［人性/有甜］- 屍•家•馬鞍山（隔日更新）: Chapter 700 - 掙扎求存的研究員
「其他人即刻發咗狂咁衝去部𨋢度，諗住離開呢度避一避...」Marcus 向我們說道。
「但當我哋諗住推門走嗰陣，先至發現大門開唔倒，冇辦法出去...」
「不過亦因為咁，我哋先至逃過一劫... 因為我哋嘅聲浪引咗一大班喪屍嘅注意，即刻衝過嚟猛撞我哋道大門...」
「嗰刻我哋先至親眼睇倒外面嘅嚴重性...」Marcus 猶有餘悸地說道，「喪屍事件發生之後，我哋一直都被困喺地底下面...」
「見倒啲都係綁手綁腳嘅喪屍，完全冇眼前見到咁震撼...」
聽到這裏，我也不得不佩服 KK 團隊的能力。他們竟然可以制服，甚至在滿街怪物的情況下把喪屍帶到這裡，真的一點都不簡單。
「嘩！佢都好犀利吓啫！」我想去打探一下，「佢哋係用咩方法去制服啲喪屍嘅呢？」
Marcus 沒有立刻回應...
「講起嚟，我都覺得有啲奇怪...」他回想著說，「我記得佢每一次帶啲喪屍入嚟嗰陣，啲喪屍都係比較靜態...」
「甚至，連見到我哋呢啲獵物都冇乜太大嘅反應...」
「我有理由相信，佢係有控制喪屍嘅能力...」他補充。
控制喪屍？
這不是異生教神使特有的能力嗎？
難道，他作為神使，同時也替這幫人服務嗎？
怪不得，在下水道怪物的身上，能夠找到異生教的線索。
「後生仔，你係咪諗倒啲嘢呀？」Marcus 看我想得入神，雙眼直看著我問道。
「冇... 我諗唔明咩原因啫。」我答道。
「係... 不過我有意無意中發現倒，KK 手上有一隻好奇特嘅介指。」Marcus 憶述道，「佢隻介指上面，有一個好似紅色眼嘅圖案...」
「直覺話我知，佢隻介指係控制怪物嘅關鍵...」他說出自己的推論，「因為我喺 KK 唔洗帶 “樣本” 嘅日子見過佢，但係佢手上介指嘅圖案，係白色嘅...」
那個 KK，果然是異生教的神使。
難道，他潛伏這裡是為了搶奪 Marcus 他們的成果嗎？
「咁之後呢？你哋就咁死守喺健康院入面？」我想改變一下話題。
「唉... 既然唔可以離開呢度，我哋唯有阻止啲喪屍攻入嚟...」他回答道，「我哋推啲雜物擋住個門口，希望可以頂得住...」
「不過當時嘅環境有啲奇怪，好多雜物就放咗喺大門口附近...」他說道，「佢哋原本應該係比人放喺度，頂住道門嘅...」
「啲雜物嘅情況，就正正話比我知，呢度有其他人嚟過又走咗...」
「會唔會係 KK 班人做㗎？」我知道那情況，很大機會是由我們做成，但我亦希望試探他一下。
「我都曾經有諗過...」看來他也有此懷疑，「但係部𨋢係我哋唯一出入嘅途經，佢根本唔洗多此一舉搬啲雜物放喺門口...」
「更何況，佢哋唔係一直死守喺呢度，所以根本冇需要用雜物阻止啲怪物入嚟。而佢哋每一次出去，又要再重新將佢哋搬走，所以佢哋咁做嘅可能性近乎係零...」
果然，無法輕易地引導他。
「相反，呢度一定曾經有人想死守喺度，先至會有咁樣嘅佈置...」他補充，「但係又由於一啲原因，放棄防守而離開咗...」
「不過你頭先唔係話大門開唔倒㗎咩？咁 KK 又係點樣樣出入㗎？」我感到有點奇怪。
「嘿嘿！原本我都有啲諗唔明...」他冷笑道，「不過當我哋上到去一樓搬雜物，見倒一隻打爛咗嘅窗之後，我就明白佢點出入呢度...」
原來，那隻破窗是由 KK 做成。
可令我想不明白的是，既然他已經擁有操控喪屍的能力，那為何還要多此一舉，另闢通道去離開呢？
除非，他也不能時常去運用這一個能力。
「不過最好笑嘅係，我哋搬晒啲雜物、塞好晒啲出入口之後，先至發現健康院裏面，可用嘅食物同物資唔多...」Marcus 續說。
「而我哋當初儲備咗嘅糧食同日用品，全部都仲擺喺，地底研究所個避難室入面...」
「所以我哋雖然可以頂住啲喪屍，但就頂唔到生理上嘅需要...」
「冇食物、冇水... 每一個鐘都好似過咗好耐咁...」
「結果，我哋捱過咗大半日...」他無奈地說道，「都要面對返個現實，準備搭𨋢落返去地牢...」