［人性/有甜］- 屍•家•馬鞍山（隔日更新）: Chapter 652 - 泫雅的價值

巧兒的說話令人想到，後面的女子應該有一定的利用價值。

「妳咁講係咩意思？」我追問。

「呃... 我以為你知添～」巧兒感到有點驚訝，「異生教而家搵緊聖女嘛，乜你唔知咩？」

我完全不明所以，眼神只好投射到另一旁的志宏。

「神使，可能你出咗出面太耐...」志宏解釋道，「教入面而家搵緊聖女，搵倒嘅話重重有賞。」



「聖女？有咩特別要求？」我問道。

「吖...」志宏突然貼近我的耳邊說道，「聖女... 要係未經人道嘅女仔...」

「哦？」我感到有點奇怪，為何會有這樣的要求。

在這個環境下，莫說是處女，就連妙齡女子也不多。

那後面的女子，豈不是？



「你係... 神使？！」巧兒興奮得停下貨車，然後向我追問道。

「嗯...」我不打算否認，「不過我係冇乜力量同權力嘅神使...」

「如果你係神使，咁可唔可以幫吓我哋...」巧兒好像沒有理會我所說的話。

「我... 未必可以幫倒啲乜...」我無奈地答道。

「得㗎！你一定得㗎！」巧兒好像找到救生圈一樣興奮，「如果你幫我哋推薦，一定好過我哋自己講㗎！」



可是，巧兒並不知道，其實我也是自身難保...

「咁後面嗰個係咩人？」志宏突然插口問道。

「佢... 係我男朋友個妹...」巧兒答道。

「咁妳又咁肯定，佢係合附資格？」志宏追問道。

「我本身係護士，所以我一 check 就知...」她自信地答道。

志宏聽後，便打算轉身下車。

「志宏，你想做乜呀？」我覺得他的行為有點奇怪，於是伸手把他拉住。

「我唔可以比任何人，威脅倒泫雅嘅地位...」志宏冷冷地回答後，便準備推車離開。



「咪住！你咁就諗住殺人？」我立刻出聲喝止，「你係咪癲咗呀？」

「......」志宏沉默了一會，「我都係嗰句，邊個威脅泫雅...」

「志宏！如果你仲當我係神使，你就同我坐低！」我喝罵道。

「但係馮神使，我... 我...」志宏好像仍猶豫不決。

「志宏，你係泫雅嘅男朋友？」巧兒插口問道。

「呃... 呃... 緊係唔係...」志宏緊張地回答，「我只係... 一個識咗佢好耐嘅好朋友...」

「咁又係...」巧兒説道，「如果你係佢男朋友，又點會咁落力將自己女友奉獻比人吖？」



「咩... 咩奉獻呀？」志宏聽後十分不滿，「係去做異生教嘅聖女，冰清玉潔嘅聖女呀！」

「喂你真唔知定假唔知呀？」巧兒用奇怪的眼神看著他，「係人都知所謂聖女，只係教主選出嚟傳宗接代㗎啦～」

「妳亂講！」志宏十分激動，「我哋忠於異生教，服從教聖嘅一切命令...」

「妳個叛徒妖言惑眾，等我同聖教清理門户...」志宏看來有點失控。

「志宏你冷靜啲...」我向他說道，「如果你係為異生教好，你就唔應該自把自為剷除異己...」

「阿 Roy 佢就講得啱喇！」巧兒附和道，「一個忠心嘅教眾，唔應該為咗私心而傷害聖教...」

「更何況...」她續說，「你要保護嘅人，根本就唔合資格。」

聽到她的話後，我立時手心冒汗...



「我唔想你比人呃啫～」巧兒續說，「我之前同佢檢查過，泫雅佢根本就唔係處！」

「妳講咩呀！妳唔好詆毁泫雅喎！」志宏氣得想把她殺掉。

「唔信你自己問吓佢嘞！」巧兒沒有半點退讓，「我係護士，一定唔會錯！」

「......」志宏聽後，好像不知如何應對。

「點解妳無啦啦要同佢檢查？」志宏再開口問道，「妳哋係咪有嘢隱瞞住我？」

車內的氣氛，突然又變得緊張...