［人性/有甜］- 屍•家•馬鞍山（隔日更新）: Chapter 276 - 素恩的身份 (上)

「King 表妹？我唔知道佢有個表妹㗎喎！」素恩疑惑地答道。

「吓？佢表妹 Kimi 喎！」我對她的回答感到十分驚訝。

「哈哈，你話 Kimi？」素恩嘲笑著說，「有時都唔知，話你係單純定係蠢好...」

我對她的嘲笑感到莫名其妙，一時也說不出話來。

「佢係阿 King 條女嚟㗎！」還是素恩把我從迷惘中拉回來，「邊個同你講佢係阿 King 嘅表妹㗎？」



「吓！係阿 King 自己講㗎喎！」我無奈地答道。

「唔... 你唔似咁易信人喎！」素恩挖苦著我說。

事實上，不知道為何在阿 King 面前，我會變成這樣沒有自信，甚至一蹶不振。

他所說的話，又在何時變成了真理？

是因為他是我的情敵嗎？



一個我一見鐘情女孩的情敵...

不雖我多說，素恩亦好像把我的心情看穿，便直接跳到問題的答案來，「Kimi 同阿 King 拍咗拖好耐㗎喇，仲住埋咗一段時間添！喺喪屍爆發嗰日，佢哋咁啱因為有啲事而嗌交。喺阿 King 屋企走咗出嚟，而又漫無目的嘅 Kimi，就咁啱上咗你哋坐嘅嗰班車...」

「之後佢哋再撞番，你嘅情敵就刻意安排佢喺你身邊，監視住你嘅一舉一動...」

我奇怪素恩為何對此一切這樣瞭如指掌，但一來我不想把說話打斷，二來不想影響我們二人的關係，我還是待她說完再算。

原本我想印證，Kimi 說從未在富寶保安室出現的疑問，但看來現在也不需再多問了。



於是我提出了另一個問題，「Kimi 話強哥同你見倒嗰個𡃁仔，喺我撞返妳嗰日攪過佢，妳又知唔知真相？」

「喂！你真係當我乜都知呀？」素恩不屑地答道，「其實如果我個任務唔係要跟蹤你，我都唔會知你咁多嘢啦！」

我一時無法消化她的說話，難道我一開始，變成為了她跟蹤的目標嗎。

素恩亦再次在我提出疑問前，首先對我作出了解答，「你知道咗我嘅真正身份，就可能有殺身之禍，咁你係咪真係仲要聽？」

我一笑置之，死亡，現在對我來說，又有什麼問題？

我甚至希望快點抽身遠去...

「我已經冇嘢好怕，你就講啦！」我看似瀟灑地說道。

「咁好啦...」素恩淡然地答道，「我同孝信一樣，係南韓過嚟嘅間諜。其實佢哋應該唔止派咗我哋兩個嚟，不過其他人同我哋唔係同一 team，所以我哋都唔知道其他人嘅情況...」



「更何況我哋執行嘅任務都唔同，我同孝信原本只係負責留意病毒發放之後，香港巿民嘅反應，然後通知返佢哋參考下一步嘅行動。所以我哋喺呢個行動裡面，都只係算最低層，所以知道嘅實在唔多...」

「咪住先... 妳話病毒發放，莫非南韓政府一早知情？」我感到疑惑，只好打斷一下素恩的敘述。

「唉... 點講好呢？」素恩好像有點難以啟齒，「我收到嘅資訊，係南韓政府要喺香港發放喪屍病毒，然後嫁禍比北韓，等中國對北韓政府產生懷疑之際，南韓同美國就借機入侵北韓。我為咗國家，覺得有份參與呢此任務好光榮，所以就義無反顧去做。不過當我冷靜落嚟分析，又發覺事情唔係咁簡單...」

我感到實在太不可思議，只有屏息靜氣去留心素恩的敍述。

「第一，我只不過係低層間碟，政府又有乜嘢理由將呢啲咁重要嘅計劃話比我知？第二，中國同北韓都有唔比我哋差嘅情報機關，今次行動嘅保密程度咁低，真係咁容易呃到佢哋？」素恩續説。

「而最重要嘅一樣嘢，就係計劃原本喺香港各區發動襲擊，包括尖沙咀、旺角、中環、銅鑼灣等等... 點解到頭來，只係得香港新界東邊嘅西貢同馬鞍山一帶有事？」

「咁我就覺得，可能代表咗兩樣野。第一，就係襲擊嘅規模，根本冇佢哋所講咁強大。而第二，就係我哋組織個行動一早已經俾人發現咗，所以襲擊宣布失敗...」



「之不過我始終諗唔通，點解香港政府，對喺西貢嘅喪屍病毒襲擊毫無防備，定係有人已經一早安排咗呢度，作為今次實驗嘅大型場地？」

我聽後不禁毛骨悚然，原來一場看似簡單的喪屍病毒感染災難，背後是隱藏着這麼多的計劃與陰謀。

「所以我都開始懷疑件事唔係佢哋同我講咁樣，之後孝信見我有啲動搖，佢先同我講佢知道嘅嘢...」

「原來孝信係雙重間碟，即係表面上同一個組織賣命，實際上就同另一個組織做嘢。而佢亦話我知，派我同佢嚟嗰班人，根本就唔係咩政府組織...」

「我聽倒即刻晴天霹靂，原來我一心一意賣命、甚至失去咗我最寶貴嘅嘢嘅組織，竟然唔係乜嘢政府機構... 我當日所有為國爭光嘅理想願望，就係嗰一剎那突然消失得無影無蹤...」我聽到素恩的話語中，背負著激憤的心情...