［人性/有甜］- 屍•家•馬鞍山（隔日更新）: Chapter 9 - 停留

「不如試吓有冇其他方法？」Suki 問。

「Eva 姐，呢度有冇電腦？我試過電話都上唔倒網。」很久沒有出聲的 Kimi 走過來説。

「我間房有部 tablet，喺樓上。我阿哥間房就有部電腦，不過佢間房應該鎖咗。咦，你係咪整親？行到趷吓趷吓咁。」Eva 問。

「係呀...頭先走嗰陣比人撞跌扭親。」

「過嚟比我睇吓？」Kimi 走近 Eva。「嘩，瘀曬喎！上嚟我比支家傳跌打酒你搽。」説著 Eva 已經扶著 Kimi 往樓上去。



Keith 找了一張椅子在飯枱旁坐下。Ben 隔著露台向外觀察街外情況。關在露台的強哥吃力地在地上扭著，希望可以將褲子穿回。Karen 坐在沙發玩著電話，可能希望能接通網絡吧。

Suki 與 Vicky 找到了電視的遙控，本以為沒有任何訊息，但電視畫面卻在正常運作。

「Suki，轉去新聞台！」Keith 發現後急道。

此時 Ben 與 Karen 都圍了過來，新聞正在報導一些警方的調動，右手邊有兩行提示「警方呼籲：因突發事故，所有前往西貢的道路封閉。」此時新聞報導員亦開口說道。「重覆一則政府喺下午十二時三十分發出嘅宣佈：由於突發事故，西貢區現已進入緊急狀態，所有前往西貢區嘅道路已經封閉。周邊地區如馬鞍山，將軍澳及彩虹等亦已進入戒備狀態。市民如非必要，請勿前往。警方及駐港部隊亦已作出管制措施，防止戒備區未經許可嘅市民離開上述區域。所有戒備區嘅市民請立刻返家或留喺室內，切勿外出。所有政府建築物/官立學校會保持開放比有需要嘅市民。如有進一步安排，政府會儘快公佈。」

「吓，即係點？我哋被隔離？」我問。



「一節最新消息，由於情況持續惡化，政府宣佈除西貢區外，馬鞍山區亦已經進入緊急狀態並列為封鎖區，上述區域嘅市民請儘量留喺室內，切勿外出。」

聽完這個消息後，大家都呆若木雞。雖然知道有大事發生，但大家都沒有預料事情會來得這麼快，這麼嚴重。轉眼間，這個熟悉的地方已經變得陌生和危險。

新聞在播放著封鎖區外圍的情況，對在核心內圍的我們沒有太大幫助。我們凝神地看著電視螢幕，希望有最新的情況或有用的資訊。但新聞只不斷重複已知的訊息，沒有再更新。

「頂，完全冇講邊度有安全嘅地方，有咩疏散計劃，浄係叫我哋留喺室內！」Keith 生氣地説。

「佢哋根本已經放棄咗我哋，睇嚟我哋要自己諗辦法求生。不過我頭先望過吓條街，留喺度好似安全啲。」Ben 說道。



此時 Eva 已經回來。Eva 換了一套運動套裝，頓時青春了不少。「Kimi 扭親腳，我搽完啲跌打酒叫佢喺上面休息吓。」此時， Eva 留意到新聞的報導，我們亦向她説著我們剛剛接收到的資訊。

「Eva，可唔可以上天台睇吓？」Ben 問。「頭先望街比對面啲屋遮住，睇唔清楚出面嘅情況。」

「好，咁你哋跟我上嚟。」Eva 帶領我們走上樓梯。「嗱，呢邊係我同阿哥間房，而呢邊喺客房，書房同埋浴室。」在客房中的 Kimi 正在看著 tablet 中的劇集，看見我們來了，便揮一下手説了一句，「Hello！」

「咦？係咪上倒網喇？」Vicky 問。

「唔得呀！啲劇係 Eva 姐之前 download 嫁。」Kimi 答道。」

「哦...」Vicky 有點失望。

「呢間就係書房。」Eva 繼續介紹。

「咦，有張電腦枱喎...」Suki 發現道。



「啊係，之前有部手提，之後阿哥長期拎入房用鎖埋，我都好耐冇見過部機 lu...」Eva 搶答。「佢成日都唔番嚟住，呢幾日佢又話要番大陸喎。不過都好，避過一劫...」聽 Eva 説罷，大家的神色都有點黯然...

Eva 帶領我們再上一層，來到一個天台玻璃屋。外面有一半露天地方，放著各式戶外傢俬及燒烤用具。

「嘩，好靚呀！」Vicky 叫道。

「阿哥周不時帶啲 friend 上嚟開 P 燒野食，有時夜晚睇星都幾靚。」説罷 Eva 打開玻璃門讓我們走出去...