［人性/有甜］- 屍•家•馬鞍山（隔日更新）: Chapter 140 - 麻煩的女人

於是他們便開始執拾，我亦借機休息一下。

「喂！妳哋就咁走曬去，咁我點呀？」剛才的女人又突然出現。

「喂，大嬸，我哋冇責任去保護妳㗎喎！」Suki 已經搶先回應。

「哎吖，妳個死𡃁妹吖！完全好似未發育咁，妳憑咩咁同我講嘢呀？如果唔係你哋激嬲咗富仔，我洗乜同你哋走難嚟呢度呀？呢度水都冇滴，淨係靠嗰啲咁嘅乾糧，夠邊個食呀？我唔理你哋呀，起碼要安全送我返天宇海先好走！」女人趾高氣昂地説著。

「妳啱啱先話佢係殺人兇手，而家又話要跟住我哋走，妳都好無賴啫！」Suki 毫不退讓。



「我冇話要佢陪我去喎，一係妳哋是旦搵人保護我返去啦！」女人回應説。

「你哋仲同個女人癲呀？我行得喇喎，你哋行得未？」華叔突然出現在衆人面前。

「行得！」大家異口同聲地答道。

「好，咁出發啦！」華叔一聲令下，大家便開步離開。

「喂！你哋班衰人吖！咁唔負責任嘅！喂！」女人仍舊在咆哮著。



我們沒有理會她，一直往升降機口走去。

我們踏進升降機... 此時，看見女人正急速地奔跑過來。

「等埋呀！你班衰人！」女人邊跑邊叫著。

「咇咇咇咇...」升降機門正在關閉，但沒人打算去按動那開門制。

𨋢門差不多要關上，卻突然傳出「噹噹、噹噹」的聲響，升降機門再徐徐地打開。



女人進入升降機後，立刻破口大罵，「你哋有冇攪錯呀！明明叫你哋等埋我，都唔幫我㩒住度門...」

升降機內沒有回應，只剩下女人急促的喘氣聲。

升降機再次開動到達地面大堂，𨋢門打開後，我們便擺好陣式，觀察四周的情況。

四周雖然屍橫遍野，但沒有看到喪屍的身影。看來剛才的戰鬥，已將附近的喪屍滅絕。

「阿素恩吓嘛？而家開始，妳帶路好冇？」華叔問道。

「唔... 原本我哋五個，都啱啱夠坐我哋㗎車，不過而家就突咗個...」素恩回應著。

「你哋咁即係咩意思啫？我唔會理㗎，我一定會跟住你哋，有咩你哋自己諗啦！」女人不忿的説道。

「嘩！依家啲人嘅面皮真係九丈厚！要靠人仲阿吱阿咗！」Suki 異常不滿地説道。



「喂！如果唔係你哋，我洗咁慘！而家係你哋欠我嘅，我要你哋還係天經地義嘅！」女人依然理直氣壯。

「咁不如我哋兵分兩路，一邊帶佢返天宇海，一邊就去救 Vicky 佢哋。素恩，知唔知 Vicky 佢哋比人困咗喺邊？」我提議道。

「應該喺海澄軒。」素恩答道。

「咪住，點解妳又會知 Vicky 喺嗰度？」華叔已經感到不妥。

「你唔好問咁多，總之我就知佢哋喺嗰度，比人困住咗，好危險。」素恩續説。

華叔聽後，示意我和 Keith 走到一旁，然後輕聲跟我説，「你真係信佢講嘅嘢？我睇呢個好大可能係陷阱嚟...」

「華叔，我明吖... 不過我女友同 Vicky 比人捉咗係事實，如果我唔去，我驚佢哋有危險...」我坦然回答。



「嗯... 咁好啦，我哋就借啲意兵分兩路，我哋做完嘢就儘快趕去你嗰邊，就算有咩事都唔會比人一網打盡。」華叔説出他的計劃。

「嗯...」我跟 Keith 表示認同。

「咁好啦！既然佢都幫唔倒咩手，我會同阿 Keith、Suki 送佢返去先，阿 Roy 就同素恩去打探一下先，但係千祈唔好有咩行動，我哋之後再喺番恆安站呢度滙合...」華叔向眾人説明他的計劃。

「唔得！」此時，有兩把聲音反對著這個安排，一個是 Suki，另一個竟是素恩。

我萬料不到，素恩竟也急得脱了口。

氣氛忽然變得沈默，結果還是 Suki 先開口，「我唔會同呢個大嬸一齊去！」

「唓！妳肯去，我都唔肯啦！」女人反駁著。

「Suki，唔好咁任性啦！」Keith 亦希望 Suki 跟隨華叔的安排。



「我係咁任性㗎喇！總之我唔會同佢一齊！」Suki 不明白我們的用意，只有極力堅持著。

「Suki，聽華叔講送咗佢番去先啦！如果沿路有喪屍，得華叔一個人會好危險... 妳係我女友嚟㗎，過嚟一齊共同進退好唔好？」Keith 努力勸説著。

「總之我決定咗就唔會變！我... 我又冇叫妳陪我，我哋之後再滙合囉！」看來 Suki 不會妥協。

我不便再加入勸説，以免引起素恩的不滿。權衡輕重，還是 Vicky 與 Carey 的安危對我比較重要。

更何況這又不是我的要求，就讓我自私一次吧！

「唔緊要啦，既然 Suki 佢咁堅持，我哋會睇住佢㗎喇！」我還是説出了埋沒良心的一句話...