［人性/有甜］- 屍•家•馬鞍山（隔日更新）: Chapter 278 - 素恩的身份 (下)

「孝信其中一個新任務，就係搵呢啲人出嚟交比新嘅組織。由於要搵倒同活捉佢哋一啲都唔易，所以新組織都比咗唔少資源同武器佢，比佢招兵買馬...」素恩續說。

「我自然成為佢第一個助手，跟住佢就以學校為基地建立自己嘅勢力。而喺嗰晚，佢好似癲佬咁衝咗出去其中一個校舍...」

「咁我有啲擔心，咪跟住佢過去囉！原來佢諗住夾埋其他人捉你哋過嚟，原本一切都按計劃進行。點知突然間有好多 U 仔殺出嚟，佢就即刻一枝箭咁衝走咗。我好辛苦先走倒落嚟，然後就喺樓下見倒你哋...」

「佢同我打咗個眼色，即係叫我幫佢手捉你哋。」素恩帶點尷尬地說道，「咁嗰陣時我又唔識你哋，我當然係會幫佢手啦...」

我的心情有點複雜，明明是被出賣，但我又無法責怪她。



「不過當我見到你帶住小朋友，我忽然又唔想孝信對付你哋，所以就諗住出聲叫你哋小心...」

「雖然最後我都比孝信阻止咗，不過你哋都好醒目，開始發覺倒有啲問題...」

「孝信都好似感覺倒，於是即刻改變計劃，打算捉你哋其中一個先。而佢就好似對 Karen 姐情有獨鍾...」

「之後就係你見倒嘅事，不過有樣嘢係我對你哋唔住嘅，就係我根本就冇暈過...」

我感到又羞又憤，這不單是出於她對我的欺瞞，更是出於我在她假裝昏迷後，做出過的不雅行為。



素恩卻好像沒有把這些事情放在心上，「因為孝信喺後面，靜靜雞同我講要我跟蹤你，然後借機呃返你哋過去佢度。不過件事發展得好快，之後旋旋同佢媽咪又先後遇害...」

這令我回想起我的啟蒙老師小喬，和她可愛的小女兒旋旋。

「其實我走咗之後，巴士上發生咗咩事？」我打算解開這個存在已久的迷團。

「吖... 其實你走咗之後，Frankie 竟然想對我落手。不過以佢嘅身手，根本唔係我嘅對手。喺我諗住為民除害嘅時候，Frankie 竟然挾持住旋旋走。我唔想傷害倒小朋友，唯有由得佢帶住旋旋走咗去...」

「之後旋旋嘅遭遇你都知啦，而我喺件事之後，都只可以返番去孝信度，睇下佢有冇下一步行動...」



「不過之後一次孝信比喪屍襲擊，徘徊喺垂死邊緣嘅經歷，令佢開始懷疑自己唔係普通人。」

「嗰次襲擊令佢身體多處都比喪屍咬傷同抓傷，不過就僥幸咁走得返嚟。佢原本都諗住凶多吉少，打定輸數，仲發咗幾日高燒，但之後佢又奇跡咁冇事，佢仲話身體好似強壯咗...」

「而咁啱 Karen 話孝信嘅經歷同你之前好似，令孝信開始對你有好大嘅興趣...」

我感到一點納悶，為何 Karen 會把這些事情，告知才剛剛把她擄回來的陌生人。

「阿孝信當初冇對 Karen 點呀嘛？」我用試探的語氣問道。

「哼！你知唔知一開始，係佢自願跟孝信走㗎？」素恩不屑地答道，「到我返番去嘅時候，佢已經做咗第一夫人啦！」

我感到有點驚訝，因為我認識的 Karen，好像不是這樣的人。

可是，觀乎我不久前與她再遇的情況，我亦感覺到，她已經不是我當初認識的 Karen 了。



還是，我根本就沒有認識過真正的她？

素恩聽不到我的答話，便繼續向我訴說著，「所以孝信就叫我繼續留意住你，所以我成日都穿梭喺你哋之間...」

「有樣嘢我想問好耐，點解你成日知我去咗邊？馬鞍山話大唔大，話細都唔細...」我想解開另一疑惑。

「記唔記得喺新港城搵倒嗰本記事簿呀？」素恩淡淡地說道，「佢原本係我本記事簿嚟，只不過係加多咗個追蹤器，放咗喺度引你拎，嘻嘻...」

想不到，那個我自以為是重要線索的東西...

「呢個故事係要話比你知，唔好亂咁係街上面執嘢... 不過佢上面寫嘅嘢，大部分都係真嘅。」素恩不忘嘲笑著我。

我想努力把我的愚蠢行為隱藏，於是我把另一話題打開，「咁之後呢？佢兩個手下都好似好打得咁...」



「阿權同阿臣我就真係唔清楚，佢喺我一次返去之後突然加入嘅。不過，我覺得孝信好似掌握咗一啲資料，可以知道同佢同類嘅人嘅特徵同大概位置，所以佢好易就搵倒想搵嘅人...」素恩答道。

這令我想到 Jacky，難道它亦擁有著同樣的能力嗎？

「反而強哥就係初初招攬嘅，佢仲帶埋一班手下嚟，係威係勢咁...」

「我知孝信起初都好唔鐘意佢，不過嗰陣為咗擴張勢力，孝信都只可以由得強哥佢。而時間耐咗，佢發現強哥亦只不過係，可以比女人同物資控制嘅低等生物...」

「而孝信亦好似開始縱容自己既慾望，仲夾埋強哥四圍去凌辱女性。起初我都以為佢係比強哥影響到咁，不過我後來發現，慾望係其中一個令佢進化嘅因素...」

「而另一個另佢哋進化得更快，就係瀕死嘅經歷...」素恩補充道。