［人性/有甜］- 屍•家•馬鞍山（隔日更新）: Chapter 277 - 素恩的身份 (中)

「我冷靜落嚟之後，孝信就再同我講多啲關於組織嘅嘢。原來我哋服務嘅組織，只不過係一間生物科技公司裏面，一個不為人知嘅神秘單位...」素恩繼續向我訴說着。

「當初開始研究呢隻生化病毒嗰陣時，佢哋就已經開始係全國各地，捉走咗好似我同孝信咁差唔多年紀嘅後生仔女，呃我哋係比國家挑選咗進行特工訓練。而我同孝信已經唔知喺第幾屆嘅學員...」

「佢哋做得好專業，扮到真係好似國家嘅特種部隊咁。又將我哋困咗係一個孤島訓練，完全與世隔絕。佢哋又同我哋講，已經對外發放消息，話我地比北韓間諜綁架咗，從此我哋就變咗失蹤人口...」

「有好多人試過偷走，不過到頭嚟只係變成一具具殘缺不全嘅屍體。佢哋就話係海上面嘅鯊魚做成，警告我哋呢個就係偷走嘅後果，死咗嘅人亦會變成永遠失蹤... 自此之後，就再冇人去冒險...」

「而我哋嘅訓練，簡直可以用人間煉獄嚟形容...」素恩說著帶點哽咽，「我哋幾個女仔，俾人安排住喺同一個營裡面。佢哋就會喺唔同嘅時間，唔同嘅地方，突然間出嚟襲擊我哋...」



「當初嘅同伴，就一個又一個咁喺你身邊消失...」素恩說罷已經啜泣起來。

我把她摟緊，以讓她感到溫暖，素恩亦開始冷靜下來，輕按我的手以示安好。

「經過差唔多一年幾嘅時間，我哋已經比人訓練到每一刻都喺高度戒備嘅狀態，犧牲嘅人亦已經越嚟越少。不過，我哋身邊嘅同伴已經淨番唔夠十個。」

「有一日，佢哋同我哋講考驗已經完成，大家正式加入組織成為一家人，又安排咗好多美酒佳餚慶祝。我哋經過年幾以嚟嘅地獄式特訓，難得可以將一直拉緊嘅橡筋鬆一鬆，大家都玩到樂極忘型...」

「嗰晚大家都飲到醉醺醺，點知去到半夜，就突然有班人衝入嚟襲擊我哋。唔知啲酒係咪比人落咗藥，我哋成班女仔，都冇人有能力反抗。結果，我嘅第一次，就咁比人攞走咗...」素恩說時，身體亦不停地在顫抖著。



我輕輕的向她一吻以示安慰，還在她耳邊輕訴著，「放心啦，依家冇事㗎喇...」

「嗯...」素恩輕輕地回應了一下後，便再繼續下去，「最過份嘅係，嗰日攪我嗰個人，原來係一早安排咗做我嘅私人教練，負責教我取悅男人嘅唔同技巧...」

「好多女仔都接受唔倒，有啲選擇咗自殺，有啲就同攪佢嘅人同歸於盡...」

「當初我都諗過了結自己算，不過當時我覺得為國家效力，就忍辱負重捱過咗佢...」

我聽後亦不懂得怎樣去安慰她，只希望自己能保護她，免卻於其他的傷害。



「之後又過咗幾個月，我哋終於有出外嘅任務，就係嚟香港做留學生。組織安排咗另一個男仔，即係孝信，做我拍擋方便照應。佢哋又安排咗一個同我哋實際年齡細五年嘅身份，喺國際學校插班。」

「咁，即係妳同我差唔多年紀？」我問素恩。

「哈哈，今年廿二，我係咪 keep 得好好呢？」素恩興奮地叫道。

其實，從她的外表和言行舉止，我一早已經對她的年紀有所懷疑。只是我覺得留學生年紀可能比較成熟，我又一直難以開口確認。

「係，妳唔講，我仲以為妳冇廿歲...」我選擇了另一答案。

「口花花...」我聽到素恩帶著笑意回答，「跟住喪屍事件發生之後，普通對外嘅通訊中斷曬，我哋就用衞星頻道同組織接觸，報告住呢度嘅情況...」

「不過孝信就喺另一個組織口中得知，我哋效忠嗰個係一個極左嘅秘密組織，咁多年嚟不斷製造事端，務求令南北韓開戰，以達至佢哋統一嘅目標。聽講呢個組織背後有唔少軍方人士、政府高層同社會名流支持，所以呢個雖然唔係咩嘢政府組織，但係得到嘅資源同特權就一啲都唔少...」

「今次件事都秘密策劃咗好多年，但又成功避過政府嘅耳目，我哋都覺得一定有內鬼。但之後個計劃又好似失敗咗，南韓亦冇借機攻擊北韓，反而就引起各國對呢隻病毒嘅興趣...」



「所以孝信都話，佢哋嘅真正目的，可能就係比個病毒樣辦比人睇，以爭取最好嘅賣價。而身為國際都會嘅香港，係一個唔錯嘅地方...」

我感到十分憤怒，因為一些人的私利，竟然置數十萬條無辜性命於不顧。

始終最恐怖的，仍是人類的私心。

「結果佢哋都好成功，引倒唔少買家，尤其係一啲恐怖分子，或者反政府組織嘅興趣。不過隨之而來，亦開始比唔同國家出手對付。佢哋表面上話要消滅呢種大殺傷力嘅威脅，但實際上更多人喺想將呢種病毒據為己有...」

「之後過咗幾日，我哋仲同組織失去咗聯絡。而孝信就喺佢另一面得知，我哋原本嗰組織一夜間比人連根拔起...」

「組織嘅骨幹成員都失曬蹤，佢哋就懷疑係美國嘅特種部隊做嘅，目的當然係啲病毒啦...」

「不過有消息話組織有啲高層一早走甩咗，而且啲特種部隊都搵唔倒病毒原胚，所以當初有植入到原胚嘅人，就變得好有研究價值。」素恩說時，不其然向我的手拍了一下...