［人性/有甜］- 屍•家•馬鞍山（隔日更新）: Chapter 13 - 軍方直升機？

「直升機！有直升機呀！」Keith 叫道。

「喺咪嚟救我地㗎？喂呢邊呀！」Vicky 興奮地一邊跳一邊揮手叫道。

「咪住，呢架野唔似係嚟救我哋嫁喎。」我放眼望去，這一架直升機兩旁有著向外伸展的機翼，掛著兩個圓筒形的發射器。無論甚樣看，都不像一架救援直升機。「呢架應該喺一架武裝直升機嚟。」

「有乜所謂吖，比佢地發現我哋都好呀！」Suki 沒有理會我，繼續與 Vicky 一起揮手。

我掃視其他屋的屋頂，果然有不少人也走到屋頂求救。這頓時令我覺得充滿希望，因為存活的人也不少。



「你睇，其他屋都有人吖！Hello！」Vicky 興奮地與其他人揮手。

直升機徘徊了一會後便向西貢方向飛去，巨大的引擎聲在街上牽起了一陣騷動，但一切很快便平靜下來。

「咦？頭先唔係有直升機咩，好鬼死嘈！」Kimi 與 Eva 一起上了天台。

「喺呀，喺呀！不過佢哋飛嚟睇咗陣就去咗嗰邊嚕。」Suki 指向西貢方向。

「咁喺咪好快有人嚟救我哋？」Kimi 問。



「唔知，不過我希望喺。」我向著遠方的西貢望去。

我們回到大廳，電視仍在播著重覆的新聞。Kimi 亦已放棄嘗試上網，我們在客廳閒談，訴說著大家去西貢的原因，或事件發生的可能性等。可能大家都只是在今天才相識，談話內容不是太深入，我想大家都只在打發時間罷了，可況今晚過後，我們會否走在一起也是未知數。

「一節最新消息！」電視響起了久違的公佈。「政府宣佈，由於新界東部發生嚴重事故，封鎖區內情況未受控制，仍有為數不少嘅暴徒進行破壞，政府需要動員本港可用人手去恢復社會秩序，遂於下午七時宣佈全港進入緊急狀態。駐港部隊亦已經奉召主出動。以下，為政府頒布緊急狀態下市民的應變措施...

1/喺封鎖區，即西貢及馬鞍山一帶嘅市民應採取防禦措施，防止暴徒進入室內。所有該地區既市民應立刻返回室內，留意門窗是否已經鎖緊，遠離窗邊以防止吸引暴徒注意。軍警已經出動以協助封鎖區市民，請密切留意政府最新公佈及安排。

2/新增沙田為戒備區域，與將軍澳及彩虹一帶市民一樣，應儘快返回室內，等侯政府進一步安排。



3/為防止不實訊息引致不必要恐慌，封鎖區及戒備區嘅對外通訊已經中斷。任何人未得政府許可，不得出入相關區域或進行拍攝採訪，違者會被即時拘禁。

4/非封鎖或戒備區域嘅市民，一切生活如常。但不得靠近封鎖或戒備區域，否則亦會被即時拘禁。

重覆一節政府宣佈...」

「超，乜野暴徒啫，喪屍就喪屍啦！成日忍瞞事實！」Keith 怒道。

「比著你都會咁做，如果唔係全港都會亂曬。」Ben 插咀道。「何況都冇人可以證實呢啲係咪喪屍，叫暴徒好切合適啲。」

「我就唔會咁做啦，大家都應該有知情權，咁樣呃啲市民就唔啱！更何況佢哋都可能有親人喺呢度，你叫人估估吓咪仲衰！」Keith 反駁。

「我明白，不過我覺得應以大局為重...」

「大局為重，大局為重，咁即係你會因為大局而犧牲身邊嘅人？」Keith 沒有等 Ben 說完。「我真係做唔出囉！」



「小朋友... 估唔到你仲係有呢啲咁小朋友嘅諗法，遲早累死你！」Ben 冷眼對著 Keith 説。

「吖，你哋肚餓未？不如我同 Suk 去煮野食囉！阿 Keith 阿 Roy 入埋嚟幫手啦！」就這樣，他們便在 Vicky 的呼喚下結束這場爭論。食物煮好後我們便在大廳進食，大家亦沒有再多的討論，新聞沒有新的消息，外面亦沒有特別事發生。

轉眼已經近十一時，我們亦各自回房睡覺。根據之前的協定，Ben 留在大廳負責值第一班...