［人性/有甜］- 屍•家•馬鞍山（隔日更新）: Chapter 554 - 惡魔父親

我屏息靜氣，靜待 Venus 繼續說下去。

「你爸爸... 即係你哋叫嘅黑先生... 原本係南韓邪教組織，聖道教嘅成員。」

「之後喺一個機緣巧合之下，參加咗教入面，同一間生物科技公司合作嘅一個研究計劃...」

原來，那個黑先生...

怪不得我第一次看到他，便有一種似曾相識的感覺。



「本來呢個研究都係試驗性質，但係大家都估唔到，實驗嘅效果完全出乎所有人嘅預期...」Venus 續說。

「黑先生注射咗研究藥物之後，就變咗一隻有特殊異能嘅怪物。跟住佢嘅野心就逐漸浮現，仲秘密開始招兵買馬、收買人心，靜靜等待機會...」

「之後佢見時機成熟，就同心腹秘密成立異生教支部，慢慢蠶食聖道教嘅勢力。」

「佢仲挪用咗聖道教嘅大量資金，同呢間生物科技公司，合作發展人類進化研究...」

「個研究應該有唔錯嘅成果，所以黑先生就諗住小試牛刀，喺濟州島散播少量喪屍病毒，從而觀察一下效果...」



「結果韓國政府比佢預期中，更快控制咗個病毒爆發。聖道教嘅陰謀爆光，喺輿論嘅壓力下，韓國政府迫不得已取締聖道教，拘捕咗一班教裡面嘅領導層。」

「但奇怪嘅係，間生物科技公司就因為證據不足，南韓政府好快就撤銷檢控...」

「咁好明顯，間嘢背後有人撐腰。」我回應道。

「嗯...」Venus 點頭同意，「不過呢啲都係喺黑先生預計之內，佢即刻以手下一班心腹嘅名義，正式成立異生教...」

「佢亦都知道自己係韓國政府嘅目標，所以就即刻啟動咗個後備方案，安排你哋兩兄弟過韓國，一面自導自演一幕意外死亡嘅戲碼，一面幫你同阿 Keith 注射新一代嘅研究藥物，以防萬一...」



我萬萬都沒有想到，自己的親生父親，竟然潛藏著這樣的一個大秘密。

但我亦終於明白到，父親長期出差在外的原因。

「咁如果妳話我南韓遇倒嘅事，係我老豆刻意安排，咁我媽媽即係未死？」我忍不住插口問道。

「唔係...」Venus 搖頭否認道，「為咗令其他人減低對自己嘅懷疑，你爸爸犠牲咗佢嘅老婆...」

「所以...」

「得喇，我知道喇！」我沒有讓她繼續，因為我完全無法理解，為何他就能那麼狠心的把我們的母親，自己的妻子犧牲？

Venus 看一看我，頓時停下了說話。

「得！我冇嘢，妳繼續...」我向她示意。



「而為咗分散風險，佢仲捉咗其他幾個年青男女，進行研究藥物注射...」Venus 向我繼續說道，「不過佢哋同你兩兄弟一樣，比人催眠同清洗咗一段記憶，令佢哋自己都唔知發生過咩事...」

「而另一方面，黑先生就用濟州島事件收集倒嘅數據，繼續喪屍病毒嘅研究。一直去到兩個幾月前，黑先生就再次發動襲擊...」

「原本佢計劃喺韓國、日本同台灣三個地方，用高濃度氣化咗嘅喪屍病毒，以氣體爆炸嘅方式，快速喺空氣中傳播。」

「不過呢三個地方嘅病毒，並冇喺預期中爆發，反而，喺情報入面冇嘢香港，雖然都有做咗好多預防措施，但係就制止唔倒佢哋嘅襲擊...」

「 就係咁，西貢區喺短時間入面，變咗做一個人間地獄。」Venus 說得有點無奈。

「吓？即使話老豆... 黑先生佢... 一早就諗住
襲擊自己土生土長嘅地方？」我覺得不可置信，「仲要喺西貢同馬鞍山？」

「呢樣嘢我哋起初都諗唔通...」Venus 答道，「不過我哋後來推論到，一切都係黑先生刻意安排...」



「妳意思佢揀喺呢度爆發，係另有目的？」我已經有點崩潰，「唔通佢唔知道，呢度有佢最重要嘅人喺度？」

「同埋點解妳哋唔喺發生襲擊之前，將佢哋一網打盡？」我實在理解不到。

「嗯...」Venus 只是無奈地點頭，「佢就係知道你哋喺度...」

我突然頭腦一轉，看似已經猜到了黑先生的目的。

我頓時感到背後一涼，身體亦不由自主的在顫抖。

「我諗，你都估倒黑先生咁樣安排嘅目的...」Venus 淡淡地答道。

「咁樣亦可以解釋倒，我哋唔先發制人嘅原因...」她補充...