［人性/有甜］- 屍•家•馬鞍山（隔日更新）: Chapter 12 - 消失的強哥

一言驚醒，我們望向露台玻璃門，果然看不見強哥的身影。但由於玻璃門只看到整個露台的一半範圍，另一半被石屎牆遮蓋，我們無法得知牆後的情況。只有走過去打開牆上的小窗，或打開玻璃門才能查看清楚。

我們走到玻璃門邊，嘗試側身窺看門外的情況，門外除了一些衣架用具及盆栽外，甚麼都沒有。但是我們不能夠看清強哥有否躲在牆後。最令人忐忑的，是我們看見原本綁住強哥的滑鼠線，已經被人擱在一旁。

「洗唔洗搵佢哋幫手，好似有伏...」Keith 問道。

「嗱，我開門出去睇，你攞住把刀殿後，冇事嘅！」不知哪裡來的膽，不過我不想每次都要找 Ben 幫忙，因我覺得我們不是同路人，總要自己照顧自己。

我與 Keith 打了個眼色，便將手放在鎖上準備把門打開。門鎖「躂」的一聲打開了，我的心跳不斷加速，眼望著死角，以便一有任何風吹草動，便立刻把門重新上鎖。



沒有預期的衝擊，我便把門除除打開。我只把門打開了一半，跟著便快速地把頭伸出去看並立刻縮回，結果是在意料之內。

我把門打開多一點讓自己通過，我一手拿著刀探出去，果然甚麼都沒有。

我四處張望尋找強哥身影，但這個人好像人間蒸發般消失了。

我把刀放回腰間，並示意 Keith 可以出來看。「唔見佢，應該走咗！之前喺樓下啲喪屍都唔見曬，應該係佢引走埋。」

「有冇可能爬咗上去？」Keith 向上層張望。



「我頭先都諗過，不過以強哥嘅身形，同條欄與上層嘅距離，可能性都好低吓。」我估算著。

「其實，如果強哥已經引走晒啲喪屍，我哋係咪可以試吓出去睇下而家咩情況？」Keith 問。

「我始終覺得睇定啲會好啲。何況都就嚟天黑喇，而家先出去真係會好危險，都係過咗今晚先算啦。」我始終認為，應該要從長計議才作進一步行動。

「咁好啦。不過使唔使同佢哋講強哥已經走咗？」

「我諗可以等佢哋落返嚟先講，強哥走咗已經係事實，唔使特登同佢哋講啦！不如同 Suki 佢哋計劃吓聽日點行仲好啦。」我説。



我們返回客廳，並告知她們強哥已經離開。他們的反應不是很大，是的，誰會去理會一個相識不久又好色的大叔？根本恨不得他早走早著。

「我哋聽日會唔會同 Ben 佢哋一齊出發？」Suki 問。

「同佢哋一齊好似有個照應會好啲。不過，我都唔知佢哋會唔會同我地一齊行，始終大家嘅目的地可能都唔一樣。」我説。

「其實，我哋會唔會落去探吓咩環境？照頭先咁睇，附近應該冇乜喪屍...」Keith 問。

「佢哋走得咁快，如果比佢地發現咗，我哋未必走得甩。」Vicky 有點擔心。

「咁不如上天台望吓？就算走，都要睇定點行。」我提議。

我們再次踏上天台來，天色已經開始轉暗。我們遠望西沙路一帶仍有不少喪屍聚集，但沒有再出現較早前出現的撕殺追逐場面，只是漫無目的地遊蕩著。

「如果要返去恆安，就要經過烏溪沙同市中心。行大路最快，不過沿途應該都有唔少喪屍。」我分析道。「一喺就行馬鞍山繞道，嗰度應該冇人行，有喪屍嘅機會比較低，不過就要行遠啲。」



「我都覺得行馬鞍山繞道會冇咁危險，不過去到嗰邊之前，都要行前面帝琴灣前嘅西沙路，嗰度可能會有危險。」Keith 指著前面一排淡粉紅色的屋苑道。

「無論點行，都無可避免會遇倒啲喪屍，我哋要整定的武器保護自己。」我説。

「嗚......」這時，遠處傳來略高頻的引擎聲，空中的黑點漸漸變大...