［人性/有甜］- 屍•家•馬鞍山（隔日更新）: Chapter 701 - 挑戰死神
「我哋喺地下同一樓收集咗一啲旁身武器，就膽粗粗咁出發...」Marcus 續說。
「我哋打算兵分兩路，一批人先落去打頭陣，如果冇問題先比部𨋢返番上嚟，比第二批人落去支援...」
「我哋簡單咁抽籤分開咗兩組...」他有點感慨地說道，「唉... 唔知好彩定唔好彩，我、阿華、陳博士同 Nelson 四個人抽倒第二批出發...」
「我哋都好緊張，臨行動之前仲不斷復習大家要做嘅事，以免有乜嘢差池...」他補充道，「我哋再三確認，先至正式出發...」
「第一組出發之後，我哋都非常緊張，手裡面揸到啲武器好實，每一秒都好似過咗成年咁...」
我完全感受得到，他內心的恐懼...
「然後又唔知等咗幾耐，部𨋢就 “叮” 一聲咁，突然出現咗喺我哋面前...」Marcus 的面色又開始變得凝重，「但係... 但係我哋都反應唔切，一個高大嘅身影就出現喺我哋面前...」
「直覺話俾我知，我要即刻逃走...」他繼續說道，「於是我望都唔望，掉頭就搏命咁走...」
「我一直咁走，直至走到一樓樓梯口...」他說得有點激動，「但當我望返轉頭嘅時候，就只係見倒阿華同 Nelson 兩個。而陳博士，已經不知所蹤...」
「但係當時嘅情況唔容許我哋傷心，我哋只好即刻閂埋道門，搬啲雜物嚟頂住...」
「可能係我哋好彩，隻怪物之後都冇再追上嚟...」
「不過...」Marcus 的聲線又再變得沉重，「再過咗一陣，我哋個老問題又再出現...」
「肚餓，我哋都勉強都可以忍倒；但係口渴，真係好難捱。」
「我哋匿埋咗一段時間，最終都係忍唔住，要再次向死神挑戰...」
「就上次嘅悲慘經歷，我哋今次就真係從長計議... 甚至已經準備埋，一旦行動失敗嘅方案...」
「由於樓梯通道已經塞住咗，所以我哋只可以用部𨋢落返下面...」
「我哋嘅計劃係，直接用部𨋢搭落地牢...」Marcus 道出他們的計劃，「我哋諗住拍咭確認去地牢之後，就上去將𨋢頂嘅制扭返去 “Normal” 嗰格...」
「我哋諗，咁樣就可以將部𨋢鎖定，等阿 Chris 唔會落倒地牢...」
「其實你哋每一次都要上機頂去扭制，咪好唔方便囉？」我感到有點奇怪。
「其實，部𨋢係可以喺控制室控制嘅...」他回應道，「但係，我哋呢度就淨係得阿 Chris 同陳博士有控制嘅權限...」
「咁照你咁講，你哋應該可以安全落返去地牢啦？」我追問道。
「唉... 理論上係...」Marcus 嘆息地說道，「但係部𨋢一直停喺地下冇郁過，我哋都擔心阿 Chris 會唔會匿咗喺部𨋢度...」
「所以，我哋當初先會諗咗咁耐...」Marcus 說得有點無奈，「但係呢個係落地牢嘅唯一方法，所以都只可以搏一舖...」
「不過... 唉...」他的眼神頓時泛著淚光。
我立刻聯想到，那些擱在一樓的殘肢...
「我哋依計劃去㩒𨋢...」Marcus 續說，「跟據之前嘅慘痛經歷，我哋㩒完𨋢就即刻匿埋...」
「部𨋢上倒一樓，然後𨋢門打開...」他說得有點不安，「但係我哋最唔想見到嘅嘢，始終都出現咗喺我哋嘅面前...」
「怪物 Chris 慢慢咁行過嚟，我哋就即刻掉頭走...」
「不過一樓已經冇其他嘅路可以走，我哋一直比佢迫到去死角，無路可走...」
「而怪物步步進逼，我哋只好決定突圍...」
「我瞇埋眼一直向前衝，走咗一段路先至敢望返轉頭...」他眼神帶點驚惶，「但係... 但係阿華就冇咁好彩...」
「佢... 攔腰比怪物 Chris 嘅利爪插住，然後...」他好像說不下去，「然後用另一隻利爪批甩咗個頭，再一塊又一塊咁分屍...」
「我見倒即刻想走，但係我實在太驚，完全冇辦法企倒起身...」他說着有點尷尬。
我完全可以理解他的感受，回想當初我第一次看到這樣的情況，我也是嚇得完全無法動彈。
「一直至 Nelson 走過嚟扶起我，我先可以走得倒...」他補充。
「我哋發晒狂咁，向住部𨋢嘅方向走。但係呢個原本唔遠嘅距離，我哋走起上嚟就好似走咗好耐咁...」
「Nelson 同我亦終於都走倒部𨋢入面，而我哋就跟當初嘅計劃一樣，由我拍完咭，㩒咗閂門制之後，Nelson 就幫我爬上𨋢頂，準備扭返個制。」
「呢個動作必須喺部𨋢離開一樓前完成，如果唔係，安全裝置就會啟動，令個制跳返去 “Special” 個位置...」
「但係...」他慨嘆地說道，「就因為我哋淨係專住喺呢個位上面，而忽略咗最重要嘅嘢...」