一次無心嘅表白，竟然令到佢同咗我一齊: 第十章

「咪玩啦，我點會無啦啦做咗你女神呀？」

「冇玩呀，我好認真架，你做咗我女神好耐架啦！」

「唔信囉，咁你講嗰個chloe呢？」

「佢邊及你咁重要啫！咁點啫，我表白咗啦！女神！」

「考慮下先啦！」





咩話！考慮下？！我呢刻嘅心情真係開心到唔知應該點形容，一個講下笑嘅表白，竟然換到一句考慮下。先唔好講佢最後受唔受，單憑佢一句考慮下已經夠我樂透半天，要知道對一條只係比八兩金靚仔少少嘅毒撚嚟講，有人肯同佢講句考慮下，已經開心過中六合彩啦！（雖然我認為佢見完我個樣之後會連電話都轉埋……）

而呢種久違嘅興奮，對上一次出現已經係小學嘅時候，我向一個同我曖昧咗一段時間，而又佢鍾意我嘅女仔表白。當時佢話考慮下，但幾乎傳到全級都認定我哋拍拖，連老師都要介入我哋呢棵啱啱萌芽嘅愛苗。可惜佢最後以太細（年紀）為由拒絕咗我，幾個月後又因為嗌咗交，到畢業後都再冇聯絡……

興奮完一輪，冷靜返落嚟嘅時間，又諗，考慮啫，又冇應承實，咁興奮做乜？

俾阿靜咁出乎意料嘅答案嚇疾之後，我個腦完全轉唔切應該要講啲咩，唯有扮哂應真咁話：「你講真架？唔好玩我喎……」

「而家似係你玩我多啲喎……」





「我冇玩嘢，咁你係咪講真丫？」

「係。」

之後我哋都選擇轉移話題，但我就開始為自己開咗個頭，收唔返嘅戲言而有一絲嘅內疚。（雖然我真係唔覺佢會受……）

係呢頭玩完表白之後，我嗰頭就打咗俾chloe。

「喂，chloe。」





「嗯……」平日我哋好少會叫對方嘅名，所以當我叫佢嘅名嘅時候，其實佢已經估到我想講咩。

「你知我想講咩架……」

「知呀，你講丫。」

「chloe，我鍾意你，你知架，就算再過幾多年，我都好想你做我女朋友，可唔可以俾次機會我……」

「但你知我唔會鍾意你架。」

「其實我真係唔明點解……我樣衰？」

「知就好啦，無謂迫我坦白吖。」

「屌你啦！」





雖然我知道呢個係事實，但總係有種深深不忿嘅感覺，但又講唔上憎佢，因為佢又真係講事實……

雖然阿靜講得好啱，唔表白就冇機會，但我同chloe，睇怕表咗白都唔會有機會，不過至少，我仍然未有放棄嘅念頭……

係經過咗一星期被期待嘅折磨，終於到約會當日。

由於緊張到瞓唔到，所以好早就起咗身，打開msn，等阿靜確實時間地點。我約人通常有個習慣，就係約會前1粒鐘都聯絡唔到個條（班）蛋散，我會選擇唔出門口，反正佢唔聽電話，唔係我責任丫。

由8點等到12點，阿靜終於上msn。

我即刻問佢：「今日係咪真係出？」

「sorry呀，今日有啲事做，唔出啦……」





「噢，唔緊要……」

如果你問我係咪好失望，我又唔會嘅，只係見到佢話唔出嘅一刻，個心不禁沉咗一沉……

過咗冇耐，見到阿靜嘅status打住「好內疚」。直角幫我買咗飛（對號入座）呀，其實我心知佢唔出，都係因為噚晚個戲言，如果出咗，就要面對，如果唔出，都仲有扯開話題嘅餘地……

我又唔知點解見到佢內疚，我有少少心痛嘅感覺，所以同佢講咗句：

「唔出咪仲好，我今日都好攰，唔想出街！」

「……」

「所以你唔好內疚啦，我仲諗緊點同你講，點知俾你講咗先……」

「唓！」





阿靜，唔知你知唔知，當時我咁講係為咗你嘅感受呢……

《阿靜：「你唔表白，就只可以一世望住心愛嘅人係人哋嘅懷抱中……」》