呀？」Vicky問。
「係呢度！」我拿出那個真空保鮮袋。
「好，我想問你地係邊度發現，知唔知係點出現架？」Vicky問。
「其實……呢D白色野，係我身上面出現架！一開始得手臂上面有，只有好少好少，大慨得十粒八粒！但過左幾日，我發現愈黎愈多，今朝仲係四肢都有！」我說。
「嗯……可能係皮膚組織異變或者一D疾病嘅組織！」當Vicky拿起那個透明保鮮袋時，剛剛的熱情全都消失了，取而代之便是一副專業的模樣，教人不期然感到可信任她！
「你地坐下先，化驗室入面只有我可以入去！因為要消毒並保證無其它污染物，所以你地唔可以入去！但化驗結果可能要等三至四日！」Vicky仍然緊盯著這個保鮮袋，像是充滿好奇，又像是受到挑戰似的。
「三至四日？」我驚道。
「做咩？有問題？」Vicky問。
「Vicky，其實係咁嘅！因為我地發生左D事，要盡快處理！你可唔可以幫幫手，盡快出結果？」于珊問。
「發生左D事？」Vicky帶點懷疑的問。
「係，件事唔係三言兩語答到你！不過，係同我細佬有關！」于珊解釋。
「你細佬？OK，我今晚幫搞，但再快都好，都要視乎我用嘅Test要幾多時間！如果個Test本身要兩日先出到結果，咁我都無辨法再快架啦！」Vicky解釋著。
「多謝你呀Vicky！」于珊擁抱著Vicky。
「得啦！總之，我會將所有可能嘅Test都做一次！但會同時處理，你祈禱中間會有D測試係成功架啦，咁就唔駛等好耐！咁我一有消息就通知你地啦！」Vicky說。
然後，我和于珊便離開了化驗所。
「睇黎你都好信你朋友喎？」我問于珊。
「係呀！我同佢係大學果陣識嘅，佢幫過我好多次！所以一講起化驗嘅話，我就會諗起佢！」于珊回憶著，臉上露出微笑。
「原來係咁……」我被她笑容吸引著，一下子看得著迷。
「小明！小明！你做咩呆左呀？」于珊在我眼前揮了揮手，把我的意召喚回來。
「哦，無！諗緊野者！」我說。
「你真係好似我細佬，成日會無啦啦發呆！」于珊小聲說。
「吓？」我有點聽不太清楚。
「我話，叫你唔好再諗啦！船到橋頭自然直，況且有咩事嘅話，仲有阿爾會幫我地！」于珊說。
「你仲好提佢？賤格得佢呢，明明知道D野，又唔講又唔幫，算係點！我先唔會靠佢，我會靠自己！」我實在不太喜歡那個阿爾！
「算啦算啦！我又肚餓啦，我好耐無返黎香港，不如我地去掃街囉！」于珊提議。
「呀，都好，反正都唔知仲有幾日命，一於去掃飽佢！」說完後，我感到後腦被狠狠的拍了一下。
「亂講野！我唔會俾你有事！唔好再亂諗啦，去食野啦！等姐姐請你食餐勁嘅！」于珊把我拉走，使我暫時忘卻了那些詭異的事情！
我們沿著女人街那邊，邊走邊吃！
說真的，旺角的小吃真的愈來愈差，而且亦愈來愈貴！
一串魚蛋十九幾蚊，一杯薯條廿幾三十蚊！
要不是于珊堅持要吃，我已把她拖離這個已經腐爛的旺角街頭了！
「哇，好飽呀！」于珊掩著她的肚子說。
「梗係飽啦！你食左燒賣，魚蛋，手卷，炸雞，炸大腸，煎......」我還未把話說完，于珊便尖叫著。
「小明你睇！係砵仔糕呀！我好耐無食過啦！你食唔食呀？唔理啦，老闆，兩紅兩白呀！」于珊興奮的說。
「你又話飽嘅？」我滴著汗說。
「呢D係甜品！裝甜品係用另一個胃架！」她笑著說，並用迅雷不及掩耳的速度把一個紅豆砵仔糕塞進嘴裏。
女人......真是太可怕了！
十九歲的我，總算第一次認識到女人這種生物，戰鬥力絕對比男人要高得多！
「我投降啦！」我實在吃不下了！
「咁渣架你，我幫你食埋佢啦！」她一口把我手上的砵仔糕塞進口中，我輸了！
結果，我們不知道在旺角逛了多久，于珊終於滿足了！
「真係開心！好耐無試過咁開心啦！」于珊說。
「我就飽到笑唔出啦！」我捧著自己的肚子說。
「嗱，係咪食飽無咁易亂諗野呢！」于珊笑說。
經她這麼一說，我還真的完全忘記了那些事情！
「多謝你！」我由衷的說。
「傻嘅！我多謝你幫我搵細佬就真啦！總之唔好諗咁多啦！我相信會無事嘅！」于珊說。
無錯，應該會沒有事的！
然後，我把于珊送回她的酒店後，便獨自回到深水埗了！
想不到這一別，竟然令我差點再也見不到她！