［人性/有甜］- 屍•家•馬鞍山（隔日更新）: Chapter 699 - 變異的 Chris

「你嘅意思係，啲病毒識得自己進化？」我追問道。

「唔... 我唔反對呢個諗法...」Marcus 認真的想了一下後答道，「但係以我哋嘅研究指出，當中可能加上咗唔少嘅人為因素...」

「你嘅意思係，有人刻意去令啲病毒進化？」我問道。

「我只可以講，有咁嘅可能性...」Marcus 回應道，「不過，我哋仲未有足夠嘅數據，去印證呢個說法。」

「我哋只係發現倒一啲病毒樣本中，有一啲唔尋常嘅變異...」



Marcus 這樣說，豈不是說明了這實驗室存在的目的？

但是，他們又如何安全地捕獲新的喪屍去支持這裡的研究？

「照你咁講，你哋即係喺喪屍事件爆發後，仲一直有收集新嘅樣本？」我想確認一下，以印證自己的想法。

「嘿嘿...」他再次以奇特的眼神看著我，「好！既然你咁問，我都唔怕話你知...」

「冇錯，我哋係有一支僱傭兵，去幫我哋 “收集樣本” 嘅...」他刻意強調某些字句，「不過，佢哋實際有幾多人，一直都係一個迷...」



「佢哋每一次交收，都係三至四個人出現，用手推車推住幾個已經五花大綁嘅 “樣本” 入嚟...」

「而奇怪嘅係，佢哋每次交收嘅人都唔太一樣...」他補充，「除咗帶頭嗰個鬍鬚佬之外，其他人都好似唔同樣咁...」

「鬍鬚佬」？我立刻想起 KK 那個賤人。

但他不是異生教的人嗎？為何又跟這裡扯上關係？

「個鬍鬚佬係咪叫 KK？」於是我大膽的問道。



「吓？你竟然識得佢？」Marcus 驚訝地問道，「唔通... 你都係佢嘅人？」

我本打算謊稱是跟他同伙，以套取更多的情報。但就 Marcus 的眼神看來，他好像對 KK 有點戒心。

「唔好講呢個人喇！」我打算以此作為試探，「我差啲比佢害死呀！」

「哦？睇嚟你都中過佢招喎～」他答道。

看來，我找對了路...

「唔好提喇！」我腦怒地答道，「比我再見倒佢，實打佢一鑊金！」

「好！幫我打埋一份！」Marcus 亦看似十分憤怒，「如果唔係呢條友偷走咗啲抗體同病毒，我哋都唔洗攪成咁！」

「吓？佢偷咗啲病毒同抗體？」我回想過去，完全沒有在 KK 哥身上，發現任何相關物品的線索。



「係！佢襯我哋一時鬆懈，竟然殺咗我哋兩個同事，搶走咗我哋啲病毒同抗體...」Marcus 繼續說道，「阿 Chris 知道呢個情況，就即刻衝埋入𨋢諗住搶返啲病毒...」

「之後過咗一陣都冇消息，我哋就大膽咁㩒返部𨋢落嚟，先至見倒阿 Chris 原來比人喺心口附近打咗一槍...」他不忿地說道，「而 KK 個賤人就走甩咗...」

「雖然阿 Chris 冇即時死亡，但係都因為失血太多，已經奄奄一息，就快支持唔住。不過佢仲係一直咁叫我哋，一定要搶返啲抗體返嚟...」

「咁我哋都冇乜辦法，只可以將佢送去醫療室包紥...」他若有所思地說道，「不過由於個傷口太深，我哋都冇辦法幫倒佢止血...」

「佢知自己命不久矣，就同我哋講話想自己一個人靜靜哋，我哋就無奈比佢一個留喺醫療室入面。」

「但係當時嘅我哋唔知道，呢個係一個不可逆轉嘅致命錯誤...」

我留心傾聽，這些令我更了解病毒的資訊。



「佢發生咗異變？」我想，事情一般都是這樣發展，才使情況走到這個地步。

「呃... 你都算估啱咗少少...」他看著我說，「不過，最主要原因，係佢襯自己一個嘅時候，同自己打咗枝病毒針...」

「吓？乜佢身上有病毒針，你哋喺救佢嗰陣時冇發現倒㗎咩？」我質疑道。

「我承認我哋係有啲疏忽...」他主動承認自己的過錯，「不過喺當時嘅情況，我哋大家都估唔倒，Chris 身上竟然收埋咗一枝病毒針...」

「我哋唔知道，佢枝針係喺邊度攞返嚟...」他説道，「可能係同 KK 糾纏中留低咗，又或者 Chris 佢一早收埋咗...」

「不過點都好，個真相已經冇人會知...」他補充，「我哋再見倒佢嘅時候，佢已經變成咗一頭怪物...」

「當時我哋全部研究人員，都喺中央控制室入面傾緊應對方法...」他憶述道，「突然之間大門打開，變成咗怪物嘅 Chris 就即刻向我哋攻擊...」

「我哋一時間都反應唔切，有個同事就喺我哋面前，比隻怪物活生生咁撕開...」Marcus 聲音抖顫地說道。