［人性/有甜］- 屍•家•馬鞍山（隔日更新）: Chapter 10 - 慘劇

我們來到天台邊向街外觀望，映入各人眼內的盡是死人追逐活人的情景。還有一堆堆圍在一起，應該是在大快朵頤的喪屍。

不遠處看見一名少女爬出藏身的貨車底，向著我們身處的村屋群跑過來，她跑到前排村屋前，拍打著側面的鐵閘嚷著要開門。我們看見有人在二樓探出頭來與她説話，但好像沒有開門的意思。此時，一些喪屍已經被拍門及對話聲吸引跑來，她在沒有選擇下便立刻逃跑。

「呢邊呀！」Keith 向她大叫著指引路向，少女抬頭一看，高興地揮手回應著。「救我呀...」但我們的面色立刻一沉，因為在她後面有一隻男喪屍正在飛奔過去。「走呀！快啲走呀！」在我們齊聲大叫的同時，一幕慘劇就正正發生在我們面前...

少女瞬間被男喪屍撲倒，喪屍男毫不猶豫地一口咬住少女的後頸，喪屍男把她後頸的肉咬開，少女的鮮血隨即噴射出來。另外數隻聞風而至的喪屍也加入戰團，分吃著獵物。

這一幕只發生在離我們十數步的不遠處，我們亦離開天台邊沿，逃避著這一場慘劇。



「其實係咪我害死咗佢？」Keith 自責道。「佢如果唔係要應我，佢可能走得甩...」

「你都係想救佢啫！其實如果你唔去救佢，佢都應該好快比喪屍追倒。」我安慰著。

「不過...」

「而家唔係回顧嘅時候！」Ben 打斷了 Keith。「我哋應該要傾吓嚟緊點做。」

「咁不如番落去先？」Eva 説。「你哋啲背囊有冇食物要雪？如果有，可以放喺天台屋個雪櫃度。」



「野食最好放喺冰箱，而家唔知啲野食要捱幾耐，放冰箱可以擺耐啲，要食先解凍。」Ben 説得有道理。

我們一行人整頓一會後在大廳集合，因大家都開始覺得肚餓，Suki 與 Vicky 煮了些公仔麵給大家吃。Keith 亦大口大口地吃著，後來他真的很餓，希望少女的事沒有對他造成太大的影響。

「Eva，睇嚟我哋都要打攪你一排...」Ben 道。

「我就冇乜所謂呀，不過有人長期黑面啫！」Eva 又衝著 Karen 而來。

「我哋而家坐埋一條船，之前啲誤會不如抹咗佢？」Ben 不等 Karen 回應，搶先道。



「你開到聲，我實 ok 㗎，嘻嘻...」Eva 用妖媚的眼神看著Ben。「咁我哋而家點吖？」

「吖...如...如果我哋要留喺度，有冇多餘房比啲女仔住？我哋有男有女，佢哋好唔方便...」Ben 説話罕有地呑吐。

「唔...我哋而家有三男五女，一共八個人，好在唔洗理出面條L樣，如果唔係我哋就係九男女，哈哈...」Eva 好像很開心。不過這個笑話只有她在笑...

「我間屋有四間房，本身夠兩人一間，不過阿哥間房鎖咗，未必用倒...」Eva 續説。

「呢度有冇硬膠片之類嘅野？如果有，可唔可以比我試吓？」我們用奇異目光看著 Kimi。「咩啫，我之前試過唔小心反鎖咗自己度房門，我朋友教過我點開...」

「應該有，跟我嚟...」Eva 再次與 Kimi 上樓。

「嘭嘭嘭！」露台玻璃門傳出撞擊聲，看來我們已經忘記了關在露台的強哥。Keith 與我走近玻璃門前，問到，「咩事吖？你咁會引倒啲怪物㗎！」

「超！佢哋都上唔倒嚟。喂，比啲野嚟食吓吖！好L肚餓呀！」強哥被困也不失霸氣。



「吖，你等等啦...」Keith 回答。

我們正要在廚房找尋，Ben 把我們拉到一旁後說，「你哋真係諗住比野佢食？如果比野食佢，佢話要鬆綁比佢食，咁你點算？跟住又話要去廁所，咁又點好？」

我不能相信 Ben 竟然説出這些話來，便反駁道，「咁唔比野佢食，佢唔會乖乖喺度唔反抗。到時佢大叫大嚷引埋啲喪屍嚟，又或者打爛度門入嚟破壞，我哋都冇好處。」

「不如比啲餅佢食住先，晏啲再睇吓點？」説著 Keith 已經拿了些餅乾準備離開...