［人性/有甜］- 屍•家•馬鞍山（隔日更新）: Chapter 109 - 新的團隊
「原來呢件事並非單一事件，甚至係有組織、有預謀地發生，已經觸及到國家安全嘅層面，所以警隊內部一早已經界定為高度機密，除咗警方高層同一小部分官員，其他人都冇權去睇...」華叔續説。
「直至喪屍事件爆發，我先明白幕後黑手要策劃嘅究竟係咩事，但佢哋嘅目的，有冇進一步陰謀，病毒有冇醫治方法，我都無從得知... 甚至簡單到，我啲屋企人有冇事，我都一無所知...」華叔説得有點哽咽。
「所以，你想搵吓有冇解藥，可以去救屋企人...」我回應道。
「嗯... 我都幾肯定老婆同個女都有殖入咗唔知抗體定病毒，一日唔知道真相，一日都只可以提心吊膽...」華叔説道。
「我知道我個女都好鐘意你，之前成日喺我面前提起你，所以當你帶咗另一個女仔嚟話係你女朋友，佢真係好傷心... 佢又怕你知，喊都唔咁大聲... 我睇住佢咁，真係好想打柒你...」華叔咬牙切齒地説道。
「不過佢不顧一切咁阻止我，又話你哋根本未開始，唔怪得你... 我先迫於無奈放過你，不過我始終諗住遲早打你一鑊甘嘅...」華叔依然怒目相向。
「之後同你一齊出去，我都只係將 Keith 放喺身邊，因為我真係唔想你黐埋我度。不過一路相處落，我就明白點解啲女仔會鐘意你，連我都開始肯嘗試接受吓你，哈哈...」華叔開始面帶寛容。
「所以我而家好認真咁問你，你會唔會加入我哋，為咗尋找真相、為咗保護身邊嘅人而戰？」華叔問道。
我心中突然鼓起一陣熱氣，然後手握拳頭地答道，「好，我加入！」
「好，好，我果然冇睇錯人... 不過有件事，我一定先要同你講清楚，就當係新加入嘅試練... 因為相同嘅事，可能陸續有來...」華叔的話，突然把我亢奮的心情拉了下來。
「你女友 Carey，佢未必有抗體，如果佢有同你親熱過，而你又冇做預防措施，據我嘅推測，佢有好大可能會異變...」華叔淡淡地説著。
雖然我一早心裡有數，但經由他人説出來，這個真相好像來得更加震撼。
「所以，我叫咗 Vicky 留意住佢嘅情況。必要時就用槍去解決...」華叔繼續説道。
「咁，點解你又要比枝槍比 Carey？要佢哋自相殘殺？如果 Vicky 真係開槍殺死 Carey，你叫我以後點樣面對佢？」我激動地問道。
「首先，喪屍應該唔識用槍嘅... 不過以防萬一，我比 Carey 枝槍係冇子彈嘅... 至於你第二個問題，如果你女友真係異變咗，佢已經唔係你認識嘅人，喺咁嘅情況，邊個殺，又有咩分別？如果佢喺你面前，你又會唔會當機立斷開槍？稍一猶豫，有事嘅唔單止係你，仲有你嘅隊友。所以，呢個心理關口，你一定要過！」華叔再次變得嚴厲。
「呀～」我一時接受不到，轉身離開休息室，一直跑至大門前才停下。
大廳中的人都被我的行為嚇著。
「哥哥哥哥，你冇事吖嘛？」説話的是一個比旋旋年紀小一點的小妺妹，她正向著蹲著哭的我，拍著膊頭問道。
「哥哥唔好唔開心啦，我請你食糖吖...」小妺妹把我們在超市拿回來的糖果，遞了給我。
我看著小妺妹那天真無邪的笑容，令我想起了旋旋、想起了小喬、想起了 Coco...
而現在，Carey 也將於我的生命中消失...
「唔好唔開心啦，媽媽話哥哥係好人，唔顧危險咁去救我哋，好人一定會有好報㗎！」小妺妹笑説著。
「嗦嗦... 小妺妹，你叫咩名呀？你媽媽呢？」我忍著淚向她問道。
「我叫 Fiona，我帶你去見我媽媽吖...」説罷，Fiona 已經拖著我的手往前走。
轉眼間，我已經被帶到一女子面前。
「Hello，我叫 Roy，你好！」被帶到她面前的我，帶點尷尬地説道。
「Hello... 我叫 Connie，坐吖...」她邀請呆站著的我坐下。
眼前的 Connie 雖然稱不上是美女，但柔弱的外表加上真摯的笑容，帶給人親切的感覺。
可愛的 Fiona 亦乖乖地坐在她的身旁，Connie 則在溫柔的輕撫著她的秀髮。
「介唔介意話比我哋知，你有咩唔開心呀？」Connie 向著我問道。
我沒有打算向其他人道出我的問題，因為一般人根本不會明白我們的狀況。於是我只向她們訴説女朋友身陷險境，而我竟也無能為力的困境。
「唔知你知唔知，我老公原本同我哋一齊開開心心咁飲茶，點知突然發生啲咁嘅事，我老公又同班人出咗去之後冇再返嚟。當時我唔知點算，一個同我一直走咗好耐嘅親人，就突然喺我生命中消失，令我突然想放棄一切...」Connie 再次輕撫著 Fiona 的頭髮，「不過，當我知道自己仲有其他人需要我嘅守護時，我唯有咬緊牙關堅持落去... 雖然我唔知道你女朋友對你有幾重要，不過如果你仲有需要守護嘅人，或者你真係已經無能為力，我覺得你唔應該就咁放棄自己囉...」
我雖然也十分明白她説的大道理，但要我放棄一個對我信任和依靠的人，我萬萬做不到。
就算她真的要變成喪屍，我也要好好的為她作出終結，雖然不知道自己是否承受得了，但我不想再令信任我的人失望。
但這一次，我不再容許自己不遲而別，於是我打算返回休息室，與同伴們道明我的決定...