一次無心嘅表白，竟然令到佢同咗我一齊: 第三十六章

「咪又係普通商場一個，有咩咁特別啫！」跟住我遊咗幾層嘅阿靜好好奇咁問。

係，冇錯，一個普通嘅商場唔特別，特別在於佢頂層嘅天台公園。呢個對我嚟講，就係見證住我同小學同學嘅友情…同埋愛情…

唔知點解，嗰陣只要有任何早放嘅機會，就會大半班人一齊走上去個公園到玩。聖誕聯歡、教師發展日…甚至往後嘅小學聚會會去返呢到。而係小學嗰陣，有個我鍾意嘅女仔，唔知佢撞壞腦定隻眼盲咗，佢竟然都鍾意我。嗰陣我哋日日放學開始傾電話傾到瞓覺，而且得閒無事又約出嚟玩，可惜嘅係，我同佢並冇真正係埋一齊，不過呢到就充滿住我嘅童年氣息。

我將我呢啲過去一五一十咁話哂俾阿靜知，之後阿靜話：「你點睇都唔似咁多女喎…」

我將呢句說話解讀為阿靜讚我好專一，我諗冇錯掛！





「我冇女架…我得你架咋~」

「係咩？咁chloe呢？」屌，咩事先…

講大話話冇我就算過到阿靜都過唔到自己，但講真話我就過到初一都過唔到十五…

我諗唔到一個好嘅答案，於是用行動去回應…我攬住阿靜，將阿靜個頭靠近我心口，一邊摸佢個頭…但嗰姿勢只係維持咗一陣…

「衰人，攪到我個頭亂哂啦！！」而家啲女人真係麻煩，又要浪漫又安全感又要顧儀態…





「咁衰人俾個頭你攪返佢嘔白泡好冇？」

阿靜聽完，又一下搣落嚟我手臂…

「我剩係識呢啲架咋，仲嘔泡唔嘔泡？」我唔敢想像充咗血嘅海綿體受一下，會唔會要做人工切除…

我整咗個鬼面，話：「唔對你嘔咪對第二個囉！」

「咩呀，對你小學個女仔呀？」





「唔知架！！！」

「點解你哋當時冇一齊到？」

「點知啫…」

其實我好清楚…

當年係同佢曖昧緊嘅時候，佢講過一番說話，我到今日都好記得…

「你知啊知你樣樣嘢都管住哂我好辛苦呀！你攪到我冇哂朋友，男仔又唔敢埋我身，女仔又因為你，成日攪埋啲俾我哋單獨相處嘅機會，全世界都幫哂你，你有冇諗過我呀！」

「咁…我都係唔想你同其他男仔太close啫…咁啲女仔都係想我哋多啲時間二人世界啫…」

「夠啦，我唔係屬於你架，我都有自由架，總之我嘅嘢以後唔到你管呀！」





呢次之後，直到畢業我同佢都冇再講過一句說話……聽講佢升咗中學之後，換畫換得快過換手機……或者當日我同唔到佢一齊，都係好事嚟嘅……

「喂，你有冇聽我講嘢架！！！！！」我望一望阿靜，睇嚟佢都已經叫咗我幾次……

「吓，有……」如果唔計啱啱發呆，諗返起啲往事嘅話……

「咁我講咩呀！」

「咪就係問我有冇聽你講嘢囉！」

「哼！」

唔係咩？





「衰人嚟架你！我話我好耐冇盪過韆鞦啦！」

「哦…咁你而家咪盪緊囉。」

「做咩啫，諗緊小學嗰個女仔呀？」

頂…你又知…雖然我好鍾意阿靜呢種好似完全了解我諗緊咩嘅感覺，但有時係佢面前我就好似冇秘密咁…

一邊盪一邊望住開始入黑嘅夜空，總係有種教人心中一沉嘅感覺…

「阿靜，我哋將來一定要買一間可以睇到海景嘅屋。好似深井碧堤半島咁，望住個大海，到咗夜晚可以睇埋俾彩燈照住嘅青馬橋，然後攬住一齊睇電視。」

「唓，聽住先啦~」

一定會…





由於個公園會關門，過多陣我都帶咗阿靜走。我哋係街上面漫無目的咁行，唔覺唔覺行咗去荃灣碼頭。唔知點解，我哋就係咁無聊，鍾意係海邊吹風傾計，明明香港啲海水又唔係香，某程度上嚟講直頭係臭，但又總係會將我同阿靜吸引過去。

即使當時已經入秋，但天氣依然咁熱，雖然手心都開始出汗，但都唔願意放開大家。

我哋一路沿住海邊行，直頭行到一邊嘅盡頭。由於要行到盡頭要一段時間，所以除咗啲跑步嘅人會經過之外，其實呢到可以話乜人都冇…

係呢個冇乜人，又有咁好樹林遮掩嘅情況下，我同阿靜激吻起上嚟…

係過咗唔知幾耐，我哋雙唇先慢慢分離…

之後大家都冇講過一句說話，阿靜就係咁躺係我肩膀。直到大概8點幾，我feel個肚開始向我抗議…

「不如去食飯囉…」





「嗯，行啦~」

同阿靜食完飯，送完佢返屋企，做哂呢啲拍拖指定動作之後，我打咗俾chloe。

《過去構成現在，現在改變未來，過去同未來係虛無，只有現在係真實……》