［人性/有甜］- 屍•家•馬鞍山（隔日更新）: Chapter 275 - 素恩的遭遇

激戰過後，我們便相擁休息了一會。

之後我們花盡九牛二虎之力，才能在黑暗中找回自己的衣服。

大家的體力還沒有完全回復，於是我們便坐在一旁，亦好讓我了解一下這新任女朋友。

「其實，我原本係想你返去阻止阿 Keith...」素恩首先開口，「佢引得你出嚟，一定係想對付你啲朋友...」

「其實我都有樣嘢諗唔通...」我回應道，「就係點解 Keith 好似咁清楚我嘅行蹤？」



「唉... 你都知 Keith 同孝信係一夥...」素恩的語氣帶點無奈，「不過我諗你唔知道，Keith 喺孝信班人面前嘅威望，其實仲高過孝信...」

「你知孝信淨係當啲手下係工具，唔理佢哋嘅生死，反而 Keith 就好似次次都為咗啲手下著想。所以孝信大部分嘅手下，都已經私底下埋咗阿 Keith 堆。包括已經變咗節嘅強哥...」

「吓？強哥？」我覺得有點驚訝。「乜佢唔係改個自身，加入咗 King 個團隊咩？」

「老公... 你真係太易信人喇... 你竟然相信強哥會改過自身？」素恩深呼吸一下便再說道，「King 亦只不過係一個進化版嘅孝信，我諗你都知佢唔係好人，阿 Keith 亦知道佢係威脅，所以安插咗強哥喺佢身邊...」

我突然感到一陣暈眩，原來自己的親弟弟，甚至常常與自己稱兄道弟的人，都是各懷鬼胎。



難道，我真的錯怪了 Kimi？

「嗰日同你分開咗之後，我哋就諗住返番你屋企先。不過 Keith 就話留低咗屋企條鎖匙喺酒店，叫我哋三個自己喺福安商場等佢返嚟...」素恩續說。

「我都覺得奇怪，不過 Keith 堅持返去搵，我都冇辦法...」

「於是我哋就入咗商場等，點知過咗一陣，Suki 就見倒街上面有 U 仔出現...」

「咁我哋即刻走上二樓避吓，雖然啲 U 仔好似冇追入離，不過我哋等咗好耐，都唔見阿 Keith 返嚟...」



「我提議不如我哋三個返去先，咁 Suki 就好大反應咁話唔好，啲怪物好恐怖咁。Venus 都好似比佢嚇到好驚咁，結果二比一之下，我只可以陪佢哋繼續等...」

「就咁過咗一晚，第二朝阿 Keith 都未見人。同佢哋商量，佢哋都係想繼續等... 好彩我哋都有啲乾糧，所以嘢食都唔係問題...」

「不過去 toilet 就要行嚟行去，Suki 仲話自己個肚唔舒服，成日都走咗去...」

「有一次佢行開咗好耐，咁我就諗住去廁所搵吓佢喺邊啦！點知去到先知，佢根本唔喺嗰度...」

「就當我諗住返出去嘅時候，就聽到門外面有人聲，咁我就即刻留喺度唔出去住。之後再偷偷地跟住佢哋...」

「原來，係 Suki 帶住阿 Keith 去緊我哋匿埋嗰度。同埋竟然強哥都喺度，仲帶住個𡃁仔...」

「之後我就見到 Keith 同佢哋兩個捉住咗 Venus。Suki 當時都喺現場，不過佢就好明顯同佢哋係一夥，完全都冇去幫 Venus 手。Venus 都有反抗，不過佢哋係咁摑佢打佢，佢喺三個大男人夾攻之下，好快已經唔識反抗...」

「之後嘅嘢無謂再講，佢哋仲虐待到 Venus 奄奄一息... 我好想衝入去救佢，不過我見倒佢哋好似成班野獸咁，我實在太驚唔敢入去...」素恩說時，亦不其然的把我的手握緊。



「唔洗驚，我會喺妳身邊，保護妳...」我安慰著她說。

「跟住我仲聽到強哥佢哋同 Keith 講，話你屋企仲有啲女，所以佢哋就叫 Suki 帶 Venus 上你屋企，氹你出嚟...」

強哥，我真的看錯了你！

還有我的親弟弟...

可惜，現在一切都已經太遲。我現在還困在這該死的山洞，找不到逃離的良方。

「之後我想趕返去話比你知，點知商場突然間出現咗好多 U 仔。我好辛苦先至走倒入去醫務所入面，不過我都成身傷曬，好在最後係你出現...」

我立刻把她抱緊，希望為她帶來一點點的安慰。



「對唔住... 我救唔倒 Venus...」素恩充滿歉意地說。

「我知妳盡咗力，唔好擺喺心度...」我要責怪的，跟本沒可能是她。

氣氛又變得沉重，為免在這一話題上膠著，我只有提出另一題問。

「咁你知唔知 King 係乜嘢人？」我嘗試打開另一話題。

「吖... 我知道佢係其中一個當年有去過韓國，比人秘密注射過病毒原胚嘅其中一個人。而佢好快已經同其他幾個有同樣身份嘅人，控制咗馬鞍山其中一個屋苑...」素恩開始回答著。

「之後佢就不斷擴展勢力，而且佢好早已經知道提升自己力量嘅方法，所以唔少女仔都比佢害死咗...」

我忽然想到 Kimi，於是我向素恩問道，「咁妳知唔知，佢表妺又係咩人？」