[突發][唔係蛋黃哥]大撚鑊_我一起身發現變左做粒蛋黃: （七）
七點了，我如常的跟阿堅交接工作。
這小子不知道怎麼回事，這次又是靜靜的看著我，我實在忍不住了。
「屌你，望乜撚野呀你！有唔妥就開拖，咪撚睥住晒！」我有點動氣的說。
只見他仍然沒有說話，嘴唇微動，感覺像是有甚麼想說卻不願說明似的。
「屌你，成個女人咁！咪撚再望住我呀，打柒你架！」我說。
「你......最近係咪遇到D咩怪事？」正當我不想再理會他時，阿堅竟開口我搭話！但......怎麼最近每個人看到我，也是問我有沒有預到甚麼怪事！
「無呀屌你！你係咪傻撚左呀，無啦啦關心我？痴左線呀？」他愈是這樣對我，我愈是感覺不太舒服！
「唉，咁算啦！如果你真係遇到D咩問題，又真係解決唔到，你去搵佢啦！」阿堅把一張卡片遞給我。
「痴線！都唔知你講乜，我好人好者唔駛要你D咩卡片！」我沒有接下那張卡片，因為實在想不到接受不到他態度上的轉變。
正好，昨晚那位女士，正慢慢的走向便利店，這樣我正好有離開這裏的理由！
我轉身走向那位女士，留下阿堅傻傻的拿著卡片，在店裏呆看著我的離去。
「喂，我收工啦！」我向她揮了揮手。
「唔好意思，訓醒要D時間梳洗，所以遲左少少！係呢，你未食野架啦，不如我請你食早餐！食完早餐我地先去你屋企拎返張卡片，當係多謝你啦！」她說。
「好，無問題！附近有間茶餐廳幾好食，我帶你去啦！呀，係喎，傾左咁耐，都未知你叫咩名添？我叫陳小明，你叫我小明得架啦！」我鼓起勇氣問她的名字。
「小明？上廣州果個小明？」她看來有點想笑又不敢笑的樣子，挺吸引人的。
「唔係，係跑得快過火車嘅小明！」我認真地道，她也不禁莞爾一笑，看來她也是一個十足的絲打吧！
「哈哈，唔好意思，我忍唔住！我叫黃于珊，你叫我于珊，或者叫我做Sharon都得！」她說。
「黃雨傘？你個名好危險，返大陸小心D！隨時俾人拉！」我說。
「我唔係叫黃雨傘，係黃于珊！同埋我都唔返大陸嘅，又污糟又多假野，萬一係上面食左D假野死左都唔知點算！我住係倫敦果邊架嘛，有一次，隔離屋買左D大陸野食，食完成家入晒醫院洗胃！原來佢地食果D牛肉唔係肉，菜唔係菜黎，好恐怖！所以我呢世都唔會返去！」于珊說。
「哦，唔返都好嘅，陣間俾你入境，唔俾你走就仲大鑊！大陸最鍾意亂咁黎，話你犯事就犯事，唔去最好！不過，原來你係英國返黎架？咁你依家住係邊架？」我問。
「我依家係旺角租左酒店，原本諗住黎一個星期左右就返去倫敦！所以我搵緊D平價嘅地方住！」
說著說著，我們便來到茶餐廳，買了早餐，回到我那細得可憐的房間裏。
「係，入黎坐啦！呢度比較細，唔好介意！」我拿出整個房間唯一的椅子給于珊。
「唔該晒，原來我細佬之前一路都住呢度！唉，點解佢唔同我地講，我地可以係香港買個單位俾佢架嘛！」她略帶憂鬱地說。
「係喎，點解唔係茶餐廳度食埋先上黎？其實都唔差得幾多時間者！」我也不懂如何安慰她，只好轉換話題。
「其實我想同你傾下呢排發生嘅怪事，但你知啦，始終我地講果D野都係神神化化咁，陣間俾人以為我地係傻嘅就唔好啦！同埋，我硬係覺得有D咩人或者力量控制住，先會有咁多事發生！」她說。
「你指......成件事係有人搞出黎？」我驚訝的道。
「老實講，我都唔知道。我只係透過網絡同係呢區嘅搜查，勉強得出呢個結論！你可能唔知道，每一個失踪嘅人，佢嘅屋企人都會隨之而消失，好似呢一家人從來都唔存在咁！所以到今時今日，都未有咩新聞媒體，或者警察去做野！」她說。
