一次無心嘅表白，竟然令到佢同咗我一齊: 第五十一章

Helena：「我連你哋分咗手我都唔知，點會知佢係咪有咗第二個啫。」

「你哋明明成日sms架，點會唔知架…」

「咁佢唔講咪唔知囉！」

係…阿靜唔講就冇人知…反正我冇見過佢嘅fd…就算阿靜換咗第二個，佢啲fd都唔會知…

我又一次係人前崩潰咁喊…而且今次…仲係係條街到……





面對我突如其來嘅哭聲，helena明顯唔識得應該點安慰人，只係不停咁話：「唉，唔好喊啦，唔好喊啦…」仲煩過唐僧。

而我，都因為抵受唔住佢啲安慰而收咗聲。

「咁你可唔可以幫我套下阿靜講點解要分手…」

「你傻架？俾佢知我幫你咪連朋友都冇得做！」

「扮下嘢問下佢呢排同我點啫…」





「no！」

「咁算啦……」係毫無得著嘅情況之下，我唯有收線……

無計可施嘅情況低下，我唯有返屋企。不過我咁嘅死樣，如果返到屋企實俾呀爸呀媽見到有異樣，所以我唯有係東涌漫無目的咁行…

行行下，唔知係我自虐機制唔小心啟動咗，定我痴咗線，我入咗去ua…

「那些年，跟住個場，一張，唔該。」我第一次做我生平最憎最驚嘅嘢…一個人睇戲…





其實那些年呢套神戲真係唔係普通嘅神，上映咗個幾月都未落畫都算，我係東涌竟然都仲未可以包場睇戲，真係抵做票房冠軍。

不過唔睇還好，一睇我就仆街啦…係全場爆笑嘅位我就表演出相反嘅情緒。一邊睇一邊諗起阿靜…尤其睇到地震之後男女主角星空下互訴心聲，我對眼就好似爆水喉咁…

明明就係上個月，我攬住阿靜係張床到睇星星…明明一日前我哋依然過得咁幸福…點解會突然變得咁快……

「想要親新娘可以，不過想怎樣親新娘先要怎樣親我才行喔！」呢句說話係從銀幕上嘅新郎講出嚟，之後男主角即刻衝上前強吻新郎。呢個鏡頭我係戲院睇咗咁多次都聽到幾乎全場爆笑……

但…真係咁好笑…？我睇到嘅係一個鍾意咗女主角好多年嘅人，到最後都冇辦法同佢共結白頭嘅心情…嗰一吻包含住幾大嘅愛同遺憾…同阿靜睇嘅時候我已經忍唔住流眼淚，到呢一刻睇，我認為我係爆水渠…

望住呢一幕，我不停幻想我同阿靜嘅未來…望住最愛嘅人係婚禮上拖住另一個男人宣誓…見證佢哋眼中只有對方嘅一刻……一諗到我最愛嘅人最後會成為別人嘅伴侶，心頭一緊，鼻頭一酸，眼淚就湧出得更加多…

睇完戲再行咗去東涌碼頭，諗返起次次阿靜入東涌就剩係去我屋企，自己住得咁近就偏偏冇同佢嚟行過，真係諷刺…

行到差唔多十二點，我確認父母瞓咗我先敢返屋企。雖然經過咗24小時冇瞓過冇食過嘢嘅一日，但我依然乜感覺都冇…我望住個天，一啲睡意都冇…望望下，突然間諗到將九把刀首那些年改寫為我嘅故事…





半夜3點，我將改完嘅歌詞send咗俾阿靜，希望可以挽回佢…

之後，我又繼續唔知做乜咁，呆坐到天光。係呀爸呀媽出咗門口之後，我繼續出廳望住部電腦，希望會等到阿靜嘅回應。

「阿恆…好多謝你…但你可唔可以唔好繼續係咁…」終於等到阿靜嘅回應…

「我應承過會愛你一世架…」

「咁我而家唔要你愛我一世啦，你反口啦，唔好繼續對我咁好啦…」

點解…點解我明明選擇咗守諾言，但偏偏唔俾我兌現呀……呢個世界好多人怨另一半失信，背叛…由懂性嗰日開始我就發誓一定要同一個人一生一世…點解今日反而唔俾我遵守呢個承諾……

「我唔會架…我會等你架阿靜…」係我傳送呢句之前，阿靜再一次離線…





同時，音樂列表上亦都傳嚟一句好恐怖嘅歌詞……

＜我是傻瓜雨聲嘩嘩 晚風沙沙 想到未來還是有點害怕…＞一曲屬於我哋嘅情歌歌詞…

當我一起身想走返入房嘅時候突然眼前一黑……

《或者當日嘅無可取締，係今日回望過去，可能已經被取締咗好幾次……》