一次無心嘅表白，竟然令到佢同咗我一齊: 第六章

第六章

相信好多人幻想過同男/女神出街，一定覺得好開心好興奮，仲可能對方對自己都有feel之類嘅事。實不相瞞，我以前都有，但自從第一次同chloe出街之後，真係乜幻想空間都冇哂。

我嘅開心同興奮極其量係見到佢嘅頭幾分鐘，到之後我就發現一個好嚴重嘅問題，dead air …

女神唔會主動撩我講嘢，而我又因為既興奮又緊張嘅情緒，將我出門口前所諗嘅話題一掃而空。慢慢就會變到真係一個主人同一個管家咁行街，再恐怖啲嘅就只係一條色狼跟蹤緊妙齡少女咁。然後行咗陣，女神覺得又悶又冇嘢行，你就只可以目送佢返屋企。記住只係目送，因為連親身送到返佢住嗰區嘅資格都冇。

當然呢啲只係初期嘅事，但而家同chloe出街都唔見得幾開心。衰啲講句，再燦爛嘅煙花，睇得多都會有悶嘅一日，何況你仲明知場煙花永遠唔會鍾意你添……有時仲會係到諗，到底我哋三個一齊嘅時候點解咁開心，但偏偏得返我同佢嘅時候又唔得？係我悶丫，定係佢只係係hailey面前做戲……





無所事事咗幾粒鐘之後，都係時候返屋企。

送到chloe返屋企樓下嗰陣，我問佢：「哈利波特嘅結局上映緊啦喎，不如……」

「吓…我呀妹約咗我啦喎……」

「咁算啦。」

咪住，俾著平時我實死纏爛打，就算同埋佢呀妹都照去架喎……我又做乜……





係我搭車途中，雖然同chloe都照常咁傾電話，不過硬係好似多咗層隔膜……

返到屋企，我將chloe拒絕咗同我睇戲呢件事話俾阿靜聽。

「唉，頭先同佢傾電話嗰陣硬係好似有層隔膜咁……」

「隔咩膜啫，講到尾你都係唔鍾意佢拒絕你咋麻，講得懶好聽咁！」頂，話雖事實啫，俾返啲面嚟好喎……

「咁俾人拒絕係人都會唔開心架啦……」「咁…而家佢就唔陪我啦，咁你點呀？」





「你想幾時丫？」

一見佢應承（好似係），我即刻上咗各大院線，搵哂啲時間地點俾佢揀。

幾分鐘後，阿靜話：「星期5，3點35分，朗豪坊間ua啦。」

係我未興奮得切嘅時候，廚房傳嚟「呯」一聲，我阿娘唔知做乜倒瀉咗煲熱水落隻腳到，嚇到我即刻call白車…道德撚唔好話我濫用救援服務呀，我唔認為俾成煲熱水倒落隻腳到，仲可以自己行落樓下等車再搭車去醫院。

「喂，我阿媽要去醫院，一係我一間打俾你。」

「ok吖。」

我唔知緊張一個人到咩地步先會擔心到嬲，但我剩係知呢一刻，我好嬲我呀媽點解咁唔小心…

係等白車期間，我一度以為自己係住咗係外星，架白車要上




坐火箭先嚟到，如果唔係我真係解釋唔到點解可以等成9個字架車先到，上到車到又等咗4個字先開車。阿娘受咗傷足足1個半鐘先入到醫院門口，睇嚟我真係住係冥王星…

係無止境咁等見醫生嘅時候，我打咗俾阿靜。

「嘟…嘟…」每響一下，我嘅心就跳十下…

「hello」可能聽得太多女性嘅聲音，我已經冇嗰種「嘩，好甜好可愛呀。」嘅感覺。

「hello…」接觸多女性唔代表同陌生人講嘢唔怕羞架麻。

「你呀媽冇事吖麻？」

「俾熱水淋到，而家等緊見醫生，應該冇事嘅……」

「咁唔小心呀…」





「頂…係囉…頂…我好驚呀…頂…我好驚佢有事呀…」我一邊講個心就一邊震…

「放心啦…冇事嘅…」

阿靜一直係電話到陪我，直到我阿娘入去見醫生。見完醫生知道冇乜大礙之後，我終算鬆一口氣。

出到去，我sms俾阿靜：「好彩冇乜事，返去搵你啦。」

「都話架啦！！！冇事咪好囉，你返到去先搵我啦。」

同阿娘搭的士到地鐵站嘅時候，見到要落樓梯，我就同阿娘講：「上嚟啦，我揹你。」

「你得唔得架，我自己行算啦。」





「挑，你咩意思先，我樣樣都得，揹起你，小事啦！」之後經歷咗人生最恐怖嘅1分鐘……當然唔好誤會，唔係我阿娘重，而係揹人行樓梯真係好考平衡力，而我本身比較差……

呢一晚，自從阿靜係我最擔心嘅時候陪住我，佢好似係我嘅心入面開始佔一席位。

《你唔開心嘅時候搵嘅人叫水泡，開心嘅時候第一個諗起嘅人叫最愛……》