［人性/有甜］- 屍•家•馬鞍山（隔日更新）: Chapter 553 - 父親的身分

我沒有立刻答應，因為我知道，她們的目的絕不是那麼簡單。

如果真的是要把首腦殺死，剷除這個異生教，若以她們的人力物力，這絕對不需要那麼長的時間吧！

反之，她們應該是要在異生教身上，找到一些東西。

「如果你唔想加入，咁不如同我哋聯手一齊消滅異生教吖？」Venus 見我沒有回應，便退而求其次問道。

「冇問題，我都想剷除呢個邪教...」我覺得可以先行接受。



「不過我而家想知嘅反而係，Carey 佢哋嘅情況...」這的而且確是，我現在最關心的事情。

「吖... 我其實都唔知，喺遇到班怪物，同你哋失散咗之後，我就比班喪屍包圍...」Venus 憶述道，「不過奇怪嘅係，佢哋淨係圍住我，但係就冇撲過嚟...」

「之後，我就見到有個着住白袍嘅人，喺喪屍堆入邊穿出嚟，走去我前面...」

「然後佢唸咗句，又點咗支類似香薰嘅嘢，我就冇左知覺喇...」

我感到有點失望...



因為那亦即是代表，Carey 仍是下落不明。

「吖...」我本想繼續追問那仍未解答的疑問，但我又怕再次觸動到她不穩的情緒，於是立刻把問題停住。

「你有嘢想問就問啦！」Venus 用疑惑的眼神打量著我。

「吖... 我想問，Keith... 佢係咪有攪過妳？」我真的想問清楚。

「頭先我咪講咗囉！」Venus 手握拳頭，看來正壓制著自己激動的心情，「唔只佢，佢兩個手下都有份呀！」



「嗯... 同埋照妳咁講，妳根本就係 Clara 嘅人...」我打算進一步問清楚，「咁點解妳要呃我？接近我又有乜嘢目的？」

「係！我係 Clara 安排入去警署嘅，原本係想搜集情報，同埋支援其他成員嘅行動...」Venus 認真地回應道，「不過... 之後你嘅出現，就改變咗我哋嘅目標...」

「哦？我有咩值得比妳哋跟？」我想知道，她們對我的認知有幾多。

「我係一個情報員，本來有啲嘢我係唔可以講...」Venus 面有難色，「不過我知道我唔講，你就唔會幫我...」

好一招以退為進。

「既然我哋坐埋同一條船，我覺得你應該對我坦白囉！」我反駁道，「如果唔係大家估估下，好難一齊合作。」

「Okay...」Venus 好像有點同意，「我諗你都知道，自己個特殊身分。」

「其實我都唔係話好清楚...」我回應道，「我淨係知道，自己唔係普通人，有啲其他人冇嘅特殊能力。」



「咁你知唔知道，你同異生教嘅關係？」她進一步問道，「Clara 姐有冇同你講過？」

其實，我對自己的身世，已經有一定的認知。

可是，我更想知道的，是她們掌握到哪一個程度的資訊。

「佢冇乜點講過喎...」我只好假意否認。

「哦？咁奇怪...」Venus 好像有點不太相信，「不過既然係咁，我就話你知啦！」

「吖... 根據我哋嘅調查同推測，你應該就係異生教教主個仔...」Venus 看著我說，「應該話，你同阿 Keith 都係...」

我一時聯想不到...



異生教教主，不就是黑先生嗎？

他又怎會跟，我已經死去的父親扯上關係？

「睇來你真係唔知咁喎～」Venus 看來不可置信，「咁唔洗講，喺韓國發生嘅事，你都一無所知㗎啦！」

「唔...」我搖頭示意。

「唉... 當年你全家去咗韓國，表面上你父母係因為交通意外過身，得你同細佬 Keith 安全返嚟...」Venus 繼續說道，「不過，其實真相唔係咁...」

「其實所有嘢，都係你爸爸安排嘅...」Venus 的表情又再嚴肅了起來。

「我記得，嗰日我哋發生咗輕微嘅交通意外，之後一家人就冒住大霧喺樹林度走...」我回憶道，「之後，我就聽倒媽咪嘅慘叫聲，同老豆叫我哋返轉頭走嘅叫聲...」

「跟住我同細佬走走吓仲失去咗知覺，迷迷糊糊間，仲好似比人拮咗枝針...」



「不過奇怪嘅係，之後韓國警察同我哋講，佢哋係喺車入面救我同細佬出嚟，而父母就已經當場死亡...」確實，我到現在仍十分不解。

「唉... 因為所有嘢，都係你爸爸安排嘅...」Venus 解釋道。