［人性/有甜］- 屍•家•馬鞍山（隔日更新）: Chapter 702 - Marcus 病毒論

「由於當時太緊張、時間又緊迫、我哋又專住喺𨋢頂個制上面...」他有點自責地說道，「我哋竟然冇留意到，有雜物攝住喺𨋢門個軌道上面，令到道門冇辦法閂埋而再次彈開...」

「當 Nelson 再發現嘅時候，隻怪物已經喺𨋢門口...」

「Nelson 可能見冇路走，就即刻衝出部𨋢準備突圍...」他深呼吸了一下後說，「不過，就只係換嚟一聲慘叫同撕裂聲...」

「我完全唔敢幫手，甚至連頭都唔敢伸落去睇。」他猶有餘悸地說著，「而最戲劇性嘅係，道𨋢門竟然係呢個時候，閂得埋...」

「諗到隻怪物就係我腳下面，我當時完全唔敢郁半步，由得道逃生門打開，甚至連呼吸都唔敢咁大聲...」



「而我就係咁，將隻怪物重新帶到研究所入面嘅同事身邊...」他抱頭說著，「落到地牢，部𨋢門一打開，隻怪物就大叫住咁衝咗出去...」

「而我... 竟然嚇到腳都軟埋，一下企唔穩就由𨋢頂跌咗落嚟...」

「我當時都唔顧得痛，只係怕比隻怪物發現，所以即刻衝咗出𨋢，諗住搵個地方匿埋再算...」

「我試過打開一道又一道嘅門，但係完全冇反應...」他說道，「呢個時候我先知道，應該有同事啟動咗個緊急狀態模式，所以令到所有門都鎖住晒...」

「而喺呢個狀態下，我哋係冇辦法打開絕大部分嘅門。更加冇辦法，再㩒返部𨋢落嚟...」



「我即刻走返去部𨋢度，希望仲可以㩒返開道門...」

「可惜，一切已經太遲...」

「我冇辦法，只好試吓入唔入倒去避難室...」他無奈地說道，「不過好彩，今次道門可以打得開...」

「我諗都唔諗，即刻衝入去匿埋...」Marcus 說著仍帶有一點恐慌，「啱啱入去嗰陣，我都比困喺度嘅喪屍嚇親，但當我冷靜落嚟，就諗倒可以嘗試利用一吓佢哋...」

「我就喪屍一般都唔會互相攻擊嘅特性，諗住放咁啲喪屍出嚟做掩護...」他自信地說道，「始終阿 Chris 絕對有可能會入倒嚟，我一定要以防萬一。」



雖然他說的某程度上是正確，但我知道，有些怪物如人猿怪，還是會主動去攻擊喪屍同類的。

難道...

它們根本就不是同類嗎？

待會還是請教他一下。

「當然，我一定要好小心...」他續說，「我 make sure 入去呢度嘅門無問題之後，就喺個櫃入面攞咗閘門個電子搖控出嚟，打個其中一道閘門...」

「啲喪屍一見道門開咗，就發咗癲咁衝埋我度...」他冷笑了一下後說道，「好彩... 今次我冇再腳軟，成功喺佢哋埋嚟之前走咗入嚟...」

「呢度雖然睇落似雜物房，但係都有齊食物、水同日用品，仲有洗手間咁...」他環視著四周說道，「我仲喺其中一個箱入面，搵倒呢枝嘢添！」

「不過，枝槍係冇子彈嘅...」他拿著手上的槍注視著說，「我之前緊張得滯，唔小心打開咗個退彈制，發現彈匣入面係空嘅...」



「唉... 所以連了結自己嘅機會都冇...」他感嘆地說道。

「你又唔洗咁灰嘅，我深信我哋一定可以出返去...」我稍稍安慰他一下，「不過我想請教少少嘢，我之前見過一隻貌似人猿嘅怪物，主動咁襲擊啲喪屍...」

「照你頭先咁講，唔通啲人猿怪物同啲喪屍唔算係同類？」我問道。

「唔... 其實我哋之前都有研究過呢個問題...」Marcus 認真地答道，「不過我哋收集返嚟嘅樣本，大部分都係嚟自第一、二代病毒，對後代病毒演化嘅數據唔多，所以我哋都未有結論...」

「但係從我哋推演出嚟嘅資料顯示，後代嘅病毒唔單止更有攻擊性，而且仲有強烈取代同消滅上一代嘅傾向...」他用心解釋道。

「咁即係啲病毒會自相殘殺？」我問。

「唔... 我哋就咁睇...」他想了一下後答道，「呢個係一個生物演化嘅過程，目的係令比較強嘅基因留低同再進化，將弱嘅基因淘汰。」



「咁樣做，就可以令病毒變得越嚟越強，越嚟越適應倒周圍嘅環境...」

「由此推論，你見倒高等級啲嘅所謂人猿怪，主動去攻擊較低等級嘅喪屍，完全係正常嘅行為嚟嘅...」Marcus 自信地分析道，「就好似喺呢個亂世咁，有力量嘅人都會支配其他人嘅生活一樣...」

他的話，真的很有道理...

「照你咁講，受到高等級病毒感染嘅人，又會唔會強到，可以控制倒低等級啲喪屍？」我想印證一下我的想法。