一次無心嘅表白，竟然令到佢同咗我一齊: 第五十章

一返到去打開電腦就見到阿靜傳嚟嘅msn：「阿恆，不如我哋分開一排冷靜下…」

當我一睇到個信息，即時有種喘息得幾乎抖唔到氣，全身發熱，個頭熱到好似所有血都充哂上嚟嘅感覺。

我第一時間拎起電話諗住打俾阿靜，但佢已經熄咗電話。雖然佢可以只係為咗避我先熄機，但望到個鐘都已經成1點，瞓咗都唔出奇。

於是我打咗另一個電話…

「喂…咁夜呀…」hailey應該瞓緊覺，把聲都聽得出佢好迷糊。





「hailey…阿靜…佢…佢話…想同我分開下呀……」未講完我啲眼淚已經唔爭氣咁流咗出嚟…而係眼淚流落嚟嘅一刻，我都已經忍唔住，崩潰咁喊咗出嚟…

Hailey俾我咁恐怖嘅舉動嚇到把聲突然醒哂：「點解會咁架…你哋發生咩事嚟呀…」

我一邊喊一邊話：「唔知呀…明明一直都好地地架…明明頭先先出完街架…嗚……嗚呀……呀………點解佢突然會咁講呀……」唯一慶幸嘅係我同父母間房都隔得幾開，只要將個頭埋落枕頭到喊，熟睡嘅佢哋係唔會聽到我嘅午夜悲鳴。

「你等我一陣。」

隔咗陣，hailey駁埋chloe入嚟。





Chloe：「你有冇做到啲咩激嬲人呀？」

「冇呀…明明頭先送佢返屋企都好地地…嗚嗚………………」

Hailey：「有冇打過俾佢？」

「打過呀，唔通呀…………」

Hailey：「咁冇計架喎…」





跟住成晚，佢哋兩個就係咁陪住我，聽住我啲嚎哭、同阿靜一直以嚟嘅故事仲有我對佢嘅愛的宣言。雖然無啦啦俾阿靜飛真係唔係一件好事，但見自己鍾意咗咁多年嘅人原來都咁關心自己，而另一個知己都會隨時陪係我身邊，都尚可以係黑暗中見到一點光。

大概朝早6點幾7點，佢哋問：「洗唔洗過嚟陪你？」

「唔洗啦，你哋去上堂啦，我去阿靜屋企樓下等佢。」

傾到8點幾，佢哋差唔多要出門口，於是收咗線。之後，我離開咗張床，喊咗成晚嘅我對眼好熱，但一啲睡意都冇，而且乜都唔想食。我成個人攤咗係張電腦櫈到，面向個天，雙眼放空，毫無靈魂咁等，等阿靜上線…

但等咗幾個鐘，佢冇上線，打俾佢電話依然飛咗去留言，所以我決定去佢屋企樓下等佢。

我坐咗係阿靜屋企樓下，早兩晚係到發呆張長櫈到。一等又等咗4粒鐘…對眼冇望開過佢必經之路。

由1點半等到差唔多6點，都見唔到佢…於是我又打咗俾佢…

「嘟…嘟…」終於通啦…





「阿恆…」

「阿靜…點解…點解咁突然…點解好地地要分開…係咪我有啲咩做得唔好…係咪我激嬲咗你啲咩…你講吖，我改吖…」

「唔關你事架阿恆…係我問題…你唔好咁啦…」

「咁點解要分手呀…點解呀…我真係好愛你架…我真係唔可以冇咗你架…」

「sorry呀…阿恆…忘記我啦…」

「唔得呀…你叫我點忘記呀…阿靜呀…」我未講完，阿靜已經收咗線。當我再打返去佢手機嘅時候，又關咗機…打去佢屋企又hold起咗條線…

點解…明明我識嘅阿靜都唔係咁架…明明我哋好愛大家架…點解要分開呀……明明佢好怕同我分開架…點解呀…………





我出門口前將之前抄低，同阿靜sms嘅人嘅電話張紙帶埋出去。係阿靜收咗線之後，我打咗去呢幾個電話到…

但唯一得一個叫helena嘅人有聽電話…

「喂，helena，我係阿靜嘅男朋友呀…你知唔知佢點解突然要同我分手呀…佢係咪同咗第二個一齊呀…求下你吖，你知啲咩嘅話我知吖…」

Helena好驚訝咁問：「點解你會有我電話架？阿靜俾你架？」

「唔係，我睇佢手機嗰陣抄低架…」

「咁你而家想點吖？」

「你一定知點解阿靜要同我分手架…話我知啦…佢係咪有咗第二個呀…」

《分手可以有千億個理由，而留低的理由只有一個…因為愛…》