一次無心嘅表白，竟然令到佢同咗我一齊: 第四十九章

目送阿靜返上屋企之後，我並冇即時返屋企，而係坐咗係佢樓下嘅公園，邊聽歌邊諗返呢幾個月經歷嘅事……

由當初係勁舞到佢對我幾乎係討厭嘅態度；到之後約親佢出街都俾佢甩我底；跟住因為一次無心嘅表白，令佢尷尬逃避，然後佢又無啦啦愛上咗我……

至於我，明明係一條招牌跌落嚟都壓死幾件嘅死毒撚，短短幾個月突然間感受到，俾人關注嘅感覺。先係阿靜同momo，跟住雯雯……

然後我個初吻又不明不白咁俾個知己奪走咗，跟住第一次見到阿靜，佢嘅美貌完全將我吸引住，係我打定輸數繼續做毒撚嘅時候，阿靜竟然唔介意我嘅相貌同八兩金不相伯仲…

第一次同阿靜約會嘅時候，興奮同期待嘅心情；第一次拖住阿靜隻手嗰陣，嗰隻冰冷但卻暖透我全身嘅手心；第一次感受到有愛情嘅一吻……仲有好多好多嘅第一次……





雖然同阿靜一齊嘅初期只係以為講笑，到之後我又只係想證明俾chloe睇我的確會有人鍾意……

不知不覺又坐咗半粒鐘，為免我呢個窮到條底褲穿窿穿到得返條橡筋都要日日著住佢嘅人因為冇錢搭的士或者通宵巴士，所以唯有離開……

雖然每次送完阿靜返屋企，都會有種失落感，但唔知點解，今次真係嚟得特別強烈…

返到屋企，打開msn，見到阿靜個status到出現一句歌詞：

<任時光匆匆流去 我只在乎你 心甘情願感染你我氣息>





我第一下反應除咗心甜亦都笑咗出嚟，唔知阿靜係咪跟得我多，咁老積嘅歌詞都打得出嘅…

我打開阿靜嘅視窗：「嘩，你想我糖尿病咩甜到咁！」

「傻瓜！我真係…好鍾意好鍾意你…」

唔知點解，我見到呢句，雖然好開心，但總係覺得有種好怪嘅感覺。平時嘅阿靜唔會講得咁直白，但今次…不過我依然沉溺係甜蜜當中，冇將呢種感覺放係心入面…

「我都係，我都好愛你！」





「傻瓜，聽日可唔可以同我去多次嗰個海邊呀？」

我哋已經慣性將油麻地避風塘稱為「嗰個海邊」。「好呀，你鍾意啦！」

呢晚，我夢見我同阿靜老咗之後，坐係張長櫈到，手拖手，一語不發咁望住個夕陽……

第二日，我哋依舊係太子地鐵站等，但今次，阿靜冇遲到。

行到去呢個一直見證住我同阿靜嘅愛情嘅大海，海風由炎熱變得開始刺骨，即係話，冬天嚟啦……

係同阿靜一齊之前，我真係好憎同好怕冬天。乜嘢聖誕、新年、情人節，所有最大肆鋪張嘅節日都係齊同一季，而最緊要係，冬天永遠都會俾單身嘅人一種雪上加霜嘅感覺。

不過今年唔同啦！我有阿靜，可以同佢互相取暖，可以有一個人係冬天嘅時候同你互相依偎係件好幸福嘅事。

「嘩，啲風都幾涼下，你凍唔凍呀？」





「ok啦。」

行到石橋前，阿靜話：「我好想行上去呀，不如陪我行一次啦！」

就係阿靜半拉半氹低下，我哋最後都上咗去。係石橋上面，我哋愈行愈出，去到差唔多盡頭嘅時候，我哋坐低咗，拖住手，一語不發咁望住個海同夕陽，就好似個夢咁……

我同阿靜唔知沉醉咗幾耐，不知不覺又坐到夜晚。其實同阿靜一齊嘅時間真係過得好快，就好似見幾耐都唔夠……

阿靜：「好啦，我哋差唔多夠鐘啦…」

「嗯？」

「夠鐘返返去啦…」





「哦，咁行啦。」

雖然第一次係兜錯路，但每次我同阿靜最後依然會選擇行返去。就算要行成個半鐘先返到阿靜屋企，不過同最愛嘅人一齊，即使再遠嘅路都可以一齊走落去……

終於，到咗屋企樓下，阿靜臨返上前主動攬住咗我，而我亦都用身體作回應。當阿靜愈攬愈緊，我都緊緊咁將佢攬住，直到我再次目送佢離關我嘅視線……

望住阿靜慢慢咁消失係我眼中，嗰種莫名嘅失落感又出現……

直到返到屋企…見到阿靜msn傳嚟嘅信息…

《要走的終須會走，要留下的自然會留，別勉強，別挽留……》