［人性/有甜］- 屍•家•馬鞍山（隔日更新）: Chapter 697 - 病毒實驗室

「咁即係有方法啦！」我對他欲言又止的說法，感到有點不耐煩。

「嘿嘿！」他以不屑的眼光看着我説道，「辦法係就係有... 不過，以你哋嘅實力，我就覺得等於冇辦法囉！」

我不知道他是否有心使出激將法，但若然要我終身困在這裏，我寧願以死一搏。

「要我一直困喺度，倒不如去搏一搏！」我斬釘截鐵地答道。

「哈哈！好、好...」他忽然大笑著說，「既然係咁，我都要同你講清楚個情況，你先再決定點做啦！」



「我聽 Miki 講，你本身係喺科學園做嘢，後來先調咗嚟健康院呢度...」我想先問過明白，「你可唔可以話俾我知，究竟係乜嘢一回事？」

「後生仔，聽你講嘢嘅口吻，一啲都唔似係佢啲豬朋狗友喎～」他疑惑地打量着我們，「你哋好講清楚，係咩人派你哋嚟，嚟呢度有乜目的！」

他真的十分敏感...

可是，我經歷了那麼多，已經有應對這些情況的經驗...

「Miki 係我哋團契嘅弟兄姊妹嚟...」我冷靜地答道，「Miki 佢好擔心你嘅情況，所以先叫我哋過嚟搵你...」



「團契？我從來都冇聽過，佢有參加過乜嘢團契喎～」他明顯有心試探。

「吓？合一堂喎～」我依然保持冷靜，「雖然佢唔係每個星期都返，但係我哋成日都見倒佢㗎喎～」

「佢真係玩到冇嘢好玩...」Marcus 好像自言自語地說著，「好信唔信...」

「咁... 佢係咪正式加入咗喇？」他看來態度有點軟化，「你哋班男嘅，一定成日望實佢啦～」

我對他的態度有點不滿...



「佢都算幾吸引倒人嘅～」我依然客氣地答道，「不過... 我就唔覺佢好受歡迎嘞～」

其實我說的，某程度上也是事實。

「我就覺得佢，刻意去討好男性囉～」看來，Vicky 比我更按捺不住。

Marcus 轉而打量著她，但只是冷笑不語。

「好！既然係咁，我就即管同你講出去嘅方法...」他想了一會後說道，「睇你心口個名牌，我諗你一定清楚阿華嘅遭遇㗎啦～」

我有點尷尬，因為我這也是不問自取...

「要返番出去，就要呢度個實驗室主管嘅名牌...」Marcus 進一步透露。

我跟 Vicky 坐在他的對面，洗耳恭聽。



「呢個人叫 Chris，不過... 個名已經變得唔重要...」我不是太明白他所表達的意思，「係佢當初叫我嚟呢度幫手嘅，話係關於一啲我好有興趣嘅病毒研究...」

「病毒研究一直係我嘅強項，既然佢叫到我，我某程度上真係幾興奮...」他說完後，突然面色一沉，「不過，原來係條不歸路...」

看來，我可以從他身上得到更多的線索。

「我入嚟嗰陣本身都相安無事嘅，但班人竟然喺我啲飯入面落藥...」他繼續說道，「到我醒返之後，我就發現自己個頭同隻手好痛...」

「之後阿 Chris 先同我講，呢樣係每個入嚟嘅人必須要做嘅事...」他看來有點不忿，「佢美其名話係幫我哋打抗體，但係我就知道唔係咁簡單...」

「佢仲特登提我，隻抗體本身有強烈副作用，必須每日補打...」他補充，「如果三日冇打，就有生命危險...」

那些所謂抗體，難道是喪屍病毒？



但若然是這樣，為什麼 Marcus 又不會變做喪屍呢？

真的，耐人尋味...

「吓？咁即係有心留你哋喺度啦！」我努力認同他的背景。

「佢仲警告我哋，呢度所有嘢都係高度機密...」他繼續說道，「又講出我屋企人嘅資料，威脅我...」

「佢哋好成功，我每日夜晚都準時返嚟，有時仲要留喺度幾日...」他無奈地答道，「老婆佢哋乜都唔知，怕佢哋有乜危險...」

「吓？你哋咁都冇比人發現咩？」我感到奇怪，「同埋咁大個實驗室起喺健康院下面，冇理由唔比人發現㗎喎～」

「我哋都係以特別研究小組嘅身分，喺健康院入面做...」他解釋道，「我哋一般下晝先返工，帶二朝開門之前就走...」

「咁其他人都會見倒你哋落實驗室㗎？」我想不明白。



「唔會... 我哋只會喺健康院休息鎖門之後，先至落去做嘢...」他補充，「㗎𨋢平時係唔會去倒呢層，就連部𨋢嘅維修都好似有專人負責...」

「至於點解可以起倒呢度，我就唔係太清楚...」他續說，「不過，據我所知，一定有人預視咗問題嘅發生...」