［人性/有甜］- 屍•家•馬鞍山（隔日更新）: Chapter 654 - 志宏的想法

我跟隨他四處張望，好像也發現了一點不妥。

就是，沿途的喪屍實在太少。

「係喪屍嘅數目...」我終於感到問題所在，「附近嘅喪屍唔多，點解佢哋會聚曬喺餐廳附近？除非...」

「除非有人刻意安排...」志宏滿意地笑說道。

這令我對志宏重新估算，想不到他也有這樣強大的分析力。



「可以隨便操控喪屍嘅人，只有異生教嘅神使...」我立刻道出這個想法。

「係... 所以成件事太多可疑嘅地方，令人覺得唔係咁簡單...」志宏說道。

他說得不無道理，但又好像把事情說得太過。

我只是，半信半疑...

「所以我有理由相信，我做緊嘅嘢...」志宏繼續表達自己的意見，「一直有人監視住...」



「甚至...」他補充，「我哋遇倒嘅一切，一早已經有人安排好。」

我已經不知道，該怎樣反應...

「咁你覺得，係邊個安排所有嘢？」我向他問道。

「唔... 呢層我就唔太肯定喇～」他答道，「如果要我估，我估一個可能係孝信，一個可能係 Dickson...」

雖然我不會質疑這二人的能力，但他這樣說，也未免太過誇張了吧！



「所以直覺話我知，去烏溪沙站，係一個局嚟...」他總結自己的推論。

「嘰...」他亦二話不說，馬上把貨車煞停。

「我哋應該直去，馬鞍山運動場嘅大本營...」他自說自話後，便再次把貨車開動。

什麼？這樣我不太同意。

「志宏... 我都係想去烏溪沙站先...」我提出反對，「我要去嗰度搵返我朋友先...」

「......」志宏沒有說話，只是默默的駕著車往前走。

「志宏～」我把聲量提高，以示作出警告，「我好明白你嘅諗法，不過全部都只係猜測...」

「我覺得，我哋應該去烏溪沙站先！」我叫道。



「嘰～」車子再一次被剎停。

可志宏卻靜坐在那裡，沒有發出半點説話。

氣氛有點奇怪...

我摸著已經重新上彈的手槍，以備不時之需。

「神使你講得啱，可能我真係諗多咗...」志宏面看我笑著說，「好！去烏溪沙站。」

貨車繼續向前進，直至抵達烏溪沙站外圍。

「嘰～」貨車又再次被剎停。



因為，車頭燈光正照射著，一堆看不到盡頭的喪屍群。

「吼～」受到燈光刺激的怪物們，立刻向我們衝過來。

「咇、咇...」志宏立刻將貨車後退。

「吼～ 吼～」但對方殺氣騰騰的衝過來，看來很快便會追到。

志宏雖然狠狠地踏著油門，但雙方的距離，卻好像變得越來越近。

「點解呢班喪屍，好似走得特別快咁嘅？」志宏問道。

我看著眼前那些面目猙獰的怪物，確實比之前遇過的，來得更加凶狠。

「神使...」志宏向我問道，「你其實... 係咪都有控制喪屍嘅能力？」



「呃...」我被他問得有點尷尬，「我... 我其實唔識...」

「吓？」志宏好像有點驚訝，「我以為...」

「唔好話你，我都以為我可以...」我無奈地答道，「不過我真係唔得...」

「係喎話時話，神使你隻聖介呢？」志宏打量我的手後問道。

難道，他在懷疑我的身分？

「我之前唔見咗，所以今次返去，我會順便攞番...」我只好這樣答道。

「哦～」志宏好像有點懷疑，「咁你坐穩喇～」



「唧～～～」只見他二話不說，便突然把軚盤扭到一邊。

貨車急速旋轉，使我和 Carey 失去重心貼近門邊。

「篷～」豈料，車門突然打開，令我和 Carey 一起跌出車外...