［人性/有甜］- 屍•家•馬鞍山（隔日更新）: Chapter 686 - 幼稚園的家

「呃... 咁樣有啲難喎...」JoJo 面有難色，「呢度啲房間分配，都係跟返男女分開嘅...」

「除非...」JoJo 補充，「除非你哋係一家人啦！一家人就可以喺埋一齊...」

「呃... 咁情侶算唔算？」我搭著 Vicky 的肩膀問道，「佢係我女朋友...」

「哦～ 咁呢位係？」JoJo 看著腹大便便的小嵐，感到有點好奇。

「哦... 小嵐係我哋喺出面遇倒嘅生還者...」我解釋道。



「Okay...」JoJo 打量了我們三人，再思考了一下後說道，「咁好啦！你哋三個就同我哋一齊啦！」

「阿螢！」一直沉默不語的阿君，突然十分不滿地叫道，「你同佢哋三唔識七，咁就同佢哋一間房？」

「冇所謂啦！佢哋都係留一陣啫～」JoJo 答道，「更何況，佢哋都唔似係壞人啦！」

「吓？我唔覺得喎～」阿君表示不同意，「總之... 總之我就唔想啦！」

很明顯，這個阿君對 JoJo 十分在意。



為了不無辜樹敵，我打算還是自行找地方休息。

「唔緊要啦！我哋自己...」可話仍未說完，已經被 JoJo 打斷。

「唔洗喇！牧師叫我安排嘅，我講咗 okay 就得！」JoJo 認真地回答，然後向著我們說道，「你哋去梳洗咗先，我去幫手攞啲水嚟...」

「洗唔洗... 幫手？」我想幫忙一下。

「唔洗喇！會有人幫我手...」JoJo 拒絕了我的好意。



「Okay... 咁我喺洗手間出面等佢哋啦～」我示意自己將會待在這裏。

「咁好啦！一陣見...」JoJo 笑著向我說道。

就這樣，各人完成了簡單的梳洗；除了 Vicky 更換了從背囊拿出的衫褲外，我和小嵐都替換了 JoJo 取來的衣衫。

而倦極了的小嵐，卻已經竄進被鋪抱頭大睡。

一切都弄妥後，我正想出外向 JoJo 詢問一下搜索隊的情況，卻正好碰著剛剛回來的她，「咦？你哋咁快攪掂曬嗱？」

「嗯... 我哋都係簡單清潔吓咁啫～」我如實回答。

「嗯... 不過我哋嘅搜索隊，仲未返到嚟...」JoJo 看來知道我想問什麼，「如果佢哋喺入黑之前都未返到，咁就好有可能聽朝天光先返...」

「哦？係呀？」我覺得停留在外更加不智，但他們也應當有過充分考慮。



「之前，佢哋都試過係咁...」她補充，「不過唔緊要啦～ 呢度有足夠嘅被鋪，必要時你哋都可以留喺度一晚先走...」

「嗯... 咁好啦！」反正現在只能等待，我亦只好先行進去課室休息一下。

「你哋唞一陣先，我睇吓我朋友方便未，可以順便介紹比你哋識...」JoJo 說罷，又再消失在我們眼前。

「阿 Roy，你下一步諗住點？」久未發聲的 Vicky，刻意走到我的身旁輕聲問道，「係咪... 仲返去異生教？」

「嗯...」我想了一下後，在她耳邊答道，「異生教就一定返㗎喇，不過唔知點解，今次返去好似有危險等住我咁...」

「難得呢度遇倒其他人，我想睇吓有冇值得結交嘅朋友...」我補充。

「你想，搵多啲人幫你手？」Vicky 追問。



「嗯... 雖然唔知有冇用...」我說，「不過，人多就點都好似好啲...」

「嗯... 你咁諗都啱嘅...」Vicky 表示認同，「只不過... 我覺得搵啱人嘅機會，有啲微咁啫～」

「唉... 我都知...」我答道，「不過橫掂我都想唞吓氣，同埋順便將小嵐安頓落嚟...」

「留低喺度一陣都無妨吖～」我補充。

「其實... 就算一直留喺度都...」Vicky 的聲音低得，令我完全聽不清楚。

「妳講大聲啲啦～ 我完全聽唔倒...」我向 Vicky 示意。

「吖...」Vicky 再次貼近我的耳邊說道，「我話，其實一直留喺度都幾好...」

原來，她是這個意思...



但我的注意力，卻已經被她吹進耳內的吐息，和秀髪散發出的陣陣香氣，完全吸引住。

「啜...」就在她說完，正要把俏臉移開之際，我追上了並吻了她一下。

「你想... 做咩呀？」Vicky 紅著臉，輕聲的向我問道。

但這樣的提問，對我來說卻是一個另類的暗示...