一次無心嘅表白，竟然令到佢同咗我一齊: 第十二章

返屋企嗰陣，個心不禁泛起一種好飄飄然嘅感覺，無論係hailey奪走嘅初吻，抑或係chloe嘅飛吻，都令到我嘅心跳久久未能平復……由hailey錫落嚟嘅一剎那，嗰種柔軟嘅感覺完全觸動哂全身嘅神經線，原來初吻嘅感覺係咁奇妙架！！！

而chloe，即使冇真正錫到我，但等咗咁多年，呢個飛吻總算話我知，原來做兵都係一件好幸福嘅事……

但全日最開心嘅都係嚟自一班有我心嘅好朋友。由於我好憎facebook嘅生日提示，攪到好似迫人講生日快樂咁，所以我一早已經hide咗個生日日期，為嘅就係想睇下有幾多人真心記得我生日。而事實係喺今日科技已經進步到令人連記個電話號碼或者生日日期都有難度嘅年代入面，由踏入12點我生日正日嘅一刻開始，手機都收到不少嘅生日祝福，連facebook都收到好多祝賀字句，我個心入面最想出現嘅名單都冇令我失望。所以我嘅一班真心朋友，真係好多謝你哋咁記得小弟生日！

不過講時講，我心入面嘅名單係並冇出現任何一個男性嘅名，一來我冇乜男性朋友；二來，對男人真係唔好抱有期望，尤其記性方面……而最恐怖嘅一個，竟然由年頭問我幾號生日，問到我生日前一日都仲問緊……我有次同佢出街食飯，食完嘅時候曾經考慮過洗唔洗提醒下佢已經食飽……

係我自high緊嘅同時，msn再次彈出阿靜嘅對話框……





「你今日生日呀？」咁我未死應該唔係生忌嘅。

「係呀，你又知？」

「冇呀，見到你個wall咁多人留言祝你生日快樂，所以咪知囉。」

阿靜又會咁留意我個wall嘅？！

「咁你係咪應該有啲表示呢？」





「生日快樂！」

「我要禮物！！」

「冇喎~~~」

「攪錯呀，唉，傷心，生日冇禮物。」

「最多請你食飯啦！」





「係咪呀？幾時先？」

「下星期六啦。」

原本我以為我同阿靜唔會再有計傾，估唔到因為我生日，我哋再次打返開話題。呢一日，因為一班平時好少聯絡嘅朋友，形影不離嘅姐妹，同鍾意嘅人嘅一份心意，令我過咗一個好完美嘅生日……

係我陶醉緊係呢個咁完美嘅一日嘅時候，阿偉又打嚟……

「喂，玩信長。」

唔知大家係好興奮嘅時候聽到啲好討厭嘅聲音嗰陣會有咩感覺，但我好肯定咁話你知，如果有個遙控可以mute到佢把聲，我會毫不猶豫咁㩒落去，再毁減咗個遙控佢……

啫係我唔係話憎阿偉，之但係佢次次打嚟都用啲近乎命令嘅語氣講嘢，真係好難頂。我自問我嘅eq已經好高，至少我唔似某啲呀媽咁，個仔唔識做功課就屌佢老母先丫，雖則養不教，父之過……唔係添喎，明明係父之過，做老母都要攬上身嚟屌自己，呢啲咁高尚情操真係母愛嘅表現呀！！！

其實語氣同佢嘅煩都算，假假地我今日都叫「有份」生日，識咗我成5年你都唔記得，一打嚟就叫我去打機，都真係好難要我冷靜……





不過我大人有大量，虛應幾句先cut佢線，都算唔話得啦！

喺就嚟到新嘅一日之前，我同hailey難得一年可以一齊慶祝，當然係以對方作為呢一日嘅開始同完結啦。雖然我哋如常咁三線，但三個人都好似刻意迴避kiss同飛吻嘅事……雖然好興奮，但我都唔敢諗太多，始終呢件事，可一都唔知可唔可再……

《一份心意比起價值連城嘅禮物更能打動單純嘅人心……》