［人性/有甜］- 屍•家•馬鞍山（隔日更新）: Chapter 653 - 志宏的加入

面對志宏的尖銳問題，我們好像一時無言以對。

「有乜咁出奇？」豈料巧兒竟能不慌不忙地答道，「女人周不時會有啲女人問題要 check 㗎啦！你啲臭男人知啲乜呀！」

大家頓時變得鴉雀無聲。

「比我知道邊個攪泫雅，我一定切咗佢，斬開一舊舊餵狗！」志宏激動地叫道。

被嚇得有點顫抖的我，看到巧兒正向著我，發出陰沉的冷笑。



「其實，佢會唔會好耐之前已經...」我不自覺地問道。

「唔會！」志宏斬釘截鐵地答道，「之前喺渡假村嗰陣有檢查過，金神使仲特登將佢同其他女仔分開...」

「神使...」志宏突然看著我，「知唔知泫雅佢，係咪發生過咩事？」

對著他那凶狠的眼神，我被嚇得近乎心跳停頓。

「冇... 冇呀...」我急忙否認，「我同你哋分開咗之後，都冇發生過乜嘢事...」



志宏聽後仍打量著我。

「我真係冇呃你呀！」這一次，我說得更加實在，「泫雅一路都同我哋一齊，唔覺佢有乜嘢...」

志宏的眼神充滿著疑惑，但又無法辨出真偽...

「神使我信你，希望你唔好呃我...」志宏直視著我說。

「嗯...」我想儘快將話題轉移，「巧兒妳覺唔覺，沿路都好似冇乜喪屍咁？」



「係... 自從離開咗餐廳附近，就淨係見倒小貓三四隻...」巧兒回應道，「我都覺得好奇怪...」

貨車繼續沿著西沙路，往馬鞍山方向前進。期間我亦不時往外查看，希望找到 Vicky 的影蹤。

「阿 Roy～ 唔好走呀～ 阿 Roy～」好像快要蘇醒的 Carey，突然大聲說起了夢話。

「Carey... 我係阿 Roy 呀... 我喺度呀...」我輕拍著她安慰著。

「嗯...」Carey 好像有點好轉，「我喺邊？」

「妳而家喺架車入面...」我答道，「頭先妳應該嚇親暈咗...」

「哦... 係咩？」Carey 半夢半醒般回答。

「而家冇事㗎喇，妳唞唞先...」說著我想把她放低...



「阿巧兒，妳都係停一停車比我坐後面...」志宏看到後突然提議道，「呢度實在太迫喇～」

巧兒打量了志宏一下，但好像不太願意。

「一係妳比我揸喇，我有車牌...」志宏向巧兒提議道，「妳去後面陪佢，咁冇問題啦！」

「嗯...」巧兒考慮了一會，終於答應志宏的要求。

而我，亦終於可以把 Carey 放低。

「嗰個巧兒係乜嘢人？」志宏在巧兒離開後，便急不及待問道，「佢話佢個男友係異生教嘅人，我覺得有啲古怪...」

「哦？我都係之前喺西沙間餐廳度，先見倒佢哋一家三口...」我解釋道，「其實，我哋一啲都唔熟...」



「你覺得佢有問題？」我問道。

「唔... 點講好呢？」志宏思考一番後答道，「你唔覺得佢講嘅嘢有啲奇怪？」

「你講個女仔？」我問。

「你唔覺得有問題咩？聖教嘅教眾，又點會咁易背叛？」志宏道出他的所想，「同埋叛教係好嚴重嘅事，佢哋又有乜嘢理由，貿貿然返去又覺得自己會冇事？」

「除非，佢哋根本就唔係逃兵，而係有任務在身...」他補充。

「我諗，佢哋都係諗住搏一舖啫～」我嘗試解釋。

「嘿嘿！」豈料這只是換來，志宏的一聲冷笑，「咁你又點解釋，佢講嘅一家幾口嘅存在？」

我開始找到問題所在...



「你唔好唔記得，馬鞍山嘅生還者，之前已經比人清得七七八八...」他續說，「如果佢講只係一家幾口喺間餐廳度，有乜可能生存倒咁耐？」

「而嗰個所謂嘅叛徒，又點解咁肯定屋企人未死，冒險咁返番嚟？」他反問道。

「或者...」我正想解釋。

「我知你想講，可能佢哋都係想搏一搏啫！」可是，志宏快一步打斷我的說話，「但係實在太多巧合喇！巧合得太唔合理...」

「......」他好像說得有點道理。

「同埋... 我啱啱又發現咗一件事...」志宏四處張望後說。