「我都有睇過下D留言，但咁樣一D都唔合理喎！就算真係成家人消失晒，都無理由完全無人知者！佢地應該都有返工有返學，有自己朋友，點都有人留意到卦！同埋，你話你細佬失踪左，但你依家咪又係無事坐係度同我傾計！」我把心中的疑問說了出來。
「你講嘅我都有諗過，但其實都未必無可能！第一，香港人成日諗住搵食，難聽D講，影響唔到佢搵食嘅，死人冧樓都唔關佢地事，身邊有人失踪可能講兩三日已經無人提！第二，我當真係有人報警，有幾多差人真係會認真處理先得架，你諗下，康橋之家事件又好，七警事件又好，D衰野多到數唔晒，除非你係親中人士或者政府高官啦，如果唔係，小市民報警，備完案，咪又係不了了之！第三，我唔知其他失踪嘅人係點，但我細佬係屬於好內向嘅人，同埋都無乜朋友可言！如果其他失踪者都係咁，咁就更有可能到依家都無搞大件事！同埋呢期咁多打壓異見嘅新聞，果D報紙傳媒邊會理呢D濕碎野！」她說。
她這樣說也不無道理，在今時今日的香港，會發生這種事情也不是沒有可能！
「但係，最少你都無事呀，咁都無辨法證明呢件事係好似你咁講，有D力量或人物控制緊架？」我就像一個政客般，在她的說話裏挑出她的毛病。
「唉！估唔到你同其它港豬都一樣，懶係要真憑實據，企係道德高地咁講野！如果我失踪埋，你估仲有無人同你講呢D事？依家就係唔知道事實係點，先諗住搵出真相！如果你係唔信，或者心目中已經係有一個答案，咁無論我講咩，你都唔會信，咁我再同你講都無咩意思！」她明顯帶點不肖地說。
真的是這樣嗎？我真的和其它港豬沒有分別嗎？
我承認，在父母離去後，我為了生活，為了生存，我的確是自私了一點！
但我有錯嗎？我又沒有害人，又沒有做甚麼錯事！
我只是對不公的事情隻眼開雙眼閉罷了，很多人都是這樣吧！
我只是沒有表達出自己的感受罷了，很多人都是這樣吧！
我只是不想其它東西影響到我罷了，很多人都是這樣吧！
我只是不想浪費時間做些沒有用的事情罷了，很多人都是這樣吧！
我只是......我只是......其實我是明白的，我明白自己為甚麼要這樣質疑于珊！
我只是不希望她把事情弄大，不希望她再作一些「無謂」的調查，不希望她的說話影響到我！
我心底裏還是明白，她說的可能性，是合理的！
我真的被這社會同化了嗎？
曾幾何時，我也是敢作敢言的，但不斷的妥協，不斷的將就，慢慢的，原來我已和一般港豬無異！
「對唔住！」我真心的對于珊說，亦是對自己封閉已久的良心說。
「吓？」于珊驚訝的說。
「我為自己嘅無知同白痴而道歉！我都估唔到自己原來已經變到同港豬一模一樣，我為自己感到羞恥！」我真誠的道。
「唔好咁啦，做豬定做人其實係你自己嘅選擇黎，我無權干涉嘅！不過，你肯做返人，我都會好開心！始終，你係唯一一個，依家可以俾到我線索，同埋可以同我一齊查落去嘅人！」于珊說，看來她已經沒有再鄙視我了，果然有文化的人就是不同。
「我地故且肯定有某種力量在背後吧！但......我地應該點樣去查呢？如果呢種力量真係咁勁，可以令到D人消失嘅話，應該唔係我地可以對付！」我愈說愈感到不安！
「無錯，我好認同要對抗呢種力量係好困難！但係，最少我地有掙扎過！我唔想放棄，直到最後，我都要抗爭到底！而且，對你黎講都應該係一樣，話晒你住緊呢度，都係我細佬住過嘅地方，你好可能會成為下一個目標！」她分析著說。
「你講得岩！如果係唔係都要死，我寧願掙扎過，起碼對得住自己良心！咁......我地應該點樣做？」我認真的說。
「我地應該......食埋個早餐先！」她說，然後聽到她肚子傳來「咕咕」的響聲。
「哈哈，係嘅，我地食野先啦！」我說。
早餐後，希望能找到點線索吧！
既是為了她的弟弟，亦是為了我自己！