一次無心嘅表白，竟然令到佢同咗我一齊: 第十一章
自從取消咗個約會之後，跟住落嚟幾日我同阿靜好似突然變得冇哂話題咁，所以都好少搵大家。至於套哈利波特，我原本想搵第二個去睇，但總係好似搵水泡咁，過唔到自己，最後真係只可以等出碟……
兩個星期後，係我同hailey嘅生日，而且我哋仲係同年同月同日生。曾經仲講笑咁話，咁不如同年同月同日死埋啦！
每年生日我哋成日都話要一齊過，仲話買生日蛋糕嗰陣一人俾人半當送咗禮物俾對方。但每次生日前硬係會嗌交，跟住一齊慶祝嘅事就一年推一年。
今年我哋終於冇係生日前夕嗌交，但生日前一晚，我哋三線一齊傾去邊嘅時候，傾咗好耐都冇結論…………
跟住chloe又提議話：「不如去多次海洋公園啦！兩個生日嘅又唔洗錢，帶一個去又有半價，我嗰份半價都再除三，夠哂平啦！！！！！」
其實我唔覺得入面啲風景值得我一睇再睇……
「算啦，去hailey屋企咪算囉，海洋公園都唔係海入面嘅，冇嘢玩架！」
「菠蘿包夠冇菠蘿啦，你又食！」屌，其實真係唔關事囉……
「海洋公園！」「hailey屋企！」「海洋公園！」「hailey屋企！」「海洋公園！」「hailey屋企！」
「……」呢幾句說話好可憐咁俾人重複咗十幾分鐘。
「hailey你生日你話事啦！」
「仆你個街，我都生日架！」
「你只係有份生日啫！」
「咁我屋企囉，順便可以切到嗰個delay咗幾年嘅生日蛋糕。」
「唉，hailey你好嘢呀，唔撐我撐個衰人！」
「唔係呀，只係我懶得再咁早起身！」
「你係幫住佢！」
「我冇！」
「你有！」
唉，理得你哋有冇丫，總之終於決定咗去hailey屋企慶祝。
其實講真，唔知點解平時啲人生日硬係鍾意大攪，約成十幾人出嚟，但又唔係嗰個咁fd咁熟，純粹想要人多，出到嚟又分幾堆各玩各。生日變相好似俾咗個籍口人 多個聚會而已。但如果係真心朋友，聚會又需唔需要理由？朋友間，唔係就係應該一句想聚下就聚架咩？反之，你成大班人出到嚟，某君討厭某人，生日嗰個又唔會 應酬得哂咁多人，咁有意義咩？最後可能只係有一班應酬機器出席……
到生日正日，由於hailey都話要出嚟一齊揀蛋糕，所以約咗12點係地鐵站等，不過大家都知道，準時係幾乎冇可能出現係兩位小姐身上架啦！所以12點只係我係到等……
今日我著咗為咗同阿靜約會而買嘅嗰套新衫，咪住，更正，今日我著咗嗰套同阿樂一齊去買嘅新衫……老實講，我都唔係太認得自己，雖然仍然散發住一股毒撚嘅氣息，但比起以前，大概係董建華同曾蔭權之別啦……
Chloe嚟到見到我嘅時候先由下而上打量咗我一次，確定冇認錯人之後話：「咩呀，睇數碼暴龍睇上癮，生日學人進化咁話啦喎？」
緊隨其後嚟到嘅hailey直頭真係嚇咗跳，之後望住我不停咁笑咗幾分鐘……
「屌你，笑完未……」
「唔係咧，你想像下啲非洲土著著成咁你就會明有幾好笑架啦！！！」
頂，非洲土著會著衫架咩？！
話雖我同hailey生日，但因為我鍾意chloe，hailey又錫chloe，所以最後揀蛋糕呢個重任都係交咗俾chloe嘅口味決定……
上到hailey屋企，其實真係唔知做咗啲咩就過咗一日，而家諗返仲以為自己當時入咗時間機器……到咗夜晚，chloe好睇唔開咁話不如買餸上嚟佢煮，雖然鍾意嘅人煮飯俾自己食正常係件開心嘅事，但我為免我生日變死忌，所以最後都係叫外賣。
食完飯之後，作為主角嘅蛋糕，有一半係並冇去到佢應該要去嘅地方。事源係我捉住hailey隻手一齊切蛋糕嗰陣，已經盤算緊當分完一件俾佢之後，即刻將佢 個頭㩒落件蛋糕到。正當我得手嘅同一秒，我俾chloe同秒咁將個件蛋糕撻上塊面到。而hailey不甘被我整估諗住還擊之際，我將佢隻手撥咗去 chloe到。
「hailey你咁對我！」chloe好無奈咁講。
「唔係呀，死人阿恆囉，一齊整佢！」
係一個細小嘅空間入面，充滿住我哋三人嘅歡笑聲……同呼救聲。
戰後唯一睇落最冇事嘅就係chloe（至少頭髮冇事），而我……其實我只係好男不與女鬥啫！絕對唔係敗退架！至於hailey，由於呢到係佢屋企，佢最多都係要洗頭啫！
玩到咁上下夜，我同chloe準備走嗰陣，chloe係hailey塊面錫咗啖。
「唔制，我又要！」我半開玩笑咁講。
點知hailey真係錫咗落嚟……仲係我個嘴……之後話：「生日快樂啦！」
嗚呀，我嘅初吻呀！雖然只係蜻蜓點水式，但係回程途中依然令我久久未能回神。
搭車嗰陣，chloe話：「睇你條咸濕仔而家仲係到自high緊啦！」
其實我真係唔明，我明明係係個好斯文嘅人，點解個個都將我睇成咁咸濕，其實分分鐘呢啲只係心理學上一種心理投射，所以話我咸濕個啲本身一定係咁！！！
「做咩要自high先，kiss咋麻，成日（同公仔）架啦！」
「不過你今日睇落真係順眼咗好多，難怪hailey會肯錫你條毒撚！」
「仆街啦你！」
送chloe返屋企途中，我哋依然有講有笑，就好似表白嘅事冇出現過咁……送到佢返屋企樓下嘅時候，chloe送咗個飛吻俾我……
「接實啦，生日快樂！」
睇嚟我今晚已經唔洗瞓……
《我寧願要一個交心知己都唔要一班應酬機器……》