［人性/有甜］- 屍•家•馬鞍山（隔日更新）: Chapter 138 - 恆安站 (上)

我跟隨素恩走進無人的恆安站，赫然發現所有通往上層的路徑，都已經被木板封死。

我們別無選擇，只有前往那直通月台的升降機。

升降機停留在月台上，像是告訴我，月台上應該有生還者的存在。

這令我既緊張，又擔憂。因為遇上生還者，可以是福，也可以是禍。我只希望失散的同伴，能出現在他們之中。

等待期間，素恩突然認真地跟我説，「一陣間如果有人問起，你唔好打算揭穿我，如果唔係，後果自負！」



我當然知道後果自負的意思。

這時，升降機門打開，我們便向未知出發。

以防萬一，我們仍舊手握武器，不敢鬆懈。直至升降機到達月台，𨋢門除除打開...

「舉高手，全部咪郁！」一把熟悉的聲音喝道。

「Keith?」我看著面前的男人，激動地叫了出來。



「大、大佬，真係你呀？」Keith 興奮得立刻向我擁抱。

「你返嚟就好喇！咦？呢位喺？」Keith 看見素恩後問。

「佢叫素恩，之前同你哋講過嘅韓國女仔。」我回答。

「哦... Hello，my name's Keith，nice to meet you...」Keith 向她自我介紹起來。

「Hello，你好，我叫素恩，多多指教。」素恩回應道。



Keith 轉身用奇異的眼神看著我。

「噢！唔記得同你講，素恩識講廣東話嘅...」我回應他的疑問。

Keith 以怨恨的眼神回敬我後，便向素恩答道，「哦... 你好...」

「咦？Vicky 同你女友呢？」Keith 打量𨋢後問道。

「唉... 説來話長... 不如，入去先講？」我不想一直站在升降機內交談。

「吖... 係，順便帶你哋去見 Suki 佢哋...」Keith 搔著頭回應道。

我們步出升降機，看見月台上放置了許多，大大小小的營帳。

「呢度，好多人住㗎？」我好奇問。



「我初頭都以為係，但之後發覺全部都係空嘅帳篷。呢度應該有人生活過，不過唔知咩原因全部走曬...」Keith 解釋道。

「咁啲帳幕裡面有冇異樣？好似，血跡之類？」我覺得奇怪。

「我哋都有搵過，不過冇發現... 佢哋好似有計劃咁走，仲冇諗住返轉頭...」Keith 説道。

「莫非，佢哋有辦法離開馬鞍山？」我推論道。

「都有可能... 不過我哋都係琴日先到，暫時都搵唔倒啲咩線索...」Keith 回答道。

説著説著，我們已經走到月台盡頭的幾個帳篷面前，Keith 於是呼喚同伴們出來。

華叔和 Suki 仍在，只是大家看來都有點疲累。我環顧四周，竟看不見 Suki 媽媽的身影。



而當我注視著 Suki 通紅的雙眼，一切都也盡在不言中...

一輪寒喧問好之後，大家的注意力都集中在我身旁的素恩來。尤其是華叔...

「喂阿 Roy，你唔係話返去搵你女友同我個女㗎咩？點解唔見佢哋㗎？反而又多咗另一個女仔？」華叔説著有點生氣。

「吖... 我番倒去屋企已經唔見咗佢哋兩個... 咁我第日咪諗住返去恆安商場 join 番你哋囉，點知返倒去冇曬人，諗住落超市搵，就比我見... 見到... 華嫂...」説到這裡，我不太忍心再繼續下去。

「你見倒華嫂，佢點呀？」華叔緊張地叫道。

「吖... 佢... 佢死咗...」我硬著頭皮説出來。

「吓...」華叔聽後，一時之間説不出話來。

「咁... 之後呢？」Keith 接力問道。



「之後... 我遇倒人猿怪物，比佢打到重傷... 就喺佢想解決我之際，素恩及時趕到，救咗我...」我打算隱暪關於華嫂異變的事。

「之後佢救咗我返去，休息咗一晚，然後第日就到咗呢度...」我續説道。

華叔沒有作出任何反應，只是暗自神傷，Suki 亦走了過去安慰著。反而 Keith 看著素恩，露出一點感激的眼神。

一會後，Keith 突然問道，「係呢，點解你會知道我哋喺恆安站呢度嘅？」

「吖...」我一時間想不到怎去解釋。

「因為之前阿 Roy 同我講，佢喺恆安商場搵唔倒你哋，咁我咪揸車四圍搵吓囉... 點知我見倒呢度附近聚集咗好多喪屍，我哋就諗會唔會你哋就喺附近，於是過嚟碰吓運氣囉！」素恩搶著替我解釋。

「哦... 原來係咁...」我為素恩的故事抺了一把汗，不過 Keith 好像對這解釋感到滿意。



「嘿嘿...」沈默不語的華叔突然冷笑著，「唉... 你哋慢慢傾啦！」説著他已經動身返回營帳之中。

難道，他已經看得出這只是個謊言？