［人性/有甜］- 屍•家•馬鞍山（隔日更新）: Chapter 139 - 恆安站 (下)

華叔的反應令大家有點尷尬，於是我提出一個我關心的問題去打破沉默。

「係呢，點解你哋又會嚟咗呢度嘅？」我問。

「唉... 真係説來話長...」Keith 淡淡地説道，「你走咗之後嘅第二晚，我去廁所嗰陣聽倒女廁有啲怪聲，於是我就過去睇啦！點知就比我見倒富仔佢攪緊個女仔。」

「我即刻走去想拉起佢，點知佢就拎起把刀企咗起身，話要殺死個女仔。我怕佢傷害倒個女仔，所以唯有等機會出手。」Keith 續説。

「不過佢轉個頭已經完事，於是我即該走前諗住制服佢，點知佢好激動咁捅咗個女仔幾刀，然後推開我，一路走一路大叫... 我因為要照顧個女仔冇追出去，然後其他人就比佢嘈醒咗，走入嚟睇...」



「原來富仔出到去，周圍大叫話我姦殺個女仔，我就即刻澄清佢先係兇手，同解釋番我見倒嘅嘢，好在大家都肯信我。富仔知道自己嘅奸計失敗，就發曬狂走去大門口... 我哋諗住追出去，但係已經太遲... 佢竟然拉開度大閘，向出面大叫，引曬啲喪屍入嚟，我哋唯有即刻喺後門走...」

「好在華叔喺富仔開閘嗰陣，已經第一時間返入休息室攞武器、背囊，我哋先唔洗赤手空拳咁走，不過好多物資就冇帶走到...」

「之後一路走落二樓，見到我哋原本泊車嘅方向，有好多喪屍追過嚟，咁我哋唯有行另一邊，向馬鐵站嘅方向走。」

「不過帶住班老弱婦孺走，根本就走得唔快... 我哋亦都用曬啲子彈，而喪屍就越嚟越多，無辦法之下，我哋唯有邊戰邊退。」Keith 説著帶點神傷。

「直至走到恆安站，就已經淨番我哋幾個，同住喺嗰邊嗰個女人...」Keith 指著我們身後的一個帳篷説道，「 於是我哋就喺呢度過咗一晚...」



「唉... 辛苦曬你喇... 咁即係頭先指住我哋支槍...」我問道。

「係冇子彈嘅...」Keith 搶先答道，「不過你知㗎啦，冇子彈嘅槍都可以好有阻嚇性...」

「咁又係...」我回應道。

「咁嗰個富仔，係咪死咗喇？」素恩忽然問道。

「吖... 我諗應該係啩... 一切都發生得好突然，我都見唔倒佢最後點...」Keith 回應道。



「咦？妳識嗰個富仔㗎咩？」我好奇問。

「喔... 唔係... 之不過你哋講倒佢咁，我驚佢返嚟報仇啫。」素恩冷冷地説道。

「係都唔出奇呀！」身後突然響起一把女性的聲音。

我們把身體移動，面向著這個三十來歲的女人。

「佢嗰日死都咬定係你做㗎喎，仲一怒之下走咗去開門添！你估佢唔知死呀？佢咁樣以死明志，我都懷疑緊單嘢係咪佢做嘅... 不過而家冇啦，人又死曬，又冇得 check DNA，永遠都冇人知邊個係真兇囉！」女人續説。

「妳有冇攪錯呀？佢有份救妳出嚟㗎，而家就恩將仇報！同埋我知道佢一定唔係咁嘅人囉！個富仔之前係點，妳都有眼睇㗎啦！」Suki 不忿地説道。

「哼！一單還一單，人係會變㗎！尤其係男人... 當你身邊成日有班女人圍住，而你又有絕對嘅權利擁有佢哋，啲男人又點會嫌多吖... 就好似而家啲食物咁，係人都有幾多攞幾多啦，又無王管，有乜所謂吖！」女人説得理直氣壯。

不知是否於心有愧，我們兩個男人，頓時無法反駁...



「如果我係妳，我就出少句聲喇... 妳講到咁肯定係佢做，妳而家又當住佢面識穿佢，妳唔怕下一個受害者就係你咩？」還是素恩幫忙打完場。

「我... 我... 我驚咩呀？我... 我而家講咗，真係有乜不測，咪係人都知係佢做囉！我洗驚？」女人的態度依然高傲。

「呵呵！如果佢真係殺咗妳，妳可以點呀？搵人幫妳報警，將兇手繩之於法？等妳沉冤得雪？嘿嘿！到時咪淨係由得妳條屍喺度等吽臭！」素恩毫不客氣地説。

「超！喺度凶我呀？老娘嚇大㗎！我都費時同你哋講喇...」説罷她已經開始步回自己的帳幕中。

「唔該曬妳呀，素恩。」Keith 向素恩道謝。

「唔好誤會，我冇諗住幫你，只不過係有話直説啫...」素恩冷淡地回應著。

「吖... 咁，你哋諗住之後點？」我只有再轉換話題。



「唔知呀！要等華叔心情好啲先...」Suki 説著望向華叔的營帳。

我看著 Suki 的神情，好像仍有著説不出的悲傷...

「不過而家 Vicky 佢哋唔見咗，係咪可以去搵咗佢哋先？」Suki 忽然轉向我説。

「嗯... 我原本就係想同你哋滙合之後，就出發去搵佢哋... 不過而家個情況咁，我諗要等多一日先...」我答道。

「吓？你仲諗住等？佢哋而家嘅處境可能好危險喎！不如我哋自己去搵佢哋啦！」素恩説道。

「唔洗等喇！」這時，華叔忽然在帳篷中走出來，「比我哋準備吓，十五分鐘後就出發！」