一次無心嘅表白，竟然令到佢同咗我一齊: 第三十五章

係hailey轉身前，我好似隱約見到佢露出一絲嘅哀愁，但我都不以為然，始終我仲有個世紀大炸彈要拆…

阿靜：「你係咪應該有好多嘢要同我講呢？」

好啦法官大人，我放棄自辯啦…認罪有冇得緩刑架…

「um…你指啲咩呢…」

「唔知呀，想睇你有咩要話我知咋麻！咁你有咩要話我知，而你又未講架？」





唔知大家有冇試過，細嗰個陣父母得閒無事就會同你講：「你知唔知今日學校打過俾我喎，話你做咗啲衰嘢喎，你做咗啲咩嚟呀？」然後入世未深嘅你就會開始係個腦到將全日做過嘅壞事組織一次，再將最有可能嘅事講出嚟。

「我今日講咗句粗口呀；我今日冇交功課呀；我今日入咗女廁啲女同學呀；我今日用把口強姦咗個英文miss呀…」然後當你講哂所有事出嚟之後，佢哋就會同你算帳。最後你會發現，原來所有講嘅事跟本都唔關事，個電話只話通知佢哋出席家長日。

經過咗咁多年嘅審問訓練，我點會仲中計吖！對付呢招，唯有駛出港女必殺絕技…扮無知。

「真係唔知喎…不如你話我知你想知咩，我話過你知吖！」

「唔知就算啦！哼！」說罷，阿靜就交叉住雙手係胸前，擺出副好嬲嘅樣。





「我講啦我講啦…其實chloe個鈴聲我就用咗5年架啦，咁我鍾意佢嗰陣我真係覺得首歌配合到我同佢嘅關係咋麻；咁chloe呢，佢個胸雖然睇落好大，但實際上佢同hailey一樣得b架咋，我冇摸過架，佢哋話我知架咋；咁頭先chloe話叫我今晚打俾佢係因為我哋習慣晚晚傾電話嘅，前日我遲咗起身出唔到嚟都係因為前一晚我同佢傾夜咗先唔知醒架咋！雖然我同hailey kiss過，但我哋真係冇嘢架，生日嗰陣當禮物咋麻！阿靜你信我啦！！」呢番說話我仲係以急口令嘅形式講哂出嚟…

「噢，原來你同hailey kiss過~原來你起唔到身係因為chloe~」阿靜擺出一到恍然大悟嘅樣，令我倍感心寒…

仆街啦…我死期到…呀爸，呀媽，我對你哋唔住呀……

「我…唔好嬲啦…對唔住呀，嗰日我都係驚你嬲先呃你架咋…」

阿靜一臉認真咁話：「本來我都係諗住問你，我哋而家去邊啫，估唔到聽到咁多秘密喎。」





邊條仆街話扮無知就得架！睇嚟我都係排定火化場嗰期先得啦……

「er…er…」呢刻我只可以以笑遮醜…不過好似唔太有效…

「本身諗住星期六俾啲驚喜你添，而家算lu~」

嘩，今次真係玉皇大帝顯靈呀！！

「吓，驚喜？咩驚喜呀？」

「冇啦！而家罰你今個星期守行為呀！」

雖然我好似錯過咗啲咩咗，不過總算唔洗死吖…

「謝老婆大人不閹之恩！」





「咁我哋而家去邊啫？」

「荃灣廣場吖！嗰到有好多我以前嘅回憶係到。」

原本，一路上我哋都相安無事咁傾計，不過隔咗陣，我電話又響起＜孤單心事>……

阿靜望一望我，之前我好自然咁將手機獻上……

阿靜：「hello，chloe呀？阿恆行開咗喎，一間佢返嚟我叫佢打返俾你吖！」

唔錯吖……作為一個人類行為觀察者，我係呢件事上見到嘅就係兩個女人分別想破壞我同對方嘅關係……阿靜咁做，我絕對理解，話哂都係女朋友，唔俾女埋我身正常吖。但chloe又點計先，明知阿靜係我隔仲打嚟……擺明攪事啫……

「點呀，chloe打嚟做咩呀…」





「冇呀，佢話佢返到屋企啦喎~啊，真係奇怪啦，我係你女朋友就話返到屋企打俾你報平安啫，點解chloe又會咁做嘅？係咪你平時好關心朋友嘅呢？」

我…屌…平時出完街叫chloe返到屋企打俾我就次次都delay幾粒鐘，今次唔叫就即時打嚟，啫係擺明玩嘢啫……

「哈…哈…係囉…關心下朋友啫…」我而家好關心閻王幾時會叫chloe落去陪佢！

「係呢，你仲有冇嘢未同我講架？」

我個腦即時浮現出上次好似飲醉酒嗰陣，同係戲院嗰陣……

「冇！傻啦，我仲邊有嘢敢呃你啫！老婆大人你咁聰明，我邊有嘢可以呃到你呢！」

「你又咁驚做咩啫？我想知荃灣廣場有咩特別咋麻？」

我有驚咩？冇呀！





《當佢唔再向你解釋嘅時候，證明呢段關係對佢嚟講已經冇必要繼續維繫……》