［人性/有甜］- 屍•家•馬鞍山（隔日更新）: Chapter 11 - 工作分配

「我都贊成唔比！」不知何時 Eva 已經站在我們身後。「你哋唔洗擔心度玻璃門會爛，因為係強化玻璃嚟，佢冇乜可能打得爛嘅。如果佢嘈咪由得佢囉，啲喪屍又上唔倒嚟！」

「之不過...」

「不咩過吖，呢度係我屋企，我話事！況且你見過佢點對我嫁啦，我大條道理對佢差嘅！」Eva 說著搶走 Keith 拿著的餅乾。

「嚟嚟嚟，過嚟坐低繼續傾埋佢。」Ben 打完場道。

強哥見我們再次坐下，沒有給他食物的意思。便一邊破口大罵，一邊用腳狠狠踢著玻璃門。



樓下的喪屍被吸引而吼叫著，Eva 索性把所有窗關閉，開著空調來隔絕外界聲音。

「好，頭先 Kimi 已經幫手開咗阿哥間房。咁即係有四間房分，不過書房得一張單人梳化床，而我已經同 Kimi 夾咗今晚喺我房孖舖。剩低啲房你哋自己分配喇！」Eva 道。

「我諗 Suki 同 Vicky 可以訓客房，Ben 兩公婆可以去 Eva 阿哥房，我同 Keith 住書房就 ok。」我提議道。

「其實...有冇人諗過返番屋企？」Suki 憂心道。「我媽媽喺恆安，好想睇吓佢點。」

「我屋企人都係，好掛住佢哋。唔知佢哋會唔會走咗出嚟搵我...」Vicky 說罷，已經與 Suki 雙眼通紅。



「咁你哋呢？我就同 Keith 住馬中。屋企人一早唔喺度，冇乜牽掛。不過我女友就去咗 camp，聯絡唔倒。」

「我同老婆搬嚟冇耐，住銀湖。屋企人住港島，而家應該比我哋安全。」Ben 説。

「吖...我住西貢，去完馬鞍山補習諗住番屋企。屋企人喺外國，而家同人夾份喺西貢住。」Kimi 的神情有點古怪。

「我唔洗多講啦，同阿哥相依為命，講完！」Eva 沒有多餘的描述。

「咁係咪會番去？」Suki 追問。



「會，一定會，不過唔係依家。」Ben 續説。
「出面嘅情況大家都見，通街都係喪屍，如果跑唔過佢哋，根本就係送死！」

「我都覺得不如今晚喺度唞吓先，呢度應該暫時安全，如果而家番去好快就天黑，摸黑喺條街行好似好危險。」我説。「不過就算留喺度，都唔代表百分百安全，我提意我哋幾個男人要輪流值班，以防突發事件。」

「你都講得有道理，咁不如就由我喺今晚十一點開始，兩點鐘叫醒第二人接班，第二更再喺五點叫醒第三更，大家八點鐘起身，好唔好？」Ben 提出意見。

Keith 點頭表示同意。

「我哋 ok。咁我就接你更啦，Keith 之後再替我。」我説。

「好，就咁話啦！咁保安工作主要交比我哋三個，Suki 同 Vicky 識唔識煮野食？」Ben 看著她們。

「簡單野我哋應該 ok。」Vicky 答道。



「咁我哋嘅三餐就交比你哋啦！至於Kimi...」

「我可以負責留意外面嘅資訊，睇吓可唔可以上倒網，同外面聯略。」Kimi 搶先道。

「唔...呢個提議唔錯，咁老婆不如負責管理物資吖？」

「唔得，呢度係我屋企，所有物資應歸我管！」Eva 搶先作出反對。

「我唔同意囉，物資唔代表一定係你屋企野。佢哋背囊啲食物應該係佢哋自己嫁囉！就算佢哋肯拎出嚟，都應該係公家野，交比你我唔放心囉！」Karen 毫不退讓。

「咁你又放心留喺度？咁唔滿意你就而家走吖！」Eva 不忿地反駁。

「好，我哋而家就走！出去比野咬死都好過留喺度睇人面色！」Karen 説著便拖著 Ben 要離開。

「唉，你哋一人少句啦！」Ben 有氣無力地說。「點都好，過埋今晚先，無謂鬥氣，而家出去就等於送死，我唔想咁快死住，我仲有好多野想做！」



「不如一人負責一啲吖？」Kimi 提議。「Eva 姐負責原本屋企嘅物資，而 Karen 姐負責公家物資咪 ok 囉！」

「是但啦，費事成日話我搵交嗌！冇乜野嘅話，我哋上房唞吓先啦，食得飯叫我哋！」説罷 Karen 便返回房間。

「咁好啦，我哋各自執拾吓，有咩遲啲再傾啦！」Ben 緊隨著。

Eva 跟 Kimi 亦上房休息，大廳只剰下我們四人。

「覺唔覺喺度並唔係咁安全？」我問。

「我都覺。佢哋咁樣遲早出事，不過我諗住留一晚就算，無謂理人哋咁多。」Keith 躺在沙發伸著懶腰道。

「其實你哋有冇留意一樣野？」Suki 問。「露台嗰邊好似好耐都冇動靜。」