［人性/有甜］- 屍•家•馬鞍山（隔日更新）: Chapter 685 - 教堂避難所

敵退我進，我立刻衝前把阿君捉住。

「對... 對唔住呀大佬！」阿君嚇得跪在地上，「你... 你想點呀？」

「我講得好清楚㗎啦！」我按著他的頭到，「我哋係嚟幫你哋家嘛～」

「係嘅... 係嘅...」阿君只能無奈地答道，「我帶... 帶你哋四圍行吓...」

「呢度大約有幾多人？」我打量四周後問道。



「呃... 大概三、四十人倒啦...」阿君答道。

「吓？仲有咁多人，你唔好諗住呃我喎～」我質疑道，「之前啲軍隊唔係已經捉曬啲人喇咩？」

「呢... 呢層我都唔太清楚...」阿君惶恐地答道，「我都係之後先加人...」

「我聽呢度啲人講，佢哋之前匿埋喺教堂入面嘅一個密室，先至冇比人捉走...」他補充。

「後嚟有附近嘅街坊加入，我就係其中一個...」他續說，「外出嘅搜索隊又間唔中搵倒啲生還者咁，加加埋埋真係差唔多...」



原來如此...

「頭先你話有隊搜索隊，可唔可以帶我去見吓佢哋？」我對潛在的威脅比較在意。

「呃... 佢哋... 佢哋出咗去搵嘢食...」阿君答道。

果然，這個人只是這裏的小嘍囉。

真正的威脅尚未出現。



「阿君，係咪有人嚟咗呀？」一個以神職人員裝扮的人，慢慢地由其他年輕人的引導下走過來。

「呢位朋友，啲弟兄姊妹同我講，你哋係救援人員嚟...」那人以禮貌的態度向我說道，「請問係唔係真嘅呢？」

「呃... 係...」既然已經來到這一步，我亦只好繼續說謊，「不過我同啲隊員，遇到怪物之後失散咗，我都要盡快搵返佢哋...」

「哦！我明白...」那人答道，「未介紹，我叫林牧師，係喺呢個教堂侍奉主耶穌基督嘅...」

「我謹代表合一堂，歡迎你哋...」林牧師熱情地向我說道。

我這才有空環顧四周，原來我們身處在合一堂裡面。

面前是教堂的入口，但另一頭則是幼稚園的所在。

建築物那猶如城堡一樣的外牆設計，確實是防守怪物的極佳場地。



「多謝你...」我被牧師的表現所打動，於是我也放下了，那不必要的戒心。

我亦終於把手槍，重新插回腰間。

「大家都攰㗎喇，不如入去清潔梳洗吓先吖？」林牧師說道，「我叫人煲啲熱水，比你哋沖吓身啦～」

「沖身？牧師...」阿君好像面有難色，「啲水...」

「得喇！我哋暫時仲夠用...」林牧師答道。

看來，水是大家都缺乏的資源。

「螢螢，你同阿君帶佢哋去幼稚園嗰邊，比佢哋休息吓啦...」林牧師吩咐道。



「唔該曬你林牧師...」我跟著二人，往他們帶領的地方走去。

「好，休息吓，一陣再見...」林牧師仍是貼心地向我們說道。

「你哋好，我叫螢螢，你哋可以叫我 JoJo...」螢螢先行親切地自我介紹。

「一陣間我帶你哋去洗手間沖吓身，然後再帶你哋去課室休息吓先...」JoJo 邊走邊介紹道，「等搜索隊返番嚟，再一齊傾吓之後嘅做法啦！」

「不過...」JoJo 補充，「因為我哋嘅資源有限，我可以比你哋嘅水都唔係太多，希望你哋慳啲用...」

「我哋明嘅...」我向她展示友善的笑容，「周圍都唔夠水用，你哋肯比我哋用已經好好，我哋會慳啲洗㗎喇～」

「我諗你哋都一定要啲乾淨衫㗎喇...」JoJo 走到一課室前說道，「嗱，呢度就係比你哋休息嘅房，因為可以用嘅房唔多，所以只可以同其他人共用...」

我透過門上的小窗，窺看那原本是幼稚園教室的情況。



只見他們用教桌簡單的分開了四個地方，上面放置著一些簡便的被鋪。

但是，裡面卻空無一人。

「呢度暫時得我同我個朋友住，所以為咗方便照應，兩位女仕可以暫時同我哋同房...」JoJo 說道，「不過男仕就要去另外一間房喇～」

「好多謝你哋嘅安排...」我打量四周後說道，「但係，我唔係咁同意...」

「橫掂我哋都只係留一陣，我哋求其搵撻地方唞吓得喇...」我再說道，「我唔會同我嘅同伴分開...」