［人性/有甜］- 屍•家•馬鞍山（隔日更新）: Chapter 110 - 筆記

我回到休息室，打算向華叔他們道別。

「華叔，我諗得好清楚，我想自己返一返去先。就算 Carey 真係要變喪屍，我都想親自陪佢行埋淨低嘅路...」我向華叔説出我的決定。

「唔... 你始終都決定咁做...」華叔淡淡地説著。

「係... 我諗呢度暫時安全，我做完自己嘅嘢之後，我會盡快返嚟...」我回應道。

「唉... 咁你自己小心啲啦，速去速回...」華叔説著有點失望。「嗱，呢條係小巴車匙... 而家周街都係喪屍，你冇車好難返倒去㗎！」



「唔洗喇華叔，㗎車要留番嚟載出面啲人，一陣間我唔小心撞咗，或者用曬啲油就煩...」我把車匙退回給他，「唔洗擔心我，馬鞍山通街都係單車，我搵倒㗎無鎖嘅就可以返倒去㗎喇...」我看著他那擔憂的神情，「放心啦！我會安全咁帶埋 Vicky 過嚟㗎喇...」

我放下已經子彈不多的衝鋒槍和手槍，豈料華叔還是將一把已經上滿子彈的手槍交了給我。

「出面咁危險，你點都要把槍傍吓身嘅，放心啦，呢度我哋應付得到！」華叔拍著我的膊頭説。

於是我拿起士巴拿，清空背囊後便打算離開，收拾間，我發現那本早已遺忘的記事簿。

華叔亦有注意到這本外表普通的記事簿，「咦，估唔到今時今日，仲有後生仔隨身帶住本記事簿喎！」



當然，在這個智能手機的年代，我絕對不是這手寫記事簿的用家，於是我連忙澄清，「哈哈，唔係啦，本嘢係我上個禮拜喺新港城執㗎，裡面啲韓文我又睇唔明，但我又覺得本嘢好似好重要，咪諗住 keep 住先囉！Keep keep 吓，自己都唔記得咗...」

「韓文？可唔可以比我睇吓？」華叔要求著。

「華叔，你竟然識韓文？」我對此感到驚訝，原來懂韓文並不是酷愛韓星韓劇的少女專利。

「有咩問題呀？為咗查呢件案，我特登去咗學韓文，雖然唔講得出好叻，但一般嘢對我嚟講應該冇難度！」華叔充滿信心地説。

於是我把筆記薄交給華叔，由他把當中的內容敍述出來...



Z病毒

一生人只會被感染一次，感染後便會產生抗體，以防二次感染。感染後的行為依照病毒的份量而定，大致可分三類...

初期感染：感染程度低，一般透過小傷口（如抓傷或輕微咬傷）或受初期感染者的體液感染。患者初期很可能發生發燒/嘔吐/昏迷等免役力失調症狀。之後能自主行動，沒有表面病徴，但基本生存慾望（如食慾，性慾等）會被放大，性格亦因而被改變，數天內漸漸失去自制能力。

中期感染：感染程度中等，一般由大傷口（如嚴重咬傷）做成，患者四小時內完全失去自制能力。

未期感染：感染程度嚴重，一般是患者受感染而死亡做成，患者在死亡後數分鐘內恢復活動，但完全喪失自制能力。

臨床研究發現，一些初期患者能停留在初期感染程度。各感染期患者的變異速度亦因人而異，實際原因尚待考證。但可以確定的是，不論感染程度，感染者死後必然會變異為感染體 I (Initial) 或 U (Ultimate)。

感染體I：由病毒感染異變而成，力量雖被強化，但大腦思維及神經系統被破壞，故它們失去思考及痛感等能力，只憑簡單的食慾及反應去支配其行為。

感染體U：由初期感染者異變而成，初期感染者中有少於 1% 會異變成最終形態（感染體U），其餘的會跟隨一般感染者變成初始形態（感染體I）。感染體U的骨骼、肌肉及皮膚會因異變而異常強化。感染體U的一部份思考能力會被保留，但主要受破壞殺戮支配思維。



經臨床證實，生肉為感染體I的主要食糧，而感染體U的食糧則未經證實，只確定感染體I亦為其食糧之一。但在極端情況下，不排除兩物種皆會擊殺同伴為食。而在完全缺乏糧食下，兩者的最長存活期皆為七天。

據資料所得，一部分人曾經被殖入病毒原胚，其效果及影響有待觀察。

感染者U身體受強化，一般刀槍不能對其造成傷害，而且移動速度極快。其弱點尚待確認。

據觀察所得，感染者I及U皆可以被控制，其控制條件未明。

==========

華叔把只有數頁的筆記讀完，大家聽後都一時説不出話來。

「上面講嘅嘢，係咪... 真㗎？」Suki 首先用微顫著的聲線打破沈默。



「吖... 佢都講得出喪屍大部分嘅特徵，我諗都應該好堅...」Keith 回應著。

「唔... 呢個我有少少保留，筆記上面講一啲關於喪屍同病毒嘅嘢，都同現實相似，應該都可信... 問題係你上個禮拜已經執倒本嘢，而喪屍事件爆發咗都唔夠兩個禮拜，點解上面已經有咁多資料？除非...」華叔分析著説。

「除非喺事件爆發之前，有人已經偷偷哋進行咗活人實驗...」我大膽假設著説...