［人性/有甜］- 屍•家•馬鞍山（隔日更新）: Chapter 698 - 病毒進化

「你話有人一早就知道喪屍爆發？」我緊張地追問。

「或者咁講...」Marcus 想了一下後答道，「各國政府都一定會收到情報，只不過係個程度上嘅分別啫～」

「但係你唔覺得太巧合咩？」我問道，「偷偷起定一個病毒實驗室，又咁啱喺病毒爆發前調你哋嚟...」

「唔... 病毒研究我哋就一直喺科學園做緊嘅...」Marcus 答道，「啲研究可以幫我哋了解病毒、病理等等，對研製疫苗同藥物好有用...」

「至於調我過嚟係巧合定點，我就唔太清楚...」他補充，「但以佢哋威脅同迫我哋嘅手段，我就比較相信佢哋都係知情嘅...」



「咁又係... 如果唔係，佢哋都唔洗用啲病毒迫你哋啦～」我表示認同，「不過，如果佢哋一早就知道，又任由無辜嘅人受感染，會唔會...」

「唔... 我就咁諗...」Marcus 想了一下後答道，「除非百分之一百肯定，如果唔係，你又點樣去叫人防備，又或者貿貿然疏散所有人？」

「咁樣樣，會唔會造成更大嘅恐慌？甚至失控？」他說道，「如果喺大規模疏散過後，發現原來係虛驚一場，咁當中嘅損失，又有邊個負責？」

「有時在上位者，要考慮嘅嘢遠比我哋諗嘅多好多...」他補充。

「咁都唔係就咁乜都唔做，任由啲無辜嘅人死㗎～」我對那些逝去的同伴感到忿忿不平，「我... 我諗點都有啲嘢可以做呀嘛～」



「唉，其實...」Marcus 無奈地答道，「我諗佢哋 set up 呢個研究所，都係準備不時之需啫...」

「只不過，可能一切嚟得太快太突然，大家都預計唔倒...」他補充。

「咁嗰啲無辜嘅人...」我為他們感到難過。

「無辜？」Marcus 竟冷笑道，「你哋都有試過殺人啦吓嘛？」

「冇... 我最多都係殺過喪屍咋...」我固然矢口否認。



「嘿嘿，係呀？」他打量著我們說，「不過你殺咗啲喪屍，唔通佢哋之前就唔係人嚟嘅咩？你殺咗佢哋，唔通就唔係殺人咩？」

「咁唔通佢哋就唔係無辜咩，咁你哋又係唔係無辜呀？」他向我們問道。

「......」雖然他說得赤祼，但也好像有點道理。

「所以唔好道德綁架...」他看著我的雙眼說道，「每一個人，都有自己嘅罪孽...」

「嘿嘿... 所以，冇人係無辜嘅...」他冷笑著說。

他是瘋狂的嗎？

我完全無法認同他的觀點，但我更不想再與他爭論。

「不如你話我知，點樣離開呢度啦～」我決定轉移一個，更切身的話題。



「後生仔唔洗咁急...」他淡然地答道，「要走，係要等時機嘅...」

我對他的故弄玄虛，感到有點不耐煩。

「吓？你唔好話我知，一夠鐘道𨋢門會自己打開喎～」我問道。

「......」他好像感到我的不滿，「後生仔唔使咁衝動嘅，要學會等待時機... 時機未到，你急都冇用...」

我雖然不想聽他的訓話，但亦只能無奈地冷靜下來。

「咁咪好囉...」他好像對我的反應感到欣慰，「嗱～ 你可以冷靜落嚟就好喇...」

「要出返去，聽起嚟好簡單，就係要攞倒掛喺 Chris 身上面嘅名牌...」Marcus 終於肯道出重點，「不過，要去攞係有啲難道...」



「甚至，好大可能有去冇回...」他的眼神突然變得陰沉。

其實，我大致也可以想像得到，他想說的是什麼。

「你都見倒呢個研究所嘅情況㗎啦～」他開始敘述道，「其實我哋一開始，係研究一啲不知名病毒開始...」

「其中一啲病毒好奇怪，普通狀態時係呈假死狀，完全冇生命跡象。但當佢進入咗生物母體之後，就迅速破壞同控制母體嘅大腦同神經系統...」他的表情又再變得認真，「而最令我哋覺得恐怖嘅係，啲病毒係會自己進化...」

「我哋發現第一代嘅病毒入侵咗生物嘅細胞之後，除咗會急速繁殖之外，仲有機會喺複製嘅過程中，開始產生變種...」

「然後就衍生出第二代、第三代...」他繼續說道，「而憑我哋嘅推斷同分析，病毒由第三代開始，已經唔單止係入侵同控制母體咁簡單...」

「佢哋開始產生咗突變，令母體嘅外型變異，身體嘅力量亦經歷咗強烈嘅進化，變得更加強大...」

難道，這就是那些不同異變怪物出現的原因